ރިނބުދޫ ބަނދަރު ހަދާނެ ފަރާތެއް ހޯދަނީ
5 އެޕްރީލު 2019 | ހުކުރު 11:50ބިޑް ސެކިއުރިޓީގެ ގޮތުގައި 150،000 ރުފިޔާ ދައްކަން ޖެހޭ
ދ. ރިނބޫދޫ
ދ. ރިނބުދޫ ބަނދަރު ހަދާނެ ފަރާތެއް ހޯދަން ފިނޭންސް މިނިސްޓްރީން އިއުލާން ކޮށްފިއެވެ.
އެ މިނިސްޓްރީން ބުރާސްފަތި ދުވަހު ކުރި އިއުލާނެއްގައި ބުނީ، މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގެ އެ ދުމުގެ މަތިން އެ ރަށު ބަނދަރު ހަދާނެ ބަޔަކު ހޯދަމަށް ބީލަމަށް ހުޅުވާލާފައިވާ ކަމަށެވެ.
ބިޑް ސެކިއުރިޓީގެ ގޮތުގައި 150،000 ރުފިޔާ ދައްކަން ޖެހެއެވެ. ފިނޭންސް މިނިސްޓްރީން ބުނީ، ބީލަމުގައި ބައިވެރިވުމަށް ރަޖިސްޓްރޭޝަން ފީއަކީ 1500 ރުފިޔާއެވެ.
ފައިސާ ބަލައިގަންނަން ހަމަޖެހިފައި ވަނީ އޭޕްރީލް މަހުގެ 8 އިން މޭ މަހުގެ 7 ގެ ނިޔަލަށް ބަންދު ނޫން ކޮންމެ ދުވަހެއްގެ 08:30 އިން 12:00 އަށެވެ. އަދި ރަމަޟާން މަހުގެ 10:00 އިން 12:00 އަށެވެ. މި މަސައްކަތާ ބެހޭ އެންމެހާ ލިޔެކިޔުންތައް 07 އެޕްރީލް 2019 އިން ފެށިގެން ސޮފްޓްކޮޕީ ފޯރމެޓުގައި މި މިނިސްޓްރީގެ ވެބްސައިޓް އިން ޑައުންލޯޑް ކުރެވެން ހުންނާނެ ކަމަށް އިއުލާނުގައި ވެއެވެ.
ފިނޭންސް މިނިސްޓްރީން ބުނީ، ބީލަން ހުޅުވުން އޮންނާނީ 2019 މޭ 8 ވާ ބުދަ ދުވަހުގެ 11:00 ގައި މި މިނިސްޓްރީގެ ނެޝަނަލް ޓެންޑަރ ޖަލްސާކުރާ މާލަމުގައެވެ.
ގަޑި ޖެހުމަށް ފަހު ހުށަހަޅާ ބީލަންތައް ބަލައިނުގަނެ އަނބުރާ ރައްދުކުރެވޭނެ ކަމަށް އެ މިނިސްޓްރީން ބުންޏެވެ. ބީލަންތައް ހުންނަންވާނީ ސިޓީއުރައެއްގައި ބަންދުކުރެވިފައެވެ. ބޭރުގައި ބީލަމަށް ދެވިފައިވާ ނަން، ހުޅުވަން ކަނޑައެޅިފައިވާ ތާރީޚާއި ވަގުތު އަދި ކޮންޓްރެކްޓަރުގެ ނަން ލިޔެވިފައި އޮންނަންވާނެއެވެ.
ބީލަމުގެ މުއްދަތަކަށް ބިޑް ހުށަހަޅާ ތާރީޚުން ފެށިގެން 120 ދުވަސް އޮންނަންވާނެ ކަމަަށާއި މިނިސްޓްރީ އިން ކުރިއަށް ގެންދެވޭ ބީލަންތަކުގައި ބައިވެރި ވެވޭނީ މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގެ "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ގަވާއިދު" ގައިވާ ގޮތުގެ މަތީން ރަޖިސްޓަރީ ވެފައިވާ ފަރާތްތަކަށް ކަމަށް އިއުލާނުގައި ވެއެވެ.
