ކުރިއަށް އޮތް 2 އަހަރުގެ ތެރޭގައި 100 އަށް ވުރެ ގިނަ އިލެކްޓްރީޝަނުން ތަމްރީނު ކުރެވޭނެ: މުޢުނީ

ކުރިއަށް އޮތް 2 އަހަރުގެ ތެރޭގައި 100 އަށް ވުރެ ގިނަ އިލެކްޓްރީޝަނުން ތަމްރީން ކުރެވޭނެ ކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ މެނޭޖިންގް ޑިރެކްޓަރ ހަސަން މުޢުނީ ވިދާޅުވެއްޖެއެވެ.

ސްޓެލްކޯއާއި ޓެކްނިކަލް އެންޑް ވޮކޭޝަނަލް އެޑިއުކޭޝަން އެންޑް ޓްރޭނިންގ އޮތޯރިޓީ (ޓިވެޓް އޮތޯރިޓީ)އާއެކު ފަހުމުނާމާއެއްގައި ސޮއިކުރުމަށް އާދިއްތަ ދުވަހު ސްޓެލްކޯގައި ބޭއްވި ރަސްމިއްޔާތެއްގައި ވާހަކަ ދައްކަވަމުން މުޢުނީ ވިދާޅުވީ، ސްޓެލްކޯއިން ބޭނުންވާ ގޮތަށް ސިލަބަސްތައް ތައްޔާރު ކުރުމަށް ޓިވެޓް އޮތޯރިޓީން އެހީތެރިކަން ދޭނެ ކަމަށާއި، ކުރިއަށްއޮތް 2 އަހަރުގެ ތެރޭގައި 100 މުވައްޒަފުން ތަމްރީނު ކުރެވޭނެ ކަމަށެވެ.

އަދި މި ފަހުމުނާމާގެ ސަބަބުން ދެފަރާތުން ގުޅިގެން ކުރާ މަސައްކަތްތައް އިތުރު ހަރުފަތަކަށް ދާނެ ކަމަށާއި، ސަރުކާރުން ޓެކްނިކަލް ދާއިރާގެ މުވައްޒަފުން ތަމްރީނު ކުރުމަށް ކުރާ މަސައްކަތްތަކަށް އިތުރު ކުރިއެރުމެއް ލިބިގެންދާނެ ކަމަށްވެސް މުޢުނީ ވިދާޅުވިއެވެ.

" ރާއްޖޭގެ އެންމެ ގިނަ ޓެކްނިކަލް މީހުން ބޭނުންވާ އެއް ދާއިރާއަކީ، އެއް އިދާރާއަކީ ސްޓެލްކޯ، އަޅުގަނޑުމެން ވަރަށް ގިނަ ޓެކްނިކަލް މުވައްޒަފުން މިކޮޅުގަ އެބަ ބޭނުން ކުރަން . ދިވެހިރާއްޖެއަށް އިލެކްޓްރިސިޓީގެ ޚިދުމަތްތައް ދިނުމަށްޓަކައި، ޓިވެޓް އޮތޯރިޓީއާ އެއްކޮށް އަޅުގަނޑުމެން މި ސޮއިކުރި ފަހުމުނާމާއާ އެއްކޮށް އަޅުގަނޑުމެންނަށް އަޅުގަނޑުމެންގެ ޚާއްސަ ބޭނުންތަކަށް ބޭނުންވާ ސްޓާފުން ތަމްރީނު ކުރުމަށް އިތުރު ފުރުސަތު ތަކެއް ލިބިގެންދާނެ" މުޢުނީ ވިދާޅުވިއެވެ.

މި ފަހުމުނާމާގައި ސްޓެލްކޯގެ ފަރާތުން މުޢުނީ ސޮއި ކުރެއްވިއިރު، ޓިވެޓް އޮތޯރިޓީގެ ފަރާތުން ސޮއި ކުރެއްވީ މިނިސްޓަރ އޮފް ސްޓޭޓް ފޯރ ހަޔަރ އެޑިއުކޭޝަން މުހައްމަދު ހާޝިމްއެވެ.

މި ހަފްލާގައި ނެޝަނަލް ލެވެލް 3 އިން އިލެކްޓްރީޝަން ކޯސްވެސް އިފްތިތާހު ކުރައްވާފައިވާއިރު، މި ރަސްމިއްޔާތުގައި ވާހަކަ ދައްކަވަމުން ހާޝިމް ވިދާޅުވީ، މިފަދަ އެއްބަސްވުމެއް ދެފަރާތުގެ މެދުގައި ވުމަކީ އުފާވާ ކަމެއް ކަމަށާއި، ކުރިއަށް އޮތް ތަނުގައި ދެފަރާތުން ކުރާ މަސައްކަތްތަކަށް އިތުރު ކުރިއެރުމެއް އަންނާނެ ކަމަށެވެ.