ސައްހަ ވޯޓެއް ބާތިލު ކަމަށް ނިންމުމަކީ ގާނޫނީ ކުށެއް ކަމަށާއި އެކަން ކުރި އޮފިޝަލާމެދު ފިޔަވަޅު އަޅުއްވާނެ ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފު ވިދާޅުވެއްޖެއެވެ.
ޝަރީފު އެހެން ވިދާޅުވީ ބާތިލު ވޯޓުތައް ގިނަ މައްސަލާގައި މާމިގިލީ ދާއިރާގެ ތިން ވޯޓު ފޮށްޓެއް އަލުން ގުނުމުން، ބާތިލު ވޯޓުތަކުގެ ތެރޭގައި ސައްހަ ވޯޓު ހުރުމުންނެވެ. މާމިގިލީ ދާއިރާގެ ބާތިލު ވޯޓުގެ އަދަދަކީ 190 އެވެ. ނަމަވެސް ބާތިލު ވޯޓުތައް އަލުން ގުނުމުން، 109 ވޯޓެއް ސައްހަ ކަމަށް ވަނީ ކަނޑައަޅާފައެވެ. އެ ދާއިރާގެ ބާތިލު ވޯޓުގެ އަދަދަކީ މިހާރު 81 އެވެ.
އެކަމާ ގުޅިގެން ޓްވިޓާގައި މީހަކު ކުރި ސުވާލަކަށް ޖަވާބު ދެއްވަމުން ޝަރީފު ވިދާޅުވީ ކަނޑައެޅިގެން ސައްހަ ވޯޓެއް ބާތިލު ކަމަށް ނިންމުމަކީ ގާނޫނީ ކުށެއް ކަމަށާއި އެކަން ކުރި އޮފިޝަލާ ދޭތެރޭ އެ ކޮމިޝަނުން ގާނޫނީ ފިޔަވަޅު އަޅާނެ ކަމަށާއި އެކަމަކީ އެހެން ފަރާތްތަކަށް އިބުރަތަކަށް ވާންޖެހޭ ކަަމަށެވެ.
Kanda elhigen sahha vote eh bathil kamah nimmumakee gaanoonee kusheh, e official aa dheytherey gaanoonee fiyavalhu commission in alhaane, mikan ehen faraithakah ibrathakah vaan jehey https://t.co/YCO2d2Hibw
— Ahmed Shareef (@ShareefRangondi) April 9, 2019
ރައްޔިތުންގެ މަޖިލީހުގެ އިންތިހާބުގައި ވޯޓުލުމުގެ ހައްގު ލިބިގެންވާ މީހުންގެ ތެރެއިން 80.2 ޕަސެންޓް މީހުން ވަނީ ވޯޓުލާފައެވެ. އެއީ 212،079 މީހުންނެވެ. މަޖިލިސް އިންތިހާބުގައި ވޯޓުލުމުގެ ހައްގު ލިބުނީ 264،442 މީހުންނަށެވެ.
