ބޮޑު އަގުލަބިއްޔަތަކުން ކުރީގެ ރައީސް އަބްދުﷲ ޔާމީނަށް ނޫނެކޭ ބުނެފައިވާ ކަމަށާއި އެމަނިކުފާނު ދެން މަޑުން ހުންނެވުމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އިލްތިމާސް ކުރައްވައިފިއެވެ.
މައްޗަންގޮޅީގެ ދާއިރާތަކަށް ވާދަ ކުރައްވާ އެމްޑީޕީގެ ކެންޑިޑޭޓުންނާ އެކު ބުދަ ދުވަހުގެ ރޭ ބޭއްވި ޖަލްސާއެއްގައި ނަޝީދު ވިދާޅުވީ ވޭތުވެދިޔަ ފަސް އަހަރު އިކޮނޮމިސްޓަކަށް ހެދިގެން ޔާމީން ދެއްކެވި ވާހަކަފުޅުތައް ރައްޔިތުން އަޑު ނަހާ ކަމަށާއި އެކަން އެނގެނީ ރިޔާސީ އިންތިހާބުގައި އެމަނިކުފާނަށް ނާކާމިޔާބު ވެވަޑައިގެންނެވުމުން ކަމަށެވެ.
މައްޗަންގޮޅީ ގިނަ ބަޔަކު ބައިވެރިވި އެ ޖަލްސާގައި ނަޝީދު ވަނީ ބަހުގެ ހޫނު ހަމަލާތަކެއް ޔާމީނަށް ރައްދު ކުރައްވައި، މަޖާޒީ ބަސްތަކުން ފާޑުވިދާޅުވެފައެވެ. އެގޮތުން ތާއިދު ގެއްލުމުން މަޑުން ހުންނެވުމަށް ވިދާޅުވެ، މިސާލެއްގެ ގޮތުގައި ނަޝީދު ވިދާޅުވީ ކުޅިވަރެއްގެ ގޮތުގައި ކުޅޭ "މިއުޒިކަލް ޗެއާސް"ގެ ވާހަކައެވެ.
"... މިވަރު ވީމާ ދެން ރައީސް ޔާމީނަށް ދެން މަޑުމަޑުން ހުންނަވާ. އަޅުގަނޑުމެން މަދުރަސާގައި އުޅޭއިރު ކުޅެމެންނުންތޯ މިއުޒިކަލް ޗެއާސް. ރައީސް ޔާމީން އަޑު އައްސަވައްޗޭ. އޭގައި ވާންޖެހޭ ގޮތަކީ މިއުޒިކް ހުއްޓާލީމަ އިށީންނަން ޖެހޭނީ. ރައީސް ޔާމީން އިށީންނަވާ," ރައީސް ނަޝީދު ވިދާޅުވިއެވެ.
Machangolhi Dhekunu Dhaairage MDP Candidate @ahmhaitham vaahakafulhu dhekkevun
— MDP Secretariat (@MDPSecretariat) April 3, 2019
Mulhi Machangolhi Thilafathah event Kurinbeegey kammathi, Chandhanee magugai kuriah dhanee#Agenda19#EmmengeVoteThilafathah pic.twitter.com/2pqrKMcxBf
ޔާމީން ވެރިކަން ކުރެއްވީ "ގަޓު" ހެއްދެވިގެން ކަމަށާއި އެމަނިކުފާނު އުޅުއްވީ ރައްޔިތުންނަށް ބިރު ދެއްކެވުމަށް ކަމަށް ނަޝީދު ވިދާޅުވިއެވެ. އަދި ވިދާޅުވީ "ގަޓު" ހެއްދެވިގެން ކުރެއްވި ކަމަކީ އަމިއްލަ ނަފްސަށް އަނިޔާ ކުރެއްވުން ކަމަށް އެމަނިކުފާނު ވިދާޅުވިއެވެ.
"ރައީސް ޔާމީން ހިންގެވީ މުޅިން އެހެން މަގެއްގައި. ގަޓު ރައީސް ހެދިވަޑައިގަންނަވާ އަތްފުޅާކޮށް ރަށު ތެރެއަށް ނުކުންނަވައި، މުޅި ރަށު ރައްޔިތުން ބިރު ގެންނެވީމަ، ތިމާ ވަރެއް ނެތި އުޅުއްވީމާ، އެއީ ދެން ވަރަށް ގަޓު ބޭފުޅެއްގެ ގޮތުގައި މަންޒަރު ދައްކަވާން އުޅުއްވީ،" ރައީސް ޔާމީނަށް ބަހުގެ ހަމަލާ ރައްދު ކުރައްވައި ރައީސް ނަޝީދު ވިދާޅުވިއެވެ.
ރައީސް ޔާމީންގެ ވެރިކަމުގައި ހެއްދެވި ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނާ ގުޅޭ ގޮތުން ނަޝީދު ވިދާޅުވީ އެއީ "ހިޔާލި ފޮލާ"އެއް ކަމަށެވެ. ރައީސް ޔާމީންގެ ވިސްނުންފުޅަކީ ރާއްޖޭގެ އަތޮޅުތައް އުވާލައި، ރާއްޖޭގެ ހުރިހާ ރައްޔިތުން މާލެ ސަރަހައްދަށް ގެނެސް، ހިއްކި ބިމަކަށް ޖަމާ ކުރުން ކަމަށް ނަޝީދު ވިދާޅުވިއެވެ.
