އެޖެންޑާ 19 އިން ވެރިން ގައުމު ލޫޓުވުން ހުއްޓުވާނެ: އީވާ
19 މާރިޗު 2019 | އަންގާރަ 03:42ރައީސް ސާލިހުގެ ވައުދުތައް ފުއްދުމަށް އެހީތެރިވެ ދޭ މެމްބަރެއްގެ ގޮތުގައި އަބަދުވެސް ދެމި ހުންނަވާނެ ކަމަށް އީވާ ވިދާޅުވި
ގަލޮޅު އުތުރު ދާއިރާގެ މެމްބަރު އީވާ އަބުދުﷲ ކެމްޕެއިން ޖަގަހަ ހުޅުވުމުގެ ރަސްމިއްޔާތުގައި އޭނާ ވާހަކަ ދައްކަވަނީ
އެޖެންޑާ 19 ގެނައީ ވެރިން މި ގައުމު ލޫޓުވުން ހުއްޓުވުމަށް ކަމަށް ގަލޮޅު އުތުރު ދާއިރާގެ މެމްބަރު އީވާ އަބުދުﷲ ވިދާޅުވެއްޖެއެވެ.
މި ފަހަރު ވެސް އިންތިޚާބުގައި ވާދަ ކުރައްވާ އީވާގެ ކެމްޕެއިން ޖަގަހަ ހުޅުވުމަށް ހޯމަ ދުވަހުގެ ރޭ ބޭއްވި ބައްދަލުވުމުގައި އީވާ ވިދާޅުވީ ރައްޔިތުން ތަނަވަސް ނުވުމުގެ ސަބަބަކީ ވެރިން ގައުމު ލޫޓުވަމުން ދިއުމުގެ ސަބަބުން ކަމަށެވެ.
"މިއީ ރައްޔިތުންނަށް ތަނަވަސް ދިރިއުޅުމެއް ހޯދައިދޭން އަޅުގަނޑުމެން އެކުލަވާލި އޮނިގަނޑެއް. އެޖެންޑާ 19 އަކީ ތެދުވެރި ވެރިއެއްގެ އިޚްލާސްތެރި ވައުދުތަކަށްޓަކައި އެކުލަވާލި ގާނޫނީ އޮނިގަނޑެއް" ރައްޔިތުންގެ މަޖިލީހުގައި ދެ ދައުރު ހޭދަކުރައްވާފައިވާ އީވާ ވިދާޅުވި އެވެ.
އީވާ ވިދާޅުވީ އެޖެންޑާ 19 އަކީ ރައްޔިތުންގެ ވެރިކަން ދަމަހައްޓާ، ވައުދުތައް ފުއްދުމަށް އެކުލަވާލި ގަނޫނީ އޮނިގަނޑެއް ކަމަށެވެ. 2008 ވަނަ އަހަރު އެމްޑީޕީގެ ވެރިކަމެއް ރައްޔިތުން ގެނައީ ޚިޔާލުފާޅުކުރުމާއި، އިޖުތިމާއީ ރައްކާތެރިކަމާއި ބޯހިޔާވަހިކަން ކަށަވަރުކޮށްދިނުމުގެ ވައުދާއިއެކުގައި ކަމަށް އީވާ ވިދާޅުވިއެވެ. އޭރު ބޭސް ސިޓީއަށް ސަލާޖެހުން ނައްތާލައި އެކަނިވެރި މައިންނަށް އިނާޔަތް ދީ، ފޮތް ލިސްޓް ހިލޭ ކޮށްދީ، ބޯހިޔާވައިކަމުގެ ބޮޑެތި މަޝްރޫއުތައް އެ ވެރިކަމުގެ ތިން އަހަރު ރައްޔިތުންނަށް ކޮށްދިން ކަމަށް އީވާ ވިދާޅުވިއެވެ.
ގަލޮޅު އުތުރު ދާއިރާގެ މެމްބަރު އީވާ އަބުދުﷲ، ރައީސް ސޯލިހް އާއި ސަލާމްކުރައްވަނީ
"އެޖެންޑާ 19 އަކީ ބޯހިޔާވަހިކަން ކަށަވަރުކޮށްދީ، އިންކަމް ޓެކްސް ތައާރަފްކޮށް، ދެވޭ އެންމެ ކުޑަ އުޖޫރަ ކަނޑައަޅައި، ރާއްޖޭގެ އިގްތިސާދު ހަރުދަނާކޮށް، ފަނޑިޔާރުގެ އިސްލާހުކޮށް، އިންސާފު ކަށަވަރުކޮށް ދޭ އޮނިގަނޑެއް" އީވާ ވިދާޅުވިއެެވެ.
ރައީސް އަބުދުﷲ ޔާމީންގެ ހިޔާ މަޝްރޫއުގައި ހިންގާފައިވާ ކޮރަޕްޝަންގެ މައްސަލަތަކަށް އިޝާރަތް ކުރައްވައި އީވާ ވިދާޅުވީ، އެޖެންޑާ 19 އިން ގާތް މީހުނާއި އަރިސް މީހުންނަށް ފްލެޓް ދީ، ބޯހިޔާވަހިކަމުން ވައްކަން ކުރުން ހުއްޓުވާނެ ކަމަށެވެ. ރައްޔިތުންނަށް ބޯހިޔާވަހިކަން ކަށަވަރުކޮށްދޭނީ އެއްވެސް ރައްޔިތަކު ބާކީ ނުވާނެހެން އެކުލަވާލާފައިވާ ދެފުށް ފެންނަ އޮނިގަނޑެއްގެ ދަށުންކަމަށް އޭނާ ވިދާޅުވި އެވެ.
އީވާ ވިދާޅުވީ އެމްޑީޕީ ދެމި އޮންނާނީ ވައުދު ފުއްދާ ޕާޓީއެއްގެ ގޮތުގައި ކަމަށެެވެ. އަދި ރައީސް ސާލިހުގެ ވައުދުތައް ފުއްދުމަށް އެހީތެރިވެ ދޭ މެމްބަރެއްގެ ގޮތުގައި އަބަދުވެސް ދެމި ހުންނަވާނެ ކަމަށް އީވާ ވިދާޅުވިއެވެ.
