ޑެންގީ ޖެހޭ މިންވަރު އިތުރުވެދާނެ: ހެލްތް މިނިސްޓްރީ
16 އެޕްރީލު 2019 | އަންގާރަ 11:05މިއަހަރުގެ މިހާތަނަށް 1493 މީހުންނަށް ޑެންގީ ހުން ޖެހިގެން ރިޕޯޓު ކޮށްފައިވޭ
ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ކުރިއަށް އޮތް ދުވަސްތަކުގައި ޑެންގީ ހުންޖެހޭ މިންވަރު އިތުރުވެދާނެ ކަމަށް ހެލްތް މިނިސްޓްރީން ބުނެފިއެވެ.
އަންގާރަ ދުވަހު ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ސްޓޭޓް މިނިސްޓަރު މުހައްމަދު ޒުހައިރު ވިދާޅުވީ މިއަހަރު މަދިރީގެ ސަބަބުން ޖެހޭ ބަލިތައް އިތުރުވެފައިވާ ކަމަށެވެ.
ތަފާސް ހިސާބުތަކަށް ބަލާއިރު މިއަހަރުގެ މިހާތަނަށް 1493 މީހުންނަށް ޑެންގީހުން ޖެހިގެން ރިޕޯޓު ކުރެވިފައިވާއިރު މިދިޔަ އަހަރުގެ މިހިސާބުގައި ރިޕޯޓު ކުރެވިފައިވަނީ 376 މީހުން ކަމަށް ޒުހައިރު ވިދާޅުވިއެވެ.
ޗިކުންގުންޔާއަށް އަލިއަޅުއްވާލައްވާ ޒުހައިރު ވިދާޅުވީ ތަފާސް ހިސާބުތަކަށް ބަލާއިރު، މިއަހަރުގެ 660 ކޭސް ރިޕޯޓު ކޮށްފައިވާ ކަމަށެވެ. އަދި ރާއްޖޭގެ ބައެއް ސަރަހައްދުތަކުން އަދިވެސް އިތުރަށް ކޭސްތައް ފެންނަމުންދާ ކަމަށް އޭނާ ވިދާޅުވިއެވެ.
ހެލްތް ޕްރޮޓެކްޝަން އެޖެންސީގެ ޑެޕިއުޓީ ޑިރެކްޓަރ ޖެނަރަލް ނިޝާން އަހުމަދު ވިދާޅުވީ މަދިރީގެ ޒަރިއްޔާއިން ފެތުރޭ ބަލިތައް މަދުކުރުމަށް ގަވާއިދުން މާލެއާ އަތޮޅުތެރޭގައި މަސައްކަތްތައް ކުރެމުންދާ ކަމަށެވެ.
އެގޮތުގެ މަތިން މިއަހަރު ވެސް ރާއްޖޭގެ ހުރިހާ ހިސާބެއްގައި ވެސް މަދިރި އުފެދި އާލާވާ ގޮތަށް ހުންނަ ތަންތަން ބަލާ ނައްތާލުމަށް މަސައްކަތް ކުރުމާއި އާންމުން ހޭލުންތެރިކުރުމުގެ ޕްރޮގްރާމްތައް ހިންގުމާއި ޓެލެކޮންފަރެންސް ބާއްވައިގެން ޑޮކްޓަރުންނަށް މައުލޫމާތު ދިނުމާއި މިބަލިތައް ކޮންޓްރޯލް ކުރުމަށް ފަންނީ ލަފާ ދިނުން ފަދަ މަސައްކަތްތައް ކުރަމުންދާ ކަމަށް އޭނާ ވިދާޅުވިއެވެ.
''މިހާރު ވެސް ރިޕޯޓު ކުރާ މިންވަރު މަދެއް ނުވޭ . ކުރިއަށް އޮތްތާގައި ދަށަށް ދާނެ ކަމަށް ލަފާނުކުރެވޭނެ. އެއީ ކޮންމެ އަހަރެއްގެ މެއި، ޖޫން ޖުލައިގައި ގެންޑީހުން ޖެހޭ މިންވަރު އިތުވޭ. އިންސާނުންގެ އަމަލުތަކުން މަދިރިއާލާވާ މިންވަރު ކުޑަ ކުރެވިދާނެ. އެންމެންގެ އެއްބާރުލުން ބޭނުންވޭ މިކަމަށް'' ނިޝާން ވިދާޅުވިއެވެ.
މިހާރު ވިއްސާރަ މޫސުން ފެށިފައިވާތީއާއި އަދި ރާއްޖޭގެ ބައެއް ސަރަހައްދުތަކަށް ވާރޭ ވެހެމުންދާތީ މަދިރި އުފެދި އާލާވާތަންތަން ނައްތާލުމަށް އިތުރުން މަސައްކަތްތައް ކުރަންޖެހޭ ވެސް ނިޝާން ވިދާޅުވިއެވެ.
މާލެ ސީޓީގެ ހާލަތަށް އަލިއަޅުއްވާ ލައްވާ މާލެ ސިޓީގެ މޭޔަރު ޝިފާ މުހައްމަދު ވިދާޅުވީ މީގެ ދެމަސް ކުރިން ކޮންމެ ހަފްތާ ބަންދު ދުވަހެއްގައި ހުއްޓުމެއްނެތި މާލެ ފޮގް ކުރުމުގެ މަސައްކަތް ކުރަމުން އަންނަ ކަމަށެވެ.
''ރައްޔިތުންގެ އެދުމުގެ މަތިން ފޮގްކުރުމުގެ މަސައްކަތް ކުރަނީ . މާލެ، ހުޅުމާލެ އަދި ވިލިމާލެ ފޮގް ކުރަމުންދަނީ. އެކަމަކު ފޮގް ކުރުމަކީ ހަމައެއްކޮށް މަދަރި ނައްތާލެވޭނެ ކަމެއް ނޫން.'' ޝިފާ ވިދާޅުވިއެވެ.
ޝިފާ ވިދާޅުވީ މަދިރި ނައްތާލުމަށް ކުރެވޭ މަސައްކަތުގެ ތެރެއިން ގިނަތަންތަން ބަލާ ފާސްކުރެވިފައިވާ ކަމަށެވެ. އަދި ޕާކުތަކާއި ކޮންސްޓްރަކްޝަން ސައިޓްތަކުގެ 460 ސަރަހައްދެއް މަދިރި އާލާވާ ގޮތަށް ހުރިކަމަށް ފާހަގަކުރެވުނު ކަމަށް އޭނާ ވިދާޅުވިއެވެ.
ޝިފާ ވިދާޅުވީ މަދިރި ކޮންޓްރޯލްކުރުމަށް ކުރާ މަސައްކަތުގެ ދަށުން ގޭތަކަށް ގޮސް ހޭލުންތެރިކުރުވުމުގެ ކަންކަން އިތުރަށްފުޅާ ކުރެވޭނެ ކަމަށާއި، ބޭނުންވަނީ ރައްޔިތުންގެ އެއްބާރުލުން ކަމަށެވެ.
