ގެދޮރު ބިނާކުރަން ބޭނުންވާ ލޯނު އެޖެންޑާ 19 އިން ލިބިގެންދާނެ: ރައީސް ނަޝީދު

އެޖެންޑާ 19 އިން ބޯހިޔާވަހިކަން ބޭނުންވާ ކޮންމެ މީހަކަށް ގެ ހެދުމަށް ލޯނު ލިބިގެންދާނެ ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ކެލާ ދާއިރާގެ އެމްޑީޕީގެ ކެނޑިޑޭޓް އިބްރާޙިމް ޝަރީފްގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ކެލާ ދާއިރާގެ ރައްޔިތުން ބޯހިޔާވަހި ކަމަކަށް ނުހަނު ބޭނުންވެފައިވާ ކަމަށެވެ. އެކަން އެޖެންޑާ 19 އިން ކެލާގެ ރައްޔިތުންނަށް މަގުފަހިވެގެންދާނެ ކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ އެޖެންޑާ 19 އިން ކެލާ ދާއިރާގައި ވެސް ބޯހިޔާވަހި ކަމަށް ބޭނުންވެ ގެދޮރު ބިނާ ކުރުމަށް ބޭނުންވާ، ލޯނު ލިބޭނެ ގޮތް ހަމަޖެހިގެންދާނެ ކަމަށެވެ.

ރައީސް ނަޝީދު ވިދާޅުވީ ގެސްޓް ހައުސްގެ ވިޔަފާރިއަކީ ކެލާ ދާއިރާގައި ކުރިއެރުވިދާނެ ވިޔަފާރިއެއް ކަމަށާއި، އެޖެންޑާ 19 އިން އެކަން ވާނެ ކަމަށެވެ. ލޯކަލް ކައުންސިލްގެ ގާނޫނަށް އިސްލާހު ގެނެވި ގްރީން ޓެކްސް ނަގަން ފަށައި، އެ ފައިސާ ސީދާ ކައުންސިލަށް ލިބޭނެ ގޮތް އެޖެންޑާ 19 އިން ހަމަޖެހިގެންދާނެ ކަމަށެވެ. އެގޮތަށް ކަންތައްތައް މަގުފަހިވެގެން ދިއުމުން، ގެސްޓް ހައުސް ވިޔަފާރީގެ މަންފާ ކެލާގެ ރައްޔިތުންނަށް ، މި ދާއިރާއަށް އިތުރު ތަރައްގީއާއި ކުރިއެރުން ލިބިގެންދާނެ ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ ރާއްޖޭގެ ރައްޔިތުންގެ އުއްމީދާއި ގުޅިފައިވާ ޕާޓީއަކީ އެމްޑީޕީކަން ކޮންމެ އިންތިޚާބެއްގެ ނަތީޖާއަކުން ފެންނަމުން އަންނަ ކަމަށެވެ. ރާއްޖޭގެ ރައްޔިތުން އެދޭ ހެޔޮ ބަދަލު، އެ ރައްޔިތުންނަށް ލިބިގެންދާނީ 19 ވަނަ ރައްޔިތުންގެ މަޖިލީހުގެ މެޖޯރިޓީ ލިބިގެން ކަމަށެވެ.

އެމްޑީޕީއަށް ރައްޔިތުންގެ ތާއީދު އެއްދުވަހުން އަނެއް ދުވަހަށް އިތުރުވަމުން އަންނަ ކަމަށް ވެސް އެމަނިކުފާނު ވިދާޅުވިއެވެ.

ރާޢްޖޭގެ ރައްޔިތުންނަށް 2008 ވަނަ އަހަރުން ފެށިގެން އެންމެ ގިނައިން ވޯޓް ކަރުދާސްކޮޅެއްގައި ފެނިފައިވާނީ ތިލަފަތެއް ކަމަށާއި، މި ފަހަރު ވެސް ތިލަފަތައް ވޯޓް ދެއްވުމަށް ރައީސް ނަޝީދު ވަނީ އެދިވަޑައިގެންފައެވެ.