ރައްޔިތުންގެ މަޖިލީހުގެ ކުރީގެ ދިއްގަރު ދާއިރާގެ މެމްބަރު އަހްމަދު ނާޒިމްގެ ގޮނޑި ގެއްލުވާލި މައްސަލައިގެ ބަދަލު ހޯއްދަވަން ސިވިލް ކޯޓަށް މައްސަލަ ހުށައެޅުއްވުމުން، އެ މައްސަލަ ބަލައިނުގަންނަން އެ ކޯޓުން ނިންއިފިއެވެ.

ނާޒިމްގެ ގޮނޑި ގެއްލުނީ، މެމްބަރުކަމުގައި ހުންނަވަނިކޮށް އޭނާގެ މައްޗަށް 2015ވަނަ އަހަރު ސާބިތުވީ މަކަރާއި ހީލަތް ހެދުމުގެ މައްސަލައިގައި ސުޕްރީމް ކޯޓުން އުމުރު ދުވަހުގެ ޖަލު ހުކުމެއް އިއްވުމާއި ގުޅިގެންނެވެ. ނަމަވެސް ނާޒިމްގެ ފަރާތުން އެ މައްސަލަ ރިވިއުކުރަން ސުޕްރީމް ކޯޓަށް މިދިޔަ އަހަރުގެ ޑިސެމްބަރު މަހުގެ ތެރޭގައި ހުށައެޅުއްވުމުން ކޯޓުން ވަނީ އޭނާގެ ހުކުމް ބާތިލް ކޮށްފައެވެ.

ގޮނޑި ގެއްލުމުގެ ސަބަބުން އެވީ މުއްދަތުގެ ތެރޭގައި ލިބެން ޖެހޭ މުސާރަ އާއި އިނާޔަތްތައް އަދި ޕެންޝަން ފައިސާ ދޭން ކަނޑައަޅައި ދިނުމަށް އެދި ނާޒިމް އެއްމެ ފުރަތަމަ ސިވިލް ކޯޓަށް ހުށައެޅުއްވީ މިއަހަރުގެ ފެބްރުއަރީ މަހުގެ ތިންވަނަ ދުވަހުގައެވެ. ނަމަވެސް ހަމަ އެ މަހުގެ ދިހަވަނަ ދުވަހު ސިވިލް ކޯޓުގެ ރަޖިސްޓްރަރ ވަނީ މައްސަލަ ބަލައިނުގަތުމަށް ނިންމަވާފައެވެ.

ރަޖިސްޓްރަރ މިހެން ނިންމެވީ، މަތީ ކޯޓަކުން ނިންމާ މައްސަލަތަކުގައި ބަދަލު ދިނުމުގެ އިހްތިސާސް ސިވިލް ކޯޓަށް ނެތްކަމަށް ބުނެއެވެ. ރަޖިސްޓްރަރގެ ނިންމުން ރިވިއުކޮށްދިނުމަށް އެދި ސިވިލް ކޯޓުގެ އިސް ގާޒީއަށް ހުށައެޅުއްވުމުން، މާޗް 25ވަނަ ދުވަހު ގާޒީ ނިންމެވީ ރަޖިސްޓްރަރގެ ނިންމުން ރަނގަޅު ކަމަށެވެ.

އަންނަ ހޮނިހިރު ދުވަހު އޮންނަ ރައްޔިތުންގެ މަޖިލީހުގެ އިންތިހާބުގައި ވާދަކުރައްވަން ނާޒިމް ނިންމަވާފައިވާ އިރު، މިފަހަރު ވެސް ކުރިމަތިލައްވަނީ ދިއްގަރު ދާއިރާއަށެވެ. ނާޒިމްގެ ގޮނޑިގެއްލުމަށް ފަހު ބޭއްވި ބައި-އިލެކްޝަން ކާމިޔާބު ކުރެއްވުމަށް ފަހު މިހާރު އެ ދާއިރާގެ މެމްބަރަކަށް ހުންނެވީ ފާރިސް މައުމޫނެވެ.