އިންތިހާބު ފަސްކުރުމުގެ ޗަރުކޭހުގަ އެމްޑީޕީން ބައިވެރިއެއްނުވާނެ : އަފްޝަން

ކުރިއަށް އޮތް މަޖިލިސް އިންތިހާބު ފަސްކުރުމަށް އިދިކޮޅު ފަރާތްތަކުން ދައްކަވާ "ޗަރުކޭހުގައި" އެމްޑީޕީން ބައިވެރިނުވާނެ ކަމަށް އެޕާޓީން ބުނެފިއެވެ.

އާދިއްތަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ޑެޕިއުޓީ ސެކްރެޓަރީ ޖެނެރަލް އަފްޝަން ލަތީފް ވިދާޅުވީ، އިނދިކޮޅު ފަރާތްތަކުން އަބަދުވެސް އިންތިހާބު ފަސްކޮށް އިންތިހާބުތަކަށް ނުފޫޒު ފޯރުވުމަށް މަސައްކަތް ކުރާ ކަމަށާއި، އެފަދަ ކަންކަމަށް އެމްޑީޕީން އެއްބާރުލުން ނުދޭނެ ކަމަށެވެ.

" އަޅުގަނޑުމެން ފާހަގަކުރަން ބޭނުންވަނީ ކުރީގައި ވެސް އަޅުގަނޑުމެން ދަންނަވާފައިވާ ފަދައިން އިންތިހާބު ލަސްކުރުމާއި، އިންތިހާބަށް ނުފޫޒު ފޯރުވައި މިފަދަ ކަންތައްތައް ކުރުމަކީ އެބޭފުޅުން އާންމުކޮށް ކުރައްވާ ކަންތައްތަކެއް، އެއީ މަކަރާއި ހީލަތް ހެދުމަށް ފުރުސަތު ހޯދުމަށާއި، އިންތިހާބުގެ އެކިއެކި ކަންކަމަށް އެބޭފުޅުން ނާޖާއިޒް ގޮތުގައި ނުފޫޒު ފޯރުވާ، އިންތިހާބުން ބަލިވާން ފެށީމަ އަބަދު ވެސް އެބޭފުޅުން ކުރައްވަމުން ގެންދަވާ ކަންތައްތަކެއް، ދެން އެބޭފުޅުން ވިސްނުން މި ހުންނަނީ ތިމަންނަމެން މޮޅުވަންދެން އިންތިހާބު ފަސްކުރުމާއި، އިންތިހާބުގެ ކަންތައްތަކަށް ނުފޫޒު ފޯރުވުމާއި، މިފަދަ ކަންތައްތައް ކުރެއްވުމަކީ އަޅުގަނޑުމެންނަށް ކުރީގައި ވެސް ފެނިފަވާ ކަންތައްތައް ކަަމަށް އަދި އިލެކްޝަންސް ކޮމިޝަނުން ވެސް މިއަދު އެކަމަށް ފުރުސަތު ނުދެއްވާނެކަން ވިދާޅުވެފައިވާތީ އަޅުގަނޑުމެން އެކަން ބަލައިގަނެ، އަޅުގަނޑުމެން އިލެކްޝަންސް ކޮމިޝަނުގަ ތަކުރާރުކޮށް އެދި މި ދަންނަވަނީ ތާވަލު ކޮށްފައިވާ ތާރިޚުގައި އިންތިހާބު ބޭއްވުމަށް، އަދި މި އިންތިހާބު ފަސްކުރުމުގެ ޗަރުކޭހުގަ އެމްޑީޕީން އެއްގޮތަކަށް ވެސް ބައިވެރި ނުވާނެ ކަމަށް އަޅުގަނޑުމެން ދަންނަވަން" އަފްޝަން ވިދާޅުވިއެވެ.

އަފްޝަން އެހެން ވިދާޅުވެފައިވާއިރު، އިދިކޮޅު ފަރާތްތަކުން އިންތިހާބު ފަސްކުރުމަށް މަސައްކަތްކުރާކަމުގެ އަޑުތައް އިވިވަޑައިގެންފައިވާ ކަމަށާއި، އެކަމަށް ސަމާލުވެ ހުންނެވި ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވެސް ވަނީ ވިދާޅުވެފައެވެ. އަދި އެއީ ޕީޕީއެމުން ވެރިކަމުގައި އޮތް އިރު ވެސް މަސައްކަތް ކުރެއްވި ގޮތް ކަމަށާއި، ނަމަވެސް އެކަމަށް ހުންނެވީ ވަރަށް ބޮޑަށް ސަމާލުވެ ކަމަށް ވެސް ރައީސް ވިދާޅުވި އެވެ.