އެމްއެމްޕީއާރްސީ ހިޔާނާތާ ގުޅިގެން ސިފައިންގެ ދެ އޮފިސަރަކު ގޭގައި މަޑުކުރަން އަންގައިފި
20 މާރިޗު 2019 | ބުދަ 15:05ގޭގައި މަޑުކުރަން އެންގި ބޭފުޅުންގެ ތެރޭގައި މޭޖަރ ނަވީން ހިމެނިވަޑައިގަންނަވާ
އެމްއެންޑީއެފްގެ އޮފިސަރުންތަކެއް
އެމްއެމްޕީއާރްސިގެ ކޮރަޕްޝަންގެ ތުހުމަތު ކުރެވޭ ސިފައިންގެ ދެ ބޭފުޅަކު ގޭގައި މަޑުކުރަން އަންގައިފިއެވެ.
އެމްއެންޑީއެފް އިން ބުނީ، ގޭގައި މަޑުކުރަން އަންގާފައިވަނީ މޭޖަރ ނަވީން ޒުބައިރުގެ އިތުރުން ސާރޖެންޓް އިސްމާއިލް ޝަކީބު ކަމަށެވެ. މި ދެބޭފުޅުންގެ ގޭގައި މަޑުކުރަން އަންގާފައި ވަނީ ބުދަ ދުވަހުއެވެ.
އެެމްއެންޑީއެފްގެ މީޑިއާ އޮފިޝަލް ކެޕްޓަން އާޒިމް އިބްރާހިމް ވިދާޅުވީ، ނަވީންއާ ޝަކީބް ސަސްޕެންޑް ކޮށްފައި ވަނީ، އޭސީސީން އާއްމު ކުރި އެމްއެމްޕީއާރްސީގެ ރިޕޯޓާ ގުޅިގެން ސަރުކާރުން ބަލަމުންދާ މައްސަލައާ ގުޅިގެން ކަމަށެވެ.
އެމްއެމްޕީއާރްސީގެ ހިޔާނާތާ ގުޅިގެން އެންޓި ކޮރަޕްޝަން ކޮމިޝަން (އޭސީސީ)އިން ނެރުނު ތަހުގީގު ރިޕޯޓުގައި އެސްއޯއެފް ކުންފުނިން ފާއިސާ ޖަމާކޮށްފައިވާ ކަމަށް ބުނެފައިވާ، އެމްއެންޑީއެފްގެ މޭޖާރ ނަވީން ޒުބައިރާ ދޭތެރޭ ފިޔަވަޅު އަޅުއްވާނެ ކަމަށް ޗީފް އޮފް ޑިފެންސް ފޯސް މޭޖާރ ޖެނެރަލް އަބްދުﷲ ޝަމާލް ވަނީ މިދިޔަ މަހު ވިދާޅުވެފައެވެ.
ނަމަވެސް ރިޕޯޓް ނެރުނު ވަގުތު ނަވީން ހުންނެވީ ކޯހެއްގައި ރާއްޖެއިން ބޭރުގައި ކަމުން އޭނާއާ ސުވާލު ކުރުމަށް ދަތިވެފައިވާ ކަމަށް ޝަމާލް ވަނީ ވިދާޅުވެފައެވެ. ކޯސް ނިންމަވާލެއްވުމަށް ފަހު އޭނާ ރާއްޖެ ވަޑައިގެންނެވީ އަންގާރަ ދުވަހުއެވެ.
އޭސީސީން ނެރުނު ރިޕޯޓްގައި އެސްއޯފް ކުންފުނިން ނަވީންގެ އެކައުންޓަށް 100،000 (އެއްލައްކަ) ޑޮލަރު ޖަމާކޮށްފައިވާ ކަމަށް ވަނީ ބުނެފައެވެ.
