މިއަހަރު ތެރޭގައި 35 ރަށެެއްގެ ފެނާއި ނަރުދަމާ ނިޒާމުގެ މަސައްކަތް ފަށާނީ
28 މާރިޗު 2019 | ބުރާސްފަތި 14:32ފެނާއި ނަރުދަމާ ޑިޒައިން ކޮށްދޭން ފަރާތެއް ހޯދުމަށް ވަނީ ހުޅުވާލާފައި
ރަށެއްގައި ހޮޅިއެއް ވަޅުލުމަށް ވަޅުގަނޑެއް ކޮނެފައި
މިއަހަރު ތެރޭގައި 35 ރަށެއްގެ ފެނާއި ނަރުދަމާ ނިޒާމުގެ މަސައްކަތް ފަށަން ހަމަޖެހިފައިވާ ކަމަށް ފިނޭންސް މިނިސްޓްރީން ބުނެފިއެވެ.
މި މަޝްރުއޫ ކުރިޔަށް ގެންދަން ހަމަޖެހިފައިވަނީ އިންޑިއާގެ އެގްޒިމް ބޭންކް އިން ދީފައިވާ 800 މިލިއަން ޑޮލަރުގެ ކްރެޑިޓް ފެސިލިޓީގެ ދަށުންނެވެ. މި އެއްބަސްވުމުގައި ސޮއި ކޮށްފައިވަނީ މި މަހުގެ 18 ވަނަ ދުވަހުއެވެ. ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު އިބްރާހީމް އަމީރްއެވެ. އިންޑިއާގެ ފަރާތުން ސޮއިކުރެއްވީ އެކްޒިމް ބޭންކްގެ ޗީފް ޖެނެރަލް މެނޭޖަރ ސުދައްތާ މަންޑަލްއެވެ. އެ ފައިސާއިން ރަށްރަށުގެ ނަރުދަމާ ނިޒާމު ގާއިމްކުރުމަށް ބޭނުން ކުރަން ހަމަޖެހިފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވަނީ ވިދާޅުވެފައެވެ.
މިއަހަރު ތެރޭ ފެނުގެ މަޝްރޫއު ފެށުމަށް ހަމަޖެހިފައިވާ ރަށްތަކަކީ: ހއ. ފިއްލަދޫ، ނ. ކެނދިކޮޅުދޫ، އދ. ދިގުރަށް، ފ. މަގޫދޫ، ގއ. މާމެންދޫ، ހއ. ކެލާ، ރ. އިނގުރައިދޫ، ވ. ފެލިދޫ، ދ. ބަނޑިދޫ، ގދ. ފިޔޯރީ، ހއ. ބާރަށް، ބ. ކެންދޫ، ވ. ފުލިދޫ، ދ. މީދޫ، ގދ. މަޑަވެލި، ހދ. ވައިކަރަދޫ، ޅ. ކުރެންދޫ، ވ. ތިނަދޫ، ތ. ކިނބިދޫ، ގދ. ފަރެސް މާތޮޑާ، ހދ. މަކުނުދޫ، ކ. ގާފަރު، މ.ކޮޅުފުށި، ލ. މާމެންދޫ، ށ. ފުނަދޫ، ކ.ކާށިދޫ މ. މަޑުއްވަރީ، ލ. މާބައިދޫ، ނ.މަނަދޫ، އއ.މާޅޮސް، ފ. ދަރަނބޫދޫގެ އިތުރުން ހއ. ގެމަނަފުށިއެވެ.
ނަރުދަމާގެ މަސައްކަތް މި އަހަރު ފެށުމަށް ހަމަޖެހިފައިވާ ރަށްތަކަކީ:
ހއ. ފިއްލަދޫ، ނ. ކެނދިކޮޅުދޫ، އއ.މާޅޮސް، މ.މަޑުއްވަރި، ތ. ކިނބިދޫ، ހއ.ކެލާ، ރ.އިނގުރައިދޫ، އއ.ދަނގެތި، ފ.ދަރަނބޫދޫ، ލ. މާބައިދޫ، ހދ. ވައިކަރަދޫ، ކ.ގާފަރު، އދ. ދިގުރަށް، ފ. މަގޫދޫ، ގދ. ފަރެސް މާތޮޑާ، ށ. ކޮމަންޑޫ، އއ. ތޮއްޑޫ އާއި ވ. ތިނަދޫގެ އިތުރުން ދ. ބަނޑިދޫގައެވެ.
ތިރީސް ތިން ރަށެއްގެ ފެނާއި ނަރުދަމާގެ މަސައްކަތް ޑިޒައިން ކޮށްދޭނެ ފަރާތެއް ހޯދަން ފިނޭން މިނިސްޓްރީ ވަނީ އިއުލާން ކޮށްފައެވެ. އެގޮތުން ފެނާއި ނަރުދަމާގެ ޑިޒައިން ގާއިމް ކުރާ 23 ރަށަކާއި ފެނުގެ ހިދުމަތް ޑިޒައިން ކުރާނެ 15 ރަށެއް މީގެ ތެރޭގައި ހިމެނޭ ކަމަށް އެ މިނިސްޓްރީން ބުންޏެވެ. އަދި މީގެ އިތުރުުން 11 ރަށެއްގައި ފެނުގެ ނިޒާމާއި 8 ރަށެއްގައި ނަރުދަމާ ނިޒާމު ގާއިމްކޮށްދޭނެ ފަރާތްތައް ހޯދަން ބިޑަށް ހުޅުވާލާފައިވާ ކަމަށް ވެސް ފިނޭންސް މިނިސްޓްރީން ބުންޏެވެ.
