ރޮކެޓް ހަަމަލާތަކުގެ ބަދަލުގައި އިސްރާއީލުން ޣައްޒާއަށް ވައިގެ މަގުން ހަމަލާތަކެއް
26 މާރިޗު 2019 | އަންގާރަ 04:37އިސްރާއީލަށް އެރި ރޮކެޓް ހަމަލާގެ ޒިންމާ އެއްވެސް ޖަމާއަތަކުން ނުނަގާ
ރޮކެޓް ހަމަލާއަށް ފަހު އިސްރާއީލުގެ އަސްކަރީ މަތިންދާ ބޯޓުތަކުންވަނީ ޣައްޒާއަށް ވައިގެ މަގުން އެތައް ހަމަލާތަކެއް ދީފައި
ތެލްއަވީވްގެ އުތުރުގެ ސަރަހައްދެއްގެ ގެއަށް ރޮކެޓް ހަމަލާއެއްް އެރިތާ ގަޑިއިރުތަކެއްގެ ތެރޭގައި އިސްރާއީލުން ޣައްޒާގައި ހުރި ހަމާސް ޖަމާއަތުގެ އަމާޒުތަކަށް ވައިގެ މަގުން ރައްދުގައި ހަމަލާތަކެއް ދީފިއެވެ.
އިސްރާއީލް ޑިފެންސް ފޯސް(އައިޑީއެފް)އިން ބުނީ ހަމަލާ ދިން ތަންތަނުގެ ތެރޭގައި ހަމާސްގެ ސިޔާސީ ލީޑަރުގެ އޮފީހާއި، އެ ޖަމާއަތުގެ އަސްކަރީ އިންޓެލިޖެންސް އިދާރާގެ ހެޑްކުއާޓަރ ހިމެނޭ ކަމަށެވެ.
ޣައްޒާގެ ހެލްތު މިނިސްޓްރީން ބުނީ އެ ހަމަލާތަކުގައި ހަތް މީހަކު ޒަޚަމްވެފައިވާ ކަމަށެވެ.
އިސްރާއީލުގެ މިޝްމަރަތްއަށް އެރި ރޮކެޓް ހަމަލާގައި ވެސް ހަތް މީހަކު ޒަޚަމްވެފައިވާއިރު އިސްރާއީލް ޑިފެންސް ފޯސްއިން އެ ހަމަލާގެ ތުހުމަތު ކުރަނީ ޣައްޒާގެ ކޮންޓްރޯލް އޮންނަ ހަމާސް ޖަމާއަތެވެ.
"އިސްރާއީލަކުން މިކަން ތަހައްމަލެއް ނުކުރާނެ، އަޅުގަނޑު މިކަން ތަހައްމަލު ކޮށްގެން ނުހުންނާނަން" އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ނޫސްވެރިންނާ ވާހަކަ ދައްކަވަމުން ވިދާޅުވިއެވެ.
ނަތަންޔާހޫ މިވާހަކަފުޅު ވިދާޅުވެފައިވަނީ، 1967ގެ ހަ ދުވަހުގެ ހަނގުރާމައިގައި އިސްރާއީލުން ސީރިޔާގެ އަތުން ހިފާފައިވާ ގޯލާނުގެ އުސްބިންތަކަކީ އިސްރާއީލުގެ އިހްތިސާސްގެ ތެރޭގައި ހިމެނޭ ސަރަހައްދެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ރަސްމީކޮށް ބަލައިގަތުން ފާހަގަ ކުރުމަށް ވޮޝިންގޓަންގައި ބޭއްވި ރަސްމިއްޔާތެއްގައެވެ.
ނަތަންޔާހޫވަނީ ދަތުރުފުޅު ކުރުކޮށްލެއްވި ކަމަށް އިއުލާނުކުރައްވާފައެވެ.
އެމެރިކާގެ ރައީސް ޑޮނަލްޑް ޓްރަމްޕްވަނީ އިސްރާއީލަށް ދިން ހަމަލާ ކުށްވެރި ކުރައްވައި އިސްރާއީލަށް އެ ގައުމުގެ ދިފާއު ކުރުމުގެ ހައްގު ލިބިގެންވާ ކަމަށް ވިދާޅުވެފައެވެ.
އިސްރާއީލަށް އަރާފައިވާ ރޮކެޓް ހަމަލާގެ ޒިންމާ އަދި އެއްވެސް ޖަމާއަތަކުން އުފުލާފައެއް ނުވެއެވެ. ނަން ހާމަ ކުރުމަށް ނޭދޭ ހަމާސްގެ އޮފިޝަލަކު ވިދާޅުވެފައިވަނީ އެ ޖަމައާތުން އެފަދަ ކަމެއް ކުރުމުގެ ޝައުގެއް ނެތް ކަމަށެވެ.
