އެކްޓިން ޔޫތު މިނިސްޓަރ އަލީ ވަހީދުގެ ދައުވަތަކަށް ސްޕެއިންގެ ކުރީގެ ފުޓުބޯޅަ ކުޅުންތެރިޔާ ޕަބްލޯ ކޮއިރާ އާއި ޕޯރޗުގަލްގެ ފުޓުބޯޅަ ކުޅުންތެރިޔާ ވައިޓޯރ ގުއަޑްރޯސް ރާއްޖެ އަތުވެއްޖެއެވެ.
ކުރީގެ މިދެ ފުޓުބޯޅަ ކުޅުންތެރިން ރާއްޖެ ގެނެސްފައި ވަނީ ރާއްޖޭގެ ފުޓުބޯޅަ އިތުރަށް ތަރައްގީކޮށް، ބައިނަލްއަގްވާމީ މުބާރާތްތައް ރާއްޖޭގައި ބޭއްވުމަށް ކުރަންޖެހޭ މަސައްކަތް ތަކާއިމެދު މަޝްވަރާކޮށް ޚިޔާލު ހޯދުމަށާއި، ރާއްޖޭގެ އެކި ހިސާބުތަކުގައި ގާއިމް ކޮށްފައިވާ ފުޓުބޯޅަ ދަނޑުތަކުގެ ހާލަތުބަލައި އިތުރަށް ރަނގަޅު ކުރަންވީ ކަންކަން ދެނެގަތުމުގެ ބޭނުމުގައްޔާއި، ކުޅިވަރު ކުރިއަރުވައިގެން ފަތުރުވެރިކަން ރާއްޖޭގައި ކުރި އެރުވުމަށެވެ.
ކޮއިރާ އާއި ގުއަޑްރޯސް ރާއްޖޭގައި ހަތަރު ދުވަސް ހޭދަކުރުމަށް ހަމަޖެހިފައި ވާއިރު، ޔޫތު މިނިސްޓްރީން ކޮށްފައިވާ ޓްވީޓްގައި އެ މިނިސްޓްރީން ބުނެފައި ވަނީ މި ދެ ކުޅުންތެރިންގެ ދަތުރުގައި އެފްއޭއެމްގެ ބޭފުޅުން ވެސް ފުޓުބޯޅަ ދަނޑުތަކަށް ދިއުމުގައި ބައިވެރިވާނެ ކަމަށެވެ. އަދި ފުޓުބޯޅަ ދަނޑުތަކަށް ގޮސް ދަނޑުތައް ބެލުމަށް ފަހު އެ ބޭފުޅުންގެ ޙިޔާލާއި ތަޖުރިބާގެ އަލީގައި އެ ދަނޑުތައް އިތުރަށް ރަނގަޅު ކުރުމަށް މަސައްކަތް ކުރައްވާނެ ކަމަށެވެ.
އަންގާރަ ދުވަހު ނޫސްވެރިންނަށް ދިން ޕްރެސް ކޮންފަރެންސްގައި ޔޫތު މިނިސްޓަރ އަލީ ވަހީދު ވިދާޅުވީ ގަލޮޅު ދަނޑުގެ މަރާމާތަށް ވެސް ގެންނަން ޖެހޭ ބަދަލުތަކާއި ގުޅޭގޮތުން ކޮއިރާ އާއި މަޝްވަރާކޮށް އެކަމުގެ ޓެކްނިކަލް ސަޕޯޓު ހޯދާނެ ކަމަށާއި، ސަރުކާރުގެ ތަސައްވަރަކީ، ގަލޮޅު ރަސްމީ ފުޓުބޯޅަ ދަނޑު، ބައިނަލް އަގްވާމީ ފެންވަރުގެ ދަނޑަކަށް ތަރައްގީކޮށް، އިންޓަނޭޝަނަލް މުބާރާތްތައް ބޭއްވުން ކަމަށެވެ. އަދި އެކަން ކުރުމަށް ތަޖުރިބާކާރުންގެ ވިސްނުން ހޯދާނެ ކަމަށް ވެސް މިނިސްޓަރ ވިދާޅުވިއެވެ.
