މި ސަރުކާރު އިންތިހާބުކޮށްފައިވަނީ ރައްޔިތުންގެ ގިނަ ކަންބޮޑުވުންތައް ހައްލުކޮށްދޭނެ ވައުދާއެކުގައި ކަމަށާއި އެ ވައުދުތައް ހަޤީޤަތަކަށްވުމުގެ އިންތިޒާރުގައި ފަސް އަހަރު ރައްޔިތުން ތިބެންޖެހުމަކީ ހެޔޮވެރިކަމެއްގެ ސިފައެއް ނޫން ކަމަށް ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.
އާދިއްތަ ދުވަހު ހއ. ދިއްދޫގައި އޮތް ޖަލްސާގައި ވާހަކަފުޅު ދައްކަވަމުން ރައީސް ސޯލިހް ވިދާޅުވީ މިދިޔަ ސަރުކާރުގައި ރައްޔިތުންގެ ހައްޤުތަކަށް އެންމެ ބޮޑަށް އަރައިގެންފައިވަނީ އެ ރައްޔިތުން އެންމެ ބޮޑަށް ބޭނުންވާ ކަންކަމުގައި ކަމަށެވެ. އެ ކަމަކީ އެއީ ބޯހިޔާވަހިކަމުގެ މައްސަލަކަން ފާހަގަ ކުރައްވާ ރައީސް ވިދާޅުވީ ނާޖާއިޒު ގޮތަކަށް ހައްޤު ނޫން ގޮތެއްގައި ފްލެޓްތައް މިދިޔަ ސަރުކާރުން ބަހާފައިވާ ކަމަށެވެ.
"މިދިޔަ ސަރުކާރުގައި ރައްޔިތުންގެ ހައްޤުތަކަށް އަރައިގެންފައި ވަނީ އެ ރައްޔިތުން އެންމެ ބޮޑަށް އަދި ފުރިހަމައަށް ބޭނުންވާ ކަންކަމުގައި. މި ދެންނެވީ ބޯހިޔާވަހިކަމުގެ މައްސަލަ. ވަރަށް ނާޖާއިޒު ގޮތެއްގައި ހައްޤުނޫން ބަޔަކަށް ފްލެޓްތައް ވަނީ ބަހާލާފައި. ރައްޔިތުން އާދޭސް ކޮށްކޮށް ތިއްބާ އެކަން ކުރެވިގެން ދިޔައީ. އަޅުގަނޑުމެން މި އަންނަނީ އެ މައްސަލަތައް ބަލަމުން. އަޅުގަނޑު ތިބޭފުޅުންނަށް ޔަޤީންކަން މި އަރުވަނީ ދައުރު ނިމޭއިރު އިރާދަ ކުރެއްވިއްޔާ ބޯހިޔާވަހިކަން ބޭނުންވާ ހުރިހާ ދިވެހި ރައްޔިތުންނަށް ބޯހިޔާވަހިކަން ހޯދައިދޭނެ ވާހަކަ" ރައީސް ސޯލިހް ވިދާޅުވިއެވެ.
އަސާސީ ގިނަ ހައްޤުތަކުން ރައްޔިތުން މަހްރޫމް ކުރެވިފައިވާ ކަމަށާއި ސާފު ބޯފެނާއި ނަރުދަމާގެ ނިޒާމާއި ރައްކާތެރި ގޮތުގައި ކުނި ނައްތާލެވޭނެ ނިޒާމެއް ނެތްކަން ރައީސް ސޯލިހް ވަނީ ފާހަގަ ކުރެއްވިއެވެ. އަދި އެއީ ކަންބޮޑުވާންޖެހޭ ކަމެއް ކަމަށް ރައީސް ވިދާޅުވިއެވެ.
މަސްވެރިންނާއި ދަނޑުވެރިންނަށް މާލީ އިދާރާތަކުން އަދި ބޭންކުތަކުން ލޯނު ނެގުމާއި ކްރެޑިޓް ސްކީމްގައި ބައިވެރިވެވޭނެ އިންތިޒާމްތައް ހަމަޖެއްސި، އެ ސްކީމްގެ ދަށުން މިހާތަނަށް 208 މަސްވެރިން ބޭންކް އޮފް މޯލްޑިވްސްގެ މަސްވެރިޔާ އެކައުންޓްގައި ހިމެނިފައިވާ ކަމަށް ރައީސް އިތުރަށް ވިދާޅުވިއެވެ.
ރައީސް ސޯލިހް ވިދާޅުވީ ދިއްދޫގައި ރަސްމީ ފާލަން އެޅުމަށް ބަޖެޓްގައި ހިމަނާ އެ ފާލަން ޑިޒައިން ކުރުމުގެ މަސައްކަތް ކުރިއަށްދާ ކަމަށާއި އެ ރަށުގައި ފުޓްބޯޅަ ދަނޑު އެޅުމުގެ މަސައްކަތް ފެށިގެންދާނެ ކަމަށެވެ. އަދި ދިއްދޫ ތަރައްޤީ ކުރުމަށްޓަކައި ޕްލޭންގައި ގިނަ ކަންތައްތަކެއް އެބަހުރި ކަމަށް އެމަނިކުފާނު ފާހަގަ ކުރެއްވިއެވެ.
