ނައިބު ރައީސްގެ މަޤާމުން ވަކިކުރި މައްސަލާގައި ޖަމީލް ސުޕްރީމް ކޯޓަށް !
މަޤާމުން ވަކި ކުރީ މަޖިލިހުގެ 78 މެމްބަރުންގެ އަޢުލަބިއްޔަތުން
ކުރީގެ ނައިބު ރައީސް ޑރ.މުހައްމަދު ޖަމީލް އަހުމަދު
ނައިބު ރައީސް ކަމުގެ މަޤާމުން ވަކިކުރި މައްސަލާގައި ޑރ. މުހައްމަދު ޖަމީލް އަހްމަދު ސުޕްރީމް ކޯޓަށް ބުރާސްފަތި ދުވަހު މައްސަލައެއް ހުށަހަޅުއްވައިފި އެވެ.
އެކަމާ ގުޅޭގޮތުން މީޑިއާއަށް މައުލޫމާތު ދެއްވަމުން ޖަމީލް ވިދާޅުވީ، ރައްޔިތުންގެ މަޖިލީހުން އެމަނިކުފާނު މަގާމުން ދުރުކުރީ ގާނޫނުއަސާސީއާ ކަނޑައެޅިގެން ޚިލާފަށް ކަމަށާއި، އޭރު މަޖިލީހުން މައްސަލަ ނިންމާފައިވަނީ ގާނޫނުއަސާސީގައި ކަނޑައަޅާފައިވާ އެއްވެސް އިޖުރާއަތަކަށް އަދި އުސޫލަކަށް ވެސް ބެލުމެއް ނެތި ކަމަށެވެ.
އަދި އިތުބާރު ނެތް ކަމުގެ މައްސަލަ މަޖިލީހަށް ވެއްދީ ވެސް އެމަނިކުފާނުގެ އެއްވެސް ކުށެއް އޮވެގެން ނޫން ކަމަށާއި، ގާނޫނުއަސާސީން ކަށަވަރު ކޮށްދީފައިވާ ގިނަ ހައްގުތަކެއް ވެސް ނިގުޅައިގެންފައިވާ ކަމަށެވެ.
ރައީސް ޔާމީނުގެ ނައިބަކަށް ވަޑައިގަތުމުގެ ކުރިން ޖަމީލު ވަނީ ރައީސް މައުމޫންގެ ސަރުކާރުގައި ޖަސްޓިސް މިނިސްޓަރުކަން ކުރައްވާފައެވެ. އަދި ރައީސް ނަޝީދުގެ ވެރިކަމުގައި ސިވިލް އޭވިއޭޝަން މިނިސްޓަރުކަމާއި ރައީސް ވަހީދުގެ ސަރުކާރުގައި ހޯމް މިނިސްޓަރުކަން ވެސް ޖަމީލް ވަނީ ކުރައްވާފައެވެ.
ޕީޕީއެމްގެ ސަރުކާރު ވެރިކަމަށް ގެނައުމަށް ގިނަ މަސައްކަތްޕުޅުތަކެއް ކުރެއްވި ޖަމީލު ރާއްޖެވަޑައިން ބޭރަށް ވަޑައިގެންނެވީ 2015 ވަނަ އަހަރުގެ މެއި މަހުއެވެ. އެމަނިކުފާނު ރާއްޖެއިން ބޭރުގައި ހުންނަވަނިކޮށް، އިތުބާރު ނެތް ކަމުގެ ވޯޓެއް ނަގައި ޖަވާބުދާރީވުމުގެ ފުރުސަތު ދިނުމެއް ނެތި ނާއިބު ރައީސްކަމުގެ މަގާމުން ޖަމީލު ވަކިކުރީ 2015 ވަނަ އަހަރުގެ ޖުލައި މަހުގެ 21 ވަނަ ދުވަހުއެވެ. އޭގެ ފަހުން ތިން އަހަރާއި 4 މަސް ވަންދެން އިނގިރޭސިވިލާތުން ސިޔާސީ ހިމާޔަތް ހޯދަވައިގެން ހުންނެވުމަށް ފަހު ޖަމީލް މާލެ ވަޑައިގަތީ މިދިޔަ އަހަރު އޮކްޓޯބަރު މަހުގެ 7 ވަނަ ދުވަހުއެވެ.
ރައްޔިތުންގެ މަޖިލީހުގެ 78 މެމްބަރުންގެ އަގުލަބިއްޔަތުން ނައިބު ރައީސްކަމުގެ މަގާމުން ޖަމީލު ދުރުކުރެއްވުމަށް ފަހު، އެ މަގާމަށް މަޖިލީހުން އައްޔަން ކުރެއްވީ އޭރުގެ ޓޫރިޒަމް މިނިސްޓަރު އަހުމަދު އަދީބެވެ. އަދީބު އެ މަގާމަށް އައްޔަން ކުރީ ޖަމީލުގެ މައްޗަށް އިތުބާރު ނެތް ކަމުގެ ވޯޓު ފާސްކުރިތާ ޖެހިގެން އައި ދުވަހުއެވެ.
