ޤަވާއިދާ ޚިލާފަށް ޕާކުކޮށްފައިވާ ގިނަ ޢަދަދެއްގެ އެއްގަމު އުޅަނދުގައި ފުލުހުން ސްޓިކާ ޖަހައިގެން ބައި މިލިއަނެއްހާ ރުފިޔާ ހޯދާފައިވާކަން ހާމަވެއްޖެއެވެ.

ފުލުހުން އާދިއްތަ ދުވަހު އާންމުކޮށްފައިވާ ތަފާސް ހިސާބުތަކަށް ބަލާއިރު، ހުސްވި މާރޗް މަހުގެ 30 ވަނަ ދުވަހުން ފެށިގެން މި އޭޕްރީލް މަހުގެ 5 ވަނަ ދުވަހާ ހަމައަށް އެ އިދާރާއިން ވަނީ 1013 އުޅަނދެއްގައި ސްޓިކާ ޖަހާފައެވެ.

ފުލުހުން ގަވާއިދާ ޚިލާފަށް އެއްގަމު އުޅަނދެއް މަގުމަތީގައި ޕާކްކޮށްފައި ވާނަމަ ފުރަތަމަ ފަހަރަށް ޖޫރިމަނާގެ ގޮތުގައި ދައްކަން ޖެހެނީ 250ރ. އެވެ. ދެވަނަ ފަހަރަށް ޕާކު ކޮށްފި ނަމަ 500ރ. ދައްކަން ޖެހޭއިރު ތިން ވަނަ ފަހަރު ނަމަ ޖޫރިމަނާގެ ގޮތުގައި 750ރ. ދައްކަން ޖެހެއެވެ. އެ ގޮތުން މިދިޔަ ހަފްތާ ތެރޭގައި 1013 އުޅަނދެއްގައި ސްޓިކާ ޖެހިއިރު، 500 ގެ ރޭޓުން ބަލާ ނަމަ އެއީ ޖޫރިމަނާގެ ގޮތުގައި ބައި މިލިއަނެއްހާ ރުފިޔާއެވެ.

ސްޓިކާ ޖެހުން ހުއްޓާލުމަކީ އަލަށް އިންތިޚާބުވި އެމްޑީޕީގެ ސަރުކާރުގެ ސަތޭކަ ދުވަހުގެ ވަޢުދެކެވެ. ވެރިކަމާއި އެ ޕާޓީން ހަވާލުވި ފުރަތަމަ ދުވަސްކޮޅުގައި ސްޓިކާ ޖެހުން ހުއްޓާލި ނަމަވެސް ދާދި ފަހުން ފުލުހުން ވަނީ އަލުން ސްޓިކާ ޖަހަން ފަށާފައެވެ.

ފުލުހުން އަލުން ޕާކިން ސްޓިކާ ޖަހަން ފަށާފައި ވަނީ މާލޭގެ ނުވަ ސަރަހައްދެއްގައި ގަވާއިދާ ހިލާފަށް ޕާކް ކުރުމުންނެވެ. އެ ސަރަހައްދުތަކަކީ މިސްކިތްތައް ކައިރި އާއި، ކަފިހި ހުރަސްތަކާއި، ގޯޅިތަކުގެ ކަންމަތީގައާއި، ސްކޫލްތައް ކައިރިއާއި، ހޮސްޕިޓަލްތައް ކައިރިއާއި، ބޭންކްތައް ކައިރިއާއި، ބޮޑުތަކުރުފާނު މަގުގެ ތާރު އެޅި ސަރަހައްދާއި، ބެރިކޭޑް ބަހައްޓާފައިވާ ސަރަހައްދުތަކާއި، ޑަބަލް ލައިން ދަމާފައިވާ ސަރަހައްދުތަކެވެ.