އައިޖީއެމްއެޗްގެ އާބާތުރަ ފިލުވުމުގެ މަސައްކަތް ކުރިއަށް ގެންދާނެ ކަމަށް އިންޑިއާ އިން ބުނެފި
18 މާރިޗު 2019 | ހޯމަ 06:26ޑިޕްލޮމެޓިކް ޕާސްޕޯޓް ގެންގުޅޭ ބޭފުޅުންގެ ވިސާގެ މުއްދަތު އިތުރުކުރުން
އިންޑިއާގެ ޚާރިޖީ ވަޒީރު ސުޝްމާ ސުވަރާޖް ރާއްޖޭގެ ފޮރިން މިނިސްޓަރ އަބްދުﷲ ޝާހިދާ ބައްދަލުކުރައްވަނީ
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާބާތުރަ ފިލުވުމުގެ މަޝްރޫއު ކުރިއަށް ގެންދާނެ ކަމަށް އިންޑިއާ އިން ބުނެފިއެވެ
އިންޑިއާގެ ފޮރިން މިނިސްޓަރ ސުޝްމާ ސުވަރާޖް މިހާރު ރާއްޖެ އަށް ކުރައްވަމުން ގެންދަވާ ދަތުރުފުޅުގައި އެކަމަނާ އިއްޔެ ވަނީ އައިޖީއެމްއެޗްގެ އާބާތުރަ ފިލުވުމަށް އިންޑިއާ އިން ހިންގި މަޝްރޫއުގެ ދަށުން މިހާތަނަށް ނިމިފައިވާ ތަންތަން އިފްތިތާހުކޮށްދެއްވާފައެވެ. ފޮރިން މިނިސްޓްރީ އިން ބުނީ އައިޖީއެމްއެޗްއަކީ ރާއްޖެ އާއި އިންޑިއާއާ އޮތް ގުޅުން ރަމްޒުކޮށްދޭ ނިޝާނެއް ކަމަށެވެ.
އައިޖީއެމްއެޗްގެ އާބާތުރަ ފިލުވުމަށް އިންޑިއާ ސަރުކާރުގެ އެހީގައި ހިންގާ މަޝްރޫއުގެ ދަށުން ބޮޑު ބައެއް ވަނީ ނިމިފައެވެ.
ސުޝްމާގެ މި ދަތުރުފުޅުގައި ރާއްޖެއާ އެކު ތިން އެއްބަސްވުމެއްގައި ވަނީ ސޮއިކޮށްފައެވެ. އޭގެ ތެރޭގައި ދިވެހި ދައުލަތުގެ އިސްބޭފުޅުންނަށް ޑިޕްލޮމެޓިކް ވިސާގެ ކަންކަމުގައި ލުއި ގޮތްތަކެއް ހަމަޖައްސައިދިނުމާއި، ތަރައްޤީގެ މަސައްކަތްތަކުގައި ގުޅިގެން މަސައްކަތްކުރުމާއި، އިޢާދަކުރަނިވި ހަކަތައިގެން ދާއިރާއިން ރާއްޖެއަށް އެހީ ދިނުމުގެ އެއްބަސްވުންތަކެއްގައި ރާއްޖެ އާއި އިންޑިއާއާ ދެމެދު ވަނީ ސޮއިކޮށްފައެވެ.
އާދީއްތަ ދުވަހު ބޭއްވި ރަސްމިއްޔާތުގައި އެއްބަސްވުންތަކުގައި ސޮއިކުރެއްވީ އިންޑިއާގެ އެކްސްޓާނަލް މިނިސްޓަރ ސުޝްމާ ސުވަރާޖާއި ރާއްޖޭގެ ފޮރިން މިނިސްޓަރު ޢަބްދުﷲ ޝާހިދުއެވެ.
މި އެއްބަސްވުމުގައި ހިމެނޭ ޑިޕްލޮމެޓިކް ޕާސްޕޯޓް ގެންގުޅޭ ބޭފުޅުންނަށް އިންޑިއާގައި ހިލޭ ވިސާގެ ދަށުން ހޭދަކުރެވޭނެ މުއްދަތު މިހާރަށް ވުރެ އިތުރުވެގެންދާނެއެވެ. މީގެ އިތުރުން ރާއްޖޭގެ ތަރައްޤީގެ އެކިކަންކަމުގައި އެހީތެރިވުމާއި އިޢާދަކުރަނިވި ހަކަތައިގެ ދާއިރާއިން ރާއްޖެއަށް އެހީވުމަށް އިންޑިއާ އިން ވަނީ އެއްބަސްވެފައެވެ.
ދެ ޤައުމުގެ ފޮރިން މިނިސްޓަރުން ކުރެއްވި މަޝްވަރާތަކުގައި ވަނީ ދެ ގައުމުގެ ދެމެދުގައި އޮތް އުޚުއްވަތްތެރި ގުޅުން މިހާރަށް ވުރެ ބޮޑަށް ބަދަހިކޮށް އިތުރު ދާއިރާތަކުން މިހާރަށް ވުރެ ބޮޑަށް ގުޅިގެން މަސައްކަތްކުރުމާ މެދު މަޝްވަރާކުރައްވާފައެވެ. ސުޝްމާ ރާއްޖެއަށް ކުރައްވާ މި ދަތުރުފުޅުގައި ވަނީ ދެ ޤައުމުގެ ދެމެދުގައި ރަސްމީ މަޝްވަރާތައް ބާއްވާފައެވެ. މި މަޝްވަރާތަކުގައި ކެބިނެޓުގެ ވަޒީރުން ބައިވެރިވެވަޑައިގަތެވެ. ރާއްޖޭގެ ފޮރިން މިނިސްޓަރ އަބްދުﷲ ޝާހިދުގެ ދައުވަތަކަށް ސުޝްމާ ރާއްޖެއަށް ކުރައްވާ ދަތުރުފުޅު ފެއްޓެވީ އާދީއްތަ ދުވަހުއެވެ.
