އިންޓަ ސްކޫލް ހޭންޑްބޯޅަ މުބާރާތް: 12 އަހަރުން ދަށުގެ ދެ ބައިގެ ޗެމްޕިއަންކަން ވެސް ޖަމާލުއްދީން ހޯދައިފި

ފަސްވަނަ އިންޓަރ ސްކޫލް ހޭންޑްބޯޅަ މުބާރާތުގެ 12 އަހަރުން ދަށުގެ ފިރިހެން އަދި އަންހެން ބައިގެ ޗެމްޕިއަންކަން ވެސް ޖަމާލުއްދީން ސްކޫލް ހޯދައިފި އެވެ.

މުބާރާތުގެ 12 އަހަރުން ދަށުގެ ފިރިހެން ބައިގެ ޗެމްޕިއަންކަން ޖަމާލުއްދީނުން ހޯދީ ކުޅުނު އެއްވެސް މެޗަކުން ބަލިނުވެއެވެ. ޖަމާލުއްދީނުން ވަނީ ފައިނަލުގައި ގިޔާސުއްދީން ސްކޫލާ ވާދަކޮށް ފަސޭހަކަމާއެކު 4-14 އިން ކުރިހޯދާފައެވެ. އަދި މިއީ އެޓީމުން ފިރިހެން ބައިގެ ޗެމްޕިއަންކަން ވިދިވިދިގެން ހޯދި ތިންވަނަ ފަހަރެވެ.

އަންހެން ބައިގެ ޗެމްޕިއަންކަން ޖަމާލުއްދީނުން ހޯދީ ކުޅުނު އެއްވެސް މެޗަކުން ބަލިނުވެއެވެ. ޖަމާލުއްދީނުން ވަނީ ފައިނަލުގައި ޣާޒީ ސްކޫލާ ވާދަކޮށް 4-9 ގެ ނަތީޖާއަކުންނެވެ.

މި ފަހަރުގެ މުބާރާތުގައި ޖުމްލަ 78 ޓީމެއް ބައިވެރިވެފައިވާއިރު، އެންމެ ފުރަތަމަ ކުރިއަށް ދިޔައީ 12 އަހަރުން ދަށުގެ ކުޅުމެވެ.

ދެން މުބާރާތުގައި ކުރިއަށްދާނީ، 14 އަހަރުން ދަށާއި، 16 އަހަރުން ދަށުގެ އުމުރުފުރާގެ ކުޅުމެވެ. އެގޮތުން ބުރާސްފަތި ދުވަހު މި ދެ އުމުރުފުރާގެ ކުޅުން ވެސް ފެށޭނެއެވެ.