ބައިނަލްއަގުވާމީ އަންހެނުންގެ ދުވަސް ފާހަގަ ކުރުމުގެ ގޮތުން މޯލްޑިވްސް ލައިފްގާޑް އެސޯސިއޭޝަނުން އިންތިޒާމުކޮށްގެން ކުރިއަށް ގެންދިޔަ "ބްރޭކް ދަ ބެރިއަރ" ފެތުމުގެ ހަރަކާތް ކާމިޔާބު ކަމާއެކު ނިންމާލައިފިއެވެ.
މޯލްޑިވްސް ލައިފްގާޑް އެސޯސިއޭޝަނުން އިންތިޒާމުކޮށްގެން ކުރިއަށް ގެންދިޔަ ހަތް ކިލޯ މީޓަރުގެ މި ފެތުމުގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދާއި ސަރުކާރުގެ ބައެއް އަންހެން ވަޒީރުންގެ އިތުރުން އެކި އުމުރުފުރާތަކުން 100 އަށް ވުރެން ގިނަ އަންހެން ކަނބަލުން ބައިވެރިވެފައި ވެއެވެ.
އަންހެނުންނަށް ޚާއްޞަކޮށްގެން ބޭއްވި މި ފެތުން ފަށާފައި ވަނީ މިއަދު ހަވީރު މާލެ އަތޮޅު ފުނަދޫއިންނެވެ. މި ހަރަކާތަކީ ޢާންމުކޮށް ހުޅުވާލައިގެން ކުރިއަށްގެންދިޔަ ޙަރަކާތެކެވެ. މި ޙަރަކާތް ކުރިއަށްދިޔަ ވަގުތު ފެތުންތެރިންގެ ސަލާމަތާއި ރައްކާތެރިކަން ކަށަވަރުކުރުމައްޓަކައި ސިފައިން އެ ސަރަހައްދުގައި ހަރަކާތްތެރިވެފައި ވެއެވެ.
ފެތުންތެރިން ފަތާފައި އައިސް މާލެ އެރި ވަގުތު ރައީސުލް ޖުމްހޫރިއްޔާ އިބްރާހީމް މުޙަންމަދު ސާލިހް ވަނީ އެ ސަރަހައްދަށް ވަޑައިގެން ފެތުންތެރިންނާ ބައްދަލުކުރައްވައި މަރުޙަބާ ވިދާޅުވެފައެވެ. އަދި ގިނަ ޢަދަދެއްގެ ޢާންމުން ވެސް ވަނީ އެ ސަރަހައްދަށް އެއްވެ މިޙާރަކާތުގެ ބައިވެރިންނަށް ހިތްވަރުދީފައެވެ.
ސަރުކާރާއި އަމިއްލަ ޖަމިއްޔާތަކުން އަންނަނީ ބައިނަލްއަގުވާމީ އަންހެނުންގެ ދުވަސް ފާހަގަ ކުރުމުގެ ގޮތުން ގިނަ ހަރަކާތްތަކެއް ހިންގަމުންނެވެ. މި ހަރަކާތްތަކުގައި ސަރުކާރުގެ އަންހެން މިނިސްޓަރުންނާއި، އިސް މަޤާމުތަކުގައި ތިއްބެވި ކަނބަލުންގެ އިތުރުން، އެކި ދާއިރާތަކުން ހިދުމަތްކޮށްދެއްވާފައިވާ އަދި ހިދުމަތް ކޮށްދެމުން އަންނަ ކަނބަލުން ބައިވެރިވެފައި ވެއެވެ.
