ފުވައްމުލަކު ރިންގް ރޯޑް ޕްރޮޖެކްޓް: ރައްޔިތުންގެ މަޝްވަރާ ނުހޯދާތީވެ ޝަކުވާ
ރިންގް ރޯޑުގެ ޑިޒައިން ބަދަލު ކުރަން އެދިފައިވާ އިރު ގެނައީ ކޮން ބަދަލުތަކެއް ކަން ކައުންސިލަށް އަންގާފައެއް ނުވޭ
ފުވައްމުލަކު ރިންގް ރޯޑް
ރައްޔިތުންގެ މަޝްވަރާ އެއް ނެތި ފުވައްމުލަކު ރިންގް ރޯޑް ޕްރޮޖެކްޓް ކުރިއަށް ގެންދާތީވެ އެ ރަށު ރައްޔިތުންގެ ކަންބޮޑުވުން ފާޅުކޮށްފިއެވެ.
'' ރައީސް ޔާމީންގެ ސަރުކާރުގައި ވެސް ޑިޒައިންގެ މައްސަލަ ކަމާބެހޭ ފަރާތައް އެންގިން. އޭރުވެސް އެ މައްސަލަ ހައްލު ނުވެ އޮތީ... މިހާރު ވެސް އެވާހަކަ ދައްކަ ދައްކާ މި ތިބެނީ. ކުއްލި އަކަށް މި ފެނުނީ އެ ޕްރޮޖެކްޓް އެމްޓީސީސީ އާ ހަވާލު ކުރިތަން. އިހަށް ދުވަހު ބުނީ ރަސްމިއްޔާތަށް ތައްޔާރު ވާށޭ، އެހެން އެކަމެއް ނުވާނެއް ނުން،''
މިއީ ފުވައްމުލަކު މޭޔާރު އެ ރަށުގެ ރިންގް ރޯޑުގެ ޑިޒައިން ރަށުގެ ރައްޔިތުންނަށް ހާމަކޮށްފައި ނުވާތީވެ ހިތްހަމަ ނުޖެހުން ފާޅުކުރަމުން ވާހަކަ ފެށި ހިސާބެވެ.
ކުރީގެ ރައީސް ޔާމިންގެ ސަރުކާރުގައި އެ މަޝްރޫއު ކުރިޔަށް ގެންދަން ފެށުމުން އެ ރަށު ރައްޔިތުން ވަނީ ރިންގް ރޯޑްގެ ޑިޒައިނަށް ބަދަލުތަކެއް ގެނައުމަށް އެދިފައެވެ. މި ސަރުކާރު ވުޖޫދަށް އައުމަށް ފަހު ރިންގް ރޯޑްގެ މަޝްރޫއު އެމްޓީސީސީއާ ހަވާލު ކޮށްފައި ވަނީ މާޗް މަހުގެ 27 ވަނަ ދުވަހުއެވެ. އެކަމަކު އެ ޙަބަރު ވެސް ލިބުނީ، ނޫސްތަކުން ކަމަށާއި، ރަސްމީކޮށް އެ ޕްރޮޖެކްޓް އެމްޓީސީސީއާ ހަވާލު ކުރިކަމެއް ކައުންސިލަށް އަންގާފައި ނުވާ ކަމަށް ފަލާހު ވަނީ ވިދާޅުވިއެވެ.
ފުވައްމުލަކު މޭޔަރ ފަލާހް ޝަރީފް
އަދި ރިންގް ރޯޑުގެ ޑިޒައިން ބަދަލު ކުރަން އެދިފައިވާ އިރު ގެނައީ ކޮން ބަދަލުތަކެއް ކަން ރައްޔިތުންނަށް އަންގާފައިނުވާ ކަމަށް ފަލާހު ވިދާޅުވިއެވެ. އެކަމާއި ރައްޔިތުން ވަރަށް ބޮޑަށް ކަންބޮޑުވުންފާޅު ކުރަމުންދާ ކަމަށް އޭނާ ވިދާޅުވިއެވެ.
'' މީގެ ޕޮއިންޓަކީ މި ފަދަ މަޝްރޫއުތައް ހިންގާއިރު ރައީސް ވިދާޅުވެފައި އޮތީ ރައްޔިތުންގެ މަޝްވަރާއެކު ކަންތައް ކުރިޔަށް ގެންދާނީ. ޑިޒައިންގެ މައްސަލަ ހުށައަޅާ އެ މައްސަލަ ބޮޑުވެފައި އޮއްވާ.. މަޝްވަރާތަކެއް ނުކޮށް ކުއްލިޔަކަށް އިއުލާން ކުރީ. އެއީ ރަނގަޅު ގޮތެއް ނޫންތާ'' ފަލާހު ވިދާޅުވިއެވެ.
މި ސަރުކާރުން ކޮންމެ ރަށެއްގައި ވެސް މަޝްރޫއުތައް ހިންގާނީ އެ ރައްޔިތުންގެ މަޝްވަރާތަކުގެ މަތިން ކަމަށް ރިޔާސީ އިންތިހާބު ތެރޭގައި ރ. ފައިނުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެފައިވެއެވެ.
"އަޅުގަނޑުމެން ފުރަތަމަ ކުރާނެ ކަމަކީވެސް މަޝްރޫއާއި ބެހޭ ގޮތުން ރައްޔިތުންނާއި މަޝްވަރާކުރުން. ރަށުގެ ކައުންސިލާއި މަޝްވަރާކޮށް މަޝްރޫއު ކުރިއަށް ގެންދާނެ ގޮތްތައް ނިންމުން. ޚަރަދު ކުރާނީވެސް ދެފުށް ފެންނަ ގޮތަށް ރައްޔިތުންނަށް އެނގޭގޮތަށް." ރައީސް ސޯލިހު ވިދާޅުވިއެެވެ.
ފުވައްމުލަކު ރިންގް ރޯޑްގެ މައްސަލާގައި ރައްޔިތުންގެ ކުރި ކަންބޮޑުވުން ޕްލޭނިންގ މިނިސްޓްރީއާ ހިއްސާ ކޮށްފައިވާނެ ކަމަށާއި، އެކަން މިހާތަނަށް ކާމިޔާބު ވެފައިނުވާ ކަމަށް ފަލާހް ވަނީ ވިދާޅުވިއެވެ.
މިކަމާއި ބެހޭ ގޮތުން ޕްލޭނިންގ މިނިސްޓްރީގެ ބަހެއް ހޯދާލުމަށް މީޑިއާ އޮފިޝަލަށް ގުޅާލުމުން ފޯނަށް ޖަވާބު ނުދެއްވާތީ އިތުރު މައުލޫމާތު ލިބޭ ގޮތް ވަނީ ނުވެފައެވެ.
ރިންގް ރޯޑް ރަސްމީކޮށް ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މި މަހުގެ 17 ވަނަ ދުވަހުއެވެ. އެ މަޝްރޫއުއަށް 32 މިލިއަން ޑޮލަރު ހަރަދު ވާނެ ކަމަށް އެމްޓީސީސީން ވަނީ ބުނެފައެވެ.
