ފިއްލަދޫ ކައުންސިލް ބައި އިލެކްޝަން އެމްޑީޕީން ކާމިޔާބުކޮށްފި
އެމްޑީޕީން ކާމިޔާބު ހޯދީ ޕީޕީއެމާ ވާދަކޮށް
ފިއްލަދޫ ކައުންސިލް ބައި އިލެކްޝަންސްގައި މާލޭގައި ބެހެއްޓި ވޯޓު ފޮށި ގުނުމުގެ މަސައްކަތް ކުރަނީ
ހއ. ފިއްލަދޫ ކައުންސިލުން ހުސްވި ދެ މެމްބަރުންގެ ގޮނޑިއަށް ކުރިމަތިލެއްވި އެމްޑީޕީގެ ދެ ކެންޑިޑޭޓުން ކާމިޔާބު ހޯއްދަވައިފިއެވެ.
އެމްޑީޕީގެ ކެންޑިޑޭޓުން ކާމިޔާބު ހޯއްދެވީ ޕީޕީއެމްގެ ދެ ކެންޑިޑޭޓުންނާ ވާދަ ކުރައްވައެވެ.
ފިއްލަދޫ ކައުންސިލްގެ ބައި އިލެކްޝަން ހޮނިހިރު ދުވަހު ބޭއްވީ ރަށު ކައުންސިލްގައި ހިމެނޭ ތިން ކައުންސިލަރުންގެ ތެރެއިން ދެ ކައުންސިލަރަކު އިސްތިއުފާ ދެއްވުމާ ގުޅިގެންނެވެ. ކައުންސިލުން ހުސްވި ދެ ގޮނޑިއަށް އެމްޑީޕީ އާއި ޕީޕީއެމުން ހަތަރު ކެންޑިޑޭޓުން ވާދަ ކުރެއްވިއެވެ.
މާލެ އާއި ފިއްލަދޫގައި ބޭއްވި ބައި އިލެކްޝަންގެ ވަގުތީ ނަތީޖާއިން ދައްކާ ގޮތުން އެ ކައުންސިލުން ހުސްވި ދެ ގޮނޑި ކާމިޔާބު ކުރެއްވީ އެމްޑީޕީގެ ދެ ކެންޑިޑޭޓުން ކަމަށްވާ އަބްދުﷲ ރިޔާޒާއި މުހައްމަދު ޝިޔާދުއެވެ. އެންމެ ގިނަ ވޯޓު ހޯއްދެވީ އަބްދުﷲ ރިޔާޒެވެ. އޭނާއަށް ލިބިވަޑައިގެންނެވީ 352 ވޯޓެވެ. ދެ ވަނައަށް އެންމެ ގިނަ ވޯޓު ހޯއްދެވީ ޝިޔާދުއެވެ. އޭނާއަށް ލިބިވަޑައިގެންނެވީ 289 ވޯޓެވެ.
އިންތިހާބުން ނާކާމިޔާބުވެވަޑައިގެންނެވި ޕީޕީއެމްގެ ކެންޑިޑޭޓު މުހައްމަދު މޫސާއަށް ލިބިވަޑައިގެންނެވީ 283 ވޯޓެވެ. ޕީޕީއެމްގެ އަނެއް ކެންޑިޑޭޓް މަރިޔަމް ޒޫނާއަށް ލިބިވަޑައިގެންނެވީ 184 ވޯޓެވެ.
އިލެކްޝަންސް ކޮމިޝަނުން އާންމު ކޮށްފައިވާ ފިއްލަދޫ ބައި އިލެކްޝަންގެ ވޯޓާސް ލިސްޓުން ދައްކާ ގޮތުން އެ އިންތިހާބުގައި ވޯޓުލުމުގެ ހައްގު ލިބިގެން ވަނީ 783 މީހުންނަށެވެ. ހޮނިހިރު ދުވަހު ބޭއްވި އެ އިންތިހާބުގައި ވޯޓުލާފައި ވަނީ 571 މީހުންނެވެ.
ފިއްލަދޫގެ އާބާދީއަކީ 1118 އެވެ.
