ނަފްސާނީ ދުޅަހެޔޮ ރާއްޖެ ނަމުގައި ކެމްޕެއިނެއް އިފްތިތާހުކޮށްފި
15 އެޕްރީލު 2019 | ހޯމަ 07:47ނަފްސާނީ ބަލިމަޑުކަން ހުންނަ މީހުން ބާރުވެރިކުރުވާނެ
ނަފްސާނީ ބަލިތަކަށް މީހުން ހޭލުންތެރި ކުރުވައި، އެފަދަ ބަލިތައް ތަހައްމަލު ކުރާ މީހުންނަށް އެހީތެރިކަން ފޯރުކޮށްދިނުމުގެ ގޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން "ނަފްސާނީ ދުޅަހެޔޮ ރާއްޖެ" ނަމުގައި ކެމްޕެއިނެއް އިފްތިތާހުކޮށްފިއެވެ.
ހޯމަ ދުވަހު އެޗްޕީއޭ އިން ބޭއްވި ރަސްމިއްޔާތެއްގައި މި ކެމްޕެއިން އިފްތިތާހުކޮށްދެއްވީ ރައީސުލް ޖުމްހޫރިއްޔާގެ އަނބިކަނބަލުން ފަޒްނާ އަހުމަދެވެ.
ކެމްޕެއިން އިފްތިތާހުކޮށްދެއްވުމުގެ މި ރަސްމިއްޔާތުގައި ވާހަކަ ދައްކަވަމުން ފަޒްނާ ވިދާޅުވީ، ނަފްސާނީ ބަލިތަކަށް އެންމެން ވެސް ހޭލުންތެރިވާން ޖެހޭ ކަމަށާއި، ކޮންމެ އުމުރެއްގެ މީހަަކަށް ވެސް އެފަދަ ބަލިމަޑުކަމެއް ކުރިމަތިވެދާނެ ކަމަށެވެ. އަދި އެއީ ހަމައެކަނި ސިއްހީ މައްސަލައެއް ނޫން ކަމަށް ވެސް ފަޒްނާ ވިދާޅުވިއެވެ.
"ނަފްސާނީ ބަލި ތަހައްމަލު ކުރާ ވަކި އުމުރެއް، ވަކި ޖިންސެއްގެ ބައެއް ނޫޅޭ، އަންހެނުންނާއި، ފިރިހެނުންނާއި، ކުޑަ ކުދިންނާއި، ޒުވާނުންނާއި، އުމުރުން ދުވަސްވީ މީހުން ވެސް މިކަމުގެ ވޭން ތަހައްމަލުކުރޭ. މިކަމުގެ ސަބަބުން އެމީހާ ބަލަހައްޓާ މީހުންނަށާއި، ގާތްތިމާގެ މީހުންނާއި، ރައްޓެހިންނަށް ވެސް އަސަރުކުރޭ. ޤައުމީ ތަރައްޤީއަށާއި، އުފެއްދުންތެރި ކަމަށް ވެސް އަސަރުކުރޭ، ވުމާ އެކު ނަފްސާނީ ބައްޔަކީ ހަމައެކަނި ސިއްހީ ކަމެއް ނޫން، އަދި އިޖްތިމާއީ، އަދި އިޤްތިސާދީ މައްސަލައެއް ވެސްމެ،" ފަޒްނާ ވިދާޅުވިއެވެ.
މި ރަސްމިއްޔާތުގައި ހެލްތު މިނިސްޓަރ އަބްދުﷲ އަމީން ވެސް ވާހަަކަފުޅު ދައްކަވާފައިވާއިރު، އަަމީން ވިދާޅުވީ، ނަފްސާނީ މައްސަލަތައް އެކި ފަންތި އާއި ގިންތީގެ މީހުންނަށް ވެސް ކުރިމަތިވާ ކަމަށާއި، އެފަދަ މީހުންނަށް ކުރިމަތިވާ ގޮންޖެހުންތައް ނައްތާލަންޖެހޭ ކަމަށެވެ.
"ނަފްސާނީ މައްސަލަ ކުރިމަތިވާ މީހުންނަށް ދިމާވެފައި އޮންނަ އެންމެ ބޮޑު މައްސަލައަކީ ހަޤީޤަތުގައި ވެސް ކިހިނެއްހޭ އަހައިފި ކަމުގައިވާ ނަމަ ރަނގަޅޭ ބުނުން. އެ އަށް ފަހުގައި ދެން އިތުރަށް އެ ވާހަކަ ދެއްކުމުގެ ފުރުސަތެއް، ދެއްކުމުގެ ހިތްވަރެއް، ދެއްކުމުގެ ޝައުޤުވެރިކަމެއް ނުހުރޭ، އެހެންވީމާ އަޅުގަނޑުމެންގެ މުޖުތަމައު އެކަންޏެއް ނޫން، ތަހުޒީބު ސޮސައިޓީތަކުގައި ވެސް އަދި ދުނިޔޭގެ ހުރިހާ ހިސާބެއްގަައި ވެސް މި މައްސަލަ ކުރިމަތިވެފައި ވަނީ މިގޮތަށް" މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، މި ކެމްޕެއިންގެ މަޤްސަދަކީ އެފަދަ ބަލިމަޑުކަން ތަހައްމަލުކުރާ ފަރާތްތައް ބާރުވެރި ކުރުވައި އެފަދަ ކަންކަމަށް އެކަށީގެންވާ ފަރުވާ ހޯދުން ކަމަށެވެ.
ނަފްސާނީ ބަލިތަކާ ގުޅޭ އެކި މަޝްރޫތައް ސަރުކާރުން ކުރިއަށްގެންދާއިރު، ނެޝަނަލް މެންޓަލް ހެލްތު ސެންޓަރެއް އުފައްދައި، ނަފްސާނީ ބަލިތަކަށް ދެވޭ ފަރުވާ ފުޅާކޮށް، އެފަރުވާ އާސަންދައިގެ ދަށުން ކަވަރުކުރެވިގެން ދިއުމަކީ ރައީސް ސޯލިހުގެ ރިޔާސީ ވައުދުފުޅުތަކުގެ ތެރޭގައި ވެސް ހިމެނޭ ކަމެކެވެ. އަދި ގުޅިފައިވާ ސިޔާސީ ޕާޓީތަކުގެ ސަރުކާރެއްގައި އެންމެ އިސްކަމެއް ދެއްވާނެ އެއް ކަމަކީ ދިވެހި ރައްޔިތުން ދުޅަހެޔޮ ސިއްޚަތެއްގައި ބޭތިއްބުން ކަމަށާއި، އެކަމަށްޓަކައި ދައުލަތުގެ ސިއްޚީ ނިޒާމަށް ކޮންމެހެން ގެންނަން ޖެހޭ ބަދަލުތައް ގެންނާނެ ކަމަށް ވެސް ރައީސް ސޯލިހު ވަނީ ވިދާޅުވެފައެވެ.
