ބިދޭސީން ގެނައުމަށް ފަހު އިހުމާލުވެފައިވާ 67 ފަރާތްތަކާމެދު ފިޔަވަޅު އަޅަނީ
ބިދޭސީ މަސައްކަތްތެރިން ގެނައުމަށްޓަކައި ކޯޓާ ހޯދުމަށް އޮޅުވާލުމުގެ ނިޔަތުގައި އަމަލުތައް ހިންގާފައިވޭ: އިމިގްރޭޝަން
ރާއްޖޭގައި މަސައްކަތް ކުރާ ބިދޭސީން ތަކެއް
ބިދޭސީން ގެނައުމަށް ފަހު ޒިންމާތައް އިހުމާލުވެފައިވާ 67 ފަރާތްތަކުގެ މައްސަލައެއް ތަހުގީގް ކުރަމުންދާ ކަމަށް މޯލްޑިވްސް އިމިގްރޭޝަން އިން ބުނެފިއެވެ.
ބުރާސްފަތި ދުވަހު އިމިގްރޭޝަން އިން ނެރުނު ބަޔާނެއްގައި ބުނީ، ބިދޭސީ މަސައްކަތްތެރިން ދިވެހިރާއްޖެ އަށް ގެނައުމުގެ މަރުހަލާގައި ގަވާއިދާ ހިލާފު ގިނަ ކަންތައްތަކެއް ކޮށްފައިވާ ކަމަށް ތުހުމަތުކުރެވުމާއި އަދި ބިދޭސީން ގެނައުމަށް ފަހު ޒިންމާތައް އަދާކުރުމުގައި އިހުމާލުވެފައިވާ ކަމަށް ފާހަގަކުރެވުމާއި ގުޅިގެން، މިއަހަރުގެ މިހާތަނަށް 67 ފަރާތެެެއްގެ މައްސަލަަ ތަހްގީގް ކުރަމުންދާ ކަަމަށެވެ.
ތަހުގީގް މަރުހަލާގައި މިހާތަނަށް ކަންތައްތަކެއް ފާހަގަ ކުރެވިފައިވާ ކަމަށް އިމިގްރޭޝަން އިން ބުންޏެވެ. އޭގެ ތެރޭގައި ބިދޭސީ މަސައްކަތްތެރިން ގެނައުމަށްޓަކައި ކޯޓާ ހޯދުމަށް އޮޅުވާލުމުގެ ނިޔަތުގައި އަމަލުތައް ހިންގާފައިވެއެވެ. ސައްހަ ނޫން ލިޔެކިޔުންތައް ހުށައަޅާފައިވުމާއި، މަސައްކަތްތަކާއި މަޝްރޫއުތަކަށް ބޭނުންވާ އަދަދަށްވުރެ އިތުރުން ބިދޭސިން ގެނައުމުގެ ހުއްދަ ދޫކޮށްފައިވާ ކަން ފާހަގަ ވެފައިވާ ކަމަށްވެސް އިމިގްރޭޝަން އިން ބުންޏެވެ. އެހެންކަމުން ހުށައެޅިފައިވާ މައްސަަލަތައް އިތުރަށް ދިރާސާކޮށް، ތަހުގީގު މަރުހަލާތައް ކުރިޔަށް ގެންދިޔުމަށްޓަކައި ސަަރުކާރުގެ ކަމާ ގުޅުންހުރި އެހެން އިދާރާތަކާއި ގުޅިގެން އިމިގްރޭޝަން އިން ދަނީ މަސައްކަތް ކުރަމުންނެވެ. އަދި ކަމާއި ގުޅުން ހުރި ހެކި ހޯދާ، ފުލުހުންނާއި ގުޅުގެން މިމައްސަލަތަކަށް ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވަން ހަމަޖެހިފައިވާ ކަމަށް އިމިގްރޭޝަން އިން ބުންޏެވެ.
ބިދޭސީން ގެނައުމަށް ފަހު އިހްމާލުވެފައިވާ ފަރާތްތަކުގެ މައްސަލަ ބަލަމުންދާ ކަމަށް އިމިގްރޭޝަން އިން ބުނެފައިވާއިރު، ރާއްޖެއަށް ބިދޭސީން ގެނެސް އެފަރާތްތަކާމެދު ލާއިންސާނީކޮށް އަމަލުކުރަމުންދާ މައްސަލައަކީ އަބަދުވެސް ދެކެވޭ ވާހަކައެވެ. އެފަދަ ކަންތައްތައް ހުއްޓުވުމަށް އެކަށީގެންވާ ފިޔަވަޅުތަކެއް އެޅިފައެއް ނުވެއެވެ. ބިދޭސީން ގެންނަ ފަރާތްތަކުން އިހްމާލުވުމުގެ ސަބަބުން ބައެއް ބިދޭސީން ފިލައި އެހެން ކުންފުނިތަކުގައި ގަވާއިދާ ހިލާފަށް މަސައްކަތް ކުރަމުންދެއެވެ.
