ޕްރިމިއާ ލީގު: ފަހަތުން އަރައި ސައުތުހެމްޕްޓަން ބަލިކޮށް ލިވަޕޫލް ތާވަލުގެ އެއްވަނައަށް

އިންގްލިޝް ޕްރިމިއާ ލީގުގައި ހުކުރު ދުވަހު ކުޅުނު މެޗު ފަހަތުން އަރައި ކާމިޔާބުކޮށް، ލިވަޕޫލް ތާވަލުގެ އެއްވަނައަށް ޖެހިލައިފިއެވެ.

ލިވަޕޫލް މެޗު ކާމިޔަބުކުރީ ސައުތުހެމްޕްޓަންއާ ވާދަކޮށް 1-3 ގެ ނަތީޖާއަކުންނެވެ.

ސައުތުހެމްޕްޓަންގެ ދަނޑުގައި ކުޅުނު މި މެޗުގައި ގިނަ ވަގުތު ބޯޅަ ކޮންޓްރޯލް ކޮށްގެން ރަނގަޅަށް ކުޅެފައި ވަނީ ލިވަޕޫލުންނެވެ. އެހެން ނަމަވެސް މެޗުގެ ފުރަތަމަ ހާފްގެ ކުރީކޮޅު ލިވަޕޫލްގެ ޑިފެންސްލައިނަށް ހެދުނު ގޯހެއްގެ ބޭނުންހިފައި ސައުތުހެމްޕްޓަން ވަނީ މެޗުގެ ލީޑް ނަގާފައެވެ. ސައުތުހެމްޕްޓަންގެ ފުރަތަމަ ލަނޑު މެޗުގެ 9 ވަނަ މިނެޓުގައި ކާމިޔާބު ކޮށްދިނީ ޕައިއަރ ހޮބަރގްގެ އެހީތެރި ކަމާ އެކު ޝޭން ލޯންގްއެވެ.

ސައުތުހެމްޕްޓަންގެ ލަނޑާ އެކު ލިވަޕޫލްގެ ކުޅުން ރަނގަޅުކޮށް، ލިވަޕޫލުން ވަނީ ސައުތުހެމްޕްޓަންގެ ފަހަތަށް ބާރުބޮޑުކޮށް ރަނގަޅު ހަމަލާތަކެއް އުފައްދާފައެވެ. ނަތީޖާއެއްގެ ގޮތުން ލިވަޕޫލްގެ ފުރަތަމަ ލަނޑު މެޗުގެ 36 ވަނަ މިނެޓުގައި ޓްރެންޓް އެލެގްސެންޑަރ އަރނޯލްޑްގެ އެހީތެރިކަމާ އެކު ކާމިޔާބުކޮށް ދިނީ ނަބީ ކެއިޓާއެވެ.

މެޗުގެ ފުރަތަމަ ހާފް ނިމުނީ 1-1 ގެ ނަތީޖާއަކުން ދެ ޓީމް އެއްވަރުވެގެންނެވެ.

މެޗުގެ ދެވަނަ ހާފް ފެށިގެން ލިވަޕޫލްގެ ފަރާތުން ވަރުގަދަ ކުޅުމެއް ފެނިގެން ދިޔައިރު، އެ ޓީމުން ވަނީ ސައުތުހެމްޓަންގެ ގޯލާއި އަމާޒުކޮށް ވަރުގަދަ ހަމަލާތަކެއް ފޮނުވާލާފައެވެ. އެހެން ނަމަވެސް ސައުތުހެމްޓަންގެ ޑިފެންޑަރުން ވަނީ މި ހަމަލާތަށް ދިފާއުކޮށްފައެވެ.

މެޗު ނިމެން 10 މިނެޓަށް ވެފައި ވަނިކޮށް ލިވަޕޫލްއަށް ލީޑް ނަގައިދިނީ ޖޯރޑަން ހެންޑަރސަންގެ އެހީތެރިކަމާއެކު އެ ޓީމުގެ ތަރި މުހައްމަދު ސަލާޙްއެވެ. ސަލާހުގެ ލަނޑާއެކު އުފާ ފާޅުކުރުމަށް ޖޯޒީ ބޭލުމުން އޭނާ އަށް ވަނީ ރީނދޫ ކާޑެއް ދައްކާފައެވެ.

ނަތީޖާ ހަމަހަމަ ކުރުމަށް ސައުތުހެމްޕްޓަންއަށް ރަނގަޅު ފުރުސަތުތަކެއް ލިބި ވަނީ ބޭކާރު ވެފައެވެ.

ލިވަޕޫލްއަށް ނަތީޖާގެ ފަރަގު އިތުރަށް ފުޅާ ކޮށްދިނީ މެޗުގެ 86 ވަނަ މިނެޓުގައި ރޮބާޓޯ ފަރމީނޯގެ އެހީތެރި ކަމާއެކު ޖޯރޑަން ހެންޑަރސަންއެވެ.

މި ނަތީޖާއާ އެކު ލިވަޕޫލް ކުޅުނު 33 މެޗުން ލިބުނު 82 ޕޮއިންޓާއެކު ތާވަލުގެ އެއްވަނާގައި އޮތީ ދެވަނާގައި އޮތް މެންޗެސްޓަރ ސިޓީއަށްވުރެ އެއްމެޗު އިތުރަށް ކުޅެގެންނެވެ. ސިޓީއަށް ލިބިފައި ވަނީ ކުޅުނު 32 މެޗުން 80 ޕޮއިންޓެވެ.

މެޗުން ބަލިވި ސައުތުހެމްޕްޓަން އޮތީ ކުޅުނު 32 މެޗުން ލިބުނު 33 ޕޮއިންޓާ އެކު ތާވަލުގެ 16 ވަނާގައެވެ.