ރައްޔިތުންގެ މަޖިލީހަށް ވާދަ ކުރައްވާ އަމިއްލަ ކެންޑިޑޭޓުންގެ ބޮޑެތި އަދަދުތަކުން ހަރަދު ކުރަމުންދާ ކަމަށާއި އެ ކެންޑިޑޭޓުންގެ ފަހަތުގައި އޮތީ ކޮން އަނދިރިގަނޑެއް ކަމެއް ވެސް ނޭނގޭ ކަމަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅު ދައްކަވަމުން އިންތި ވިދާޅުވީ މިހާރު ހިނގަމުންދާ 18 ވަނަ ރައްޔިތުންގެ މަޖިލީހަށް އަމިއްލަ ގޮތުން އިންތިހާބުވި ކެންޑިޑޭޓުން ވެސް "ތިން ހަތަރު" ފަހަރަށް ޕާޓީ ބަދަލު ކުރި ކަމަށެވެ. އަމިއްލަ ގޮތުން ކުރިމަތިލައްވާ ބައެއް ކެންޑިޑޭޓުން އުޅެނީ ވިޔަފާރިއެއް އަމިއްލަ ނަފްސުގައި އަޅުވާލުމަށް ކަަމަށާއި އެފަދަ މީހުން ބޮޑުތި އަދަދުތަކުން އިންތިހާބުތަކުގައި ހަރަދު ކުރަމުންދާ ކަމަށް އިންތި ވިދާޅުވިއެވެ.
އިންތި ވިދާޅުވީ ދުނިޔޭގެ ގައުމުތަކުގައި އަމިއްލަ ގޮތުން ވާދަ ކުރާ ކެންޑިޑޭޓުން މަޖިލީހަށް އިންތިހާބުވަނީ ވަރަށް ކުޑަ ނިސްބަތަކުން ކަމަށާއި ރާއްޖޭގައި އެފަދަ މެމްބަރުން އިންތިހާބުވުމަށްފަހު ބޮޑު އަގުގައި ނަފްސު ވިއްކާލާ ކާމަށެވެ.
"އަޅުގަނޑަކަށް ނޭނގޭ ކޮން އަނދިރިގަނޑެއް ކަމެއް ފަހަތުގައި އޮތީ އަމިއްލައޭ ބުނާއިރުގަ. އެކަމަކު ޕާޓީއަކުން އަންނަ މީހެއް ވެއްޖެއްޔާ، ހާއްސަކޮށް އެމްޑީޕީން އަންނަ މީހެއް ވެއްޖެއްޔާ، ބުނާނެ ސީދާ އެމްޑީޕީގެ މީހެކޭ. މީނައަކީ އެމްޑީޕީގެ މި އައިޑިއޮލޮޖީގެ މީހެކޭ. މި މީހުންގެ ފަލްސަފާ ތަކަކީ މިއޭ،" މާލެ ސިޓީ ތަމްސީލު ކުރައްވާ މަޖިލީހުގެ މެމްބަރުންގެ ތެރެއިން އެންމެ ބޮޑު އަގުލަބިއްޔަތަކުން މަޖިލީހަށް އިންތިހާބުވި އިންތި ވިދާޅުވިއެވެ.
ތިން ވަނަ ދައުރަކަށް މަޖިލީހަށް ކުރިމަތިލައްވާ އިންތި ވިދާޅުވީ އަމިއްލަ ގޮތުން އިންތިހާބުވާ ކެންޑިޑޭޓުން މަޖިލީހުގައި އަމަލު ކުރާ ގޮތާމެދު ފިޔަވަޅު އެޅޭނެ ގޮތެއް ނޯންނަ ކަމަށާއި ނަމަވެސް އެމްޑީޕީން އިންތިހާބުވާ މެމްބަރެއް ނަމަ، އެ މެމްބަރަކާމެދު އަމަލު ކުރާނެ އުސޫލުތަކާއި ޖަވާބުދާރީ ކުރުވާނެ ގޮތްތަކެއް ހުންނަ ކަަމަށެވެ.
ރައްޔިތުންގެ މަޖިލީހަށް 2014 ވަނަ އަހަރު މިނިވަން މެމްބަރުންގެ ގޮތުގައި ފަސް މެމްބަރަކު އިންތިހާބު ކުރިއެވެ. އެ މެމްބަރުންނަކީ ދިއްދޫ ދާއިރާގެ މެމްބަރު އަބްދުއްލަތީފު މުހައްމަދާއި ނައިފަރު ދާއިރާގެ މެމްބަރު އަހުމަދު ޝިޔާމާއި މަހިބަދޫ ދާއިރާގެ މެމްބަރު އަހުމަދު ތޯރިގާއި ނިލަންދޫ ދާއިރާގެ މެމްބަރު ޑރ. އަބްދުﷲ ހަލީލުގެ އިތުރުން މަޑަވެލި ދާއިރާގެ މެމްބަރު މުއާޒު މުހައްމަދެވެ. އެ ހުރިހާ މެމްބަރުން ވެސް ވަނީ މަޖިލީހުގެ ދައުރުގެ މެދުން ޕާޓީތަކާ ގުޅިވަޑައިގެންނެވިއެވެ. އަދި ބައެއް މެމްބަރުން ދެތިން ޕާޓީއަށް ސޮއި ކުރެއްވިއެވެ.
އަލަށް އިންތިހާބު ކުރާ 19 ވަނަ ރައްޔިތުންގެ މަޖިލީހަށް އަމިއްލަ ގޮތުން ވާދަ ކުރާ ކެންޑިޑޭޓުންގެ އަދަދަކީ 221 އެވެ.
