ހޮނިހިރު ދުވަހު ނިންމާ ނިންމުމުގެ ސަބަބުން ރިޔާސީ އިންތިހާބުގެ ނިންމުމަށް އަސަރު ކޮށްފާނެ: ރައީސް

އަންނަ ހޮނިހިރު ދުވަހު ރައްޔިތުން ނިންމާ ނިންމުމަކީ މުޅި ޤައުމާއި ގުޅިފައިވާ ނިންމުމެއް ކަމަށާއި، އެ ދުވަހު ނިންމާ ނިންމުމުގެ ސަބަބުން ސެޕްޓެމްބަރު މަހުގެ 23 ވަނަ ދުވަހު ރައްޔިތުން ނިންމާފައިވާ ނިންމުމަށް އަސަރު ކޮށްފާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

ކެމްޕޭން ދަތުރުފުޅެއްގައި ނ. ލަންދޫއަށް ވަޑައިގެން ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ސޯލިހް ވިދާޅުވީ އަންނަ ހޮނިހިރު ދުވަހު ރައްޔިތުން ނިންމުން ނިންމަން ވާނީ ވަރަށް ވިސްނެވުމަށްފަހުގައި ކަމަށެވެ. އަދި ނިމުނު ސެޕްޓެމްބަރ މަހުގައި ރައްޔިތުން ނިންމުމެއް ނިންމީ ވަރަށް ގިނަ ކަންތައްތަކަށް ރައްޔިތުން އެދޭތީ ކަމަށާއި، ހޮނިހިރު ދުވަހު ނިންމާ ނިންމުމުގެ ސަބަބުން ސެޕްޓެމްބަރު މަހުގައި ނިންމި ނިންމުމަށް އަސަރު ކޮށްފާނެ ކަމަށް ރައީސް ސޯލިހް ވިދާޅުވި އެވެ.

އެ މޭރުމުން ވާހަކަފުޅުު ކުރިއަށް ގެންދަވަމުން ރައީސް ސޯލިހް ވިދާޅުވީ އެންމެ ދާއިރާއަކުން ނިންމާ ނިންމުމުގެ ސަބަބުން މުޅި ޤައުމަށް އަސަރުކުރާނެ ކަމަށާއި، އެންމެ ވޯޓަކީ ވެސް މުހިންމު ވޯޓެއް ކަމަށެވެ. އެހެންކަމުން ޤައުމުގެ ތަރައްްޤީއާއި، 23 ސެޕްޓެމްބަރުގައި ރައްޔިތުން ނިންމި ނިންމުމަށް ރިއާޔަތް ކުރުމަށް ފަހު ހޮނިހިރު ދުވަހު ރައްޔިތުން ނިންމު ނިންމަވައި ދެއްވުމަށް ރައީސް އިލްތިމާސް ކުރެއްވި އެވެ. އަދި އެމަނިކުފާނު ވަނީ މަނަދޫ ދާއިރާއަށް އެމްޑީޕީގެ ފަރާތުން ވާދަކުރައްވާ އަހުމަދު ހާރޫނަށް ވޯޓު ދެއްވުމަށް ރައްޔިތުންގެ ކިބައިން އެދިވަޑައިގެންފަ އެވެ.

ރައީސް ސޯލިހް ވިދާޅުވީ ހޮނިހިރު ދުވަހު ރައްޔިތުން ނިންމާ ނިންމުން ވެގެންދާނީ ހިޔާނާތާއި، ވައްކަމާއި ފަސާދައަށް އަނެއްކާ ވެސް ފުރުސަތު ދޭނީތޯ ނުވަތަ ނޫންތޯ އެނގިގެންދާނެ ކަމެއް ކަމަށެވެ . އަދި ރައްޔިތުން އަނެއްކާވެސް އެފަދަ ފަރާތްތަކަކަށް ފުރުސަތު ދެއްވާނެ ކަމަށް ގަބޫލުފުޅު ނުކުރައްވާ ކަމަށް ރައީސް ވިދާޅުވި އެވެ.

ލަންދޫގައި ކުރިއަށް ގެންދިޔުމަށް ނިންމާފައިވާ ބައެއް މަޝްރޫއުތަކާއި ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ލަންދޫ ބަނދަރު އަޕްގްރޭޑް ކުރުމުގެ މަޝްރޫއު މި އަހަރުގެ ބަޖެޓްގައި ހިމެނި މަސައްކަތް ފެށޭނެ ކަމަށެވެ. އަދި ލަންދޫ ރައްޔިތުން އެންމެ ބޭނުންވާ ކަންކަމުގެ ތެރޭގައި ރަށުގައި ޒަމާނީ ފެންވަރުގެ މިސްކިތެއް އިމާރާތްކުރުން ހިމެނޭ ކަމަށާއި، އިސްލާމިކް މިނިސްޓްރީއާއި ގުޅިގެން އެ މަސައްކަތް ވެސް ވަރަށް އަވަހަށް ފައްޓަވާނެ ކަމަށެވެ.

އޭގެއިތުރުން ރައީސްގެ ވާހަކަފުޅުގައި ވަނީ ލަންދޫއަކީ ރާއްޖޭގެ ތާރީހް ވަރަށް ބޮޑަށް އެނގިގެންދާ ރަށެއްގެ ގޮތުގައި ފާހަގަ ކުރައްވާފަ އެވެ. އެގޮތުން ލަންދޫގައި ހާއްސަ ތާރީހީ ސަރަހައްދެއްވާއިރު، އެ ސަރަހައްދު ހިމާޔަތްކޮޮށް، ލޯކަލް ޓޫރިޒަމް ފުޅާކުރުމުގެ ފުރުސަތު އެބައޮތް ކަމަށް ރައީސް ވިދާޅުވި އެވެ. އަދި މާފަރު އެއާޕޯޓާއެކުގައި ސަރަހައްދުގެ ފަތުރުވެރިކަން ވަރަށް ބޮޑަށް ކުރިއަރައިގެންދާނެ ކަމަށް ރައީސް ވިދާޅުވި އެވެ.