ބާރަށު ދާއިރާގެ ވޯޓު ގުނުމުން ދެ ކެންޑިޑޭޓުންނަށް އިތުރު ހަތް ވޯޓު!
އަހުމަދު ކުރި ހޯއްދެވީ 42 ވޯޓުގެ ތަފާތުން
އަހުމަދު އަބްދުﷲ: ތިން ފޮށްޓެއް ގުނުމުން ވެސް ކުރި ހޯއްދެވި
ރައްޔިތުންގެ މަޖިލީހުގެ އިންތިހާބުގައި ބާރަށު ދާއިރާގެ ބާތިލު ވޯޓު އަލުން ގުނުމުން, އެ ދާއިރާއަށް ވާދަ ކުރެއްވި ދެ ކެންޑިޑޭޓުންނަށް ހަތް ވޯޓު ލިބިފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
ބާރަށު ދާއިރާގެ ގޮނޑި ދިފާއު ކުރެއްވުމަށް ނުކުންނެވި، އެ ދާއިރާގެ މެމްބަރު އިބްރާހިމް ޝުޖާއާ ވާދަ ކުރައްވައި، އެ ގޮނޑި ކާމިޔާބު ކުރައްވާފައި ވަނީ އެމްޑީޕީގެ ޗެއާޕާސަން ނައިބު މާލީ އަހުމަދު އަބްދުﷲ އެވެ. ރައްޔިތުންގެ މަޖިލީހުގެ މެމްބަރުކަން ކުރިން ވެސް ކުރައްވާފައިވާ އަހުމަދު އަބްދުﷲ އެ ގޮނޑި ކާމިޔާބު ކުރެއްވީ 42 ވޯޓުގެ ފަރަގުންނެވެ.
އެ ދާއިރާގެ ބާތިލު ވޯޓު 64 އަރާފައިވުމުން، އިލެކްޝަންސް ކޮމިޝަނުން ބުދަ ދުވަހުގެ ރޭ ވަނީ އެ ދާއިރާގެ ތިން ވޯޓު ފޮށްޓެއް އަލުން ގުނާފައެވެ. ވޯޓު އަލުން ގުނުމުން ބާތިލު ވޯޓުތަކުގެ ތެރެއިން ބައެއް ވޯޓުތައް ވަނީ ސައްހަ ވޯޓުގެ ގޮތުގައި ކަނޑައަޅާފައެވެ.
އެކަމާ ގުޅޭ ގޮތުން ރާއްޖެއެމްވީއަށް މައުލުމާތު ދެއްވަމުން އެ ކޮމިޝަންގެ ސްޕޯކްސްޕާސަން އަހުމަދު އަކްރަމް ވިދާޅުވީ ބާރަށު ދާއިރާގެ ފުރަތަމަ ފޮށި ގުނިއިރު، ކުރިން ނުލިބޭ ހަތް ވޯޓު ކޮންމެ ކެންޑިޑޭޓަކަށް ލިބުނު ކަމަށެވެ. ނަމަވެސް އެ ދާއިރާގެ ދެ ވަނަ ފޮށްޓާއި ތިން ވަނަ ފޮށި ގުނިއިރުގައި އިތުރު ބަދަލުތަކެއް ނައުމުން، ދެން އެ ދާއިރާގެ ވޯޓު ފޮށިތައް އަލުން ނުގުނުމަށް ނިންމާފައިވާ ކަމަށް އަކްރަމް ވިދާޅުވިއެވެ.
"މި ވާގޮތަކީ ފަރަގަށް ވުރެ 22 ވޯޓު އިތުރު ކަމަށް މި ދައްކަނީ. އެހެންވީމަ އަޅުގަނޑުމެން ގުނިއިރުގަ، ފުރަތަމަ ފޮށިން ކުރިން ނުލިބޭ ހަތް ވޯޓު ކޮންމެ ކެންޑިޑޭޓަކަށް ލިބިފައި އެބަވޭ. ދެން އަޅުގަނޑުމެން ދެ ވަނަ ފޮށްޓާއި ތިން ވަނަ ފޮށި ގުނިއިރު، އިތުރު ބަދަލުތަކެއް ނައީމަ، ބާރަށު ދާއިރާގެ ވޯޓު ގުނުން ނިންމާލާފަ،" އަކްރަމް ވިދާޅުވިއެވެ.
ސަތާރަ ވަނަ ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރުކަން ކުރެއްވި އަހުމަދު އަބްދުﷲ، މިދިޔަ ހޮނިހިރު ދުވަހު ބޭއްވި އިންތިހާބުގައި ބާރަށު ދާއިރާގެ ގޮނޑި ކާމިޔާބު ކުރެއްވީ 1524 ވޯޓު ހޯއްދަވައިގެންނެވެ. އެ ދާއިރާގެ މިހާރުގެ މެމްބަރަށް ލިބިވަޑައިގެންނެވީ ޝުޖާއުއަށް ލިބިވަޑައިގެންނެވީ 1482 ވޯޓެވެ.
ތިން ރަށެއްގެ މައްޗަށް އެކުލެވޭ ބާރަށު ދާއިރާގެ އާބާދީއަކީ 4783 އެވެ. އެ ދާއިރާގައި ހިމެނޭ ރަށްތަކަކީ ހއ. ބާރަށާއި ހއ. މުރައިދޫ ދާއި ހއ. ތަކަންދޫ އާއި ހއ. އުތީމެވެ.
