ސީބެޑެއްގައި އޮޔާދިޔާ އަންހެނަކު ސަލާމަތްކޮށްފި
16 މާރިޗު 2019 | ހޮނިހިރު 03:3719 އަހަރުގެ އަންހެން މީހާ ސަލާމަތް ކުރީ ފުލުހުންގެ ލޯންޗެއްގައި ގޮސް
ފުލުހުންގެ ލޯންޗަށް އަންހެން ކުއްޖާ ސަލާމަތްކޮށްގެން އަރުވަނީ
ތ. ގުރައަދޫގައި މޫދަށް އެރު އުޅެނިކޮށް ސީބެޑެއްގައި އޮޔާ ދިޔަ އަންހެނަކު ފުލުހުން ސަލާމަތްކޮށްފިއެވެ.
ހުކުރު ދުވަހު ފުލުހުން ކުރި ޓްވީޓެއްގައި ބުނެފައި ވަނީ ސީބެޑެއްގައި އަންހެނަކު އޮޔާދާ ކަމުގެ މައުލޫމާތު ފުލުހުންނަށް ލިބުނީ ހެނދުނު 10:15 ހާއިރު ކަމަށެވެ. އަދި 19 އަހަރުގެ އަންހެން މީހާ ސަލާމަތް ކުރީ ފުލުހުންގެ ލޯންޗެއްގައި ގޮސް ކަމަށް ވެސް ފުލުހުން ވަނީ ބުނެފައެވެ.
މި ހާދިސާގައި އަންހެން މީހާ އަށް އެއްވެސް ގެއްލުމެއް ލިބިފައިވާ ކަމުގެ މައުލޫމާތެއް ނުލިބެއެވެ. ފުލުހުންގެ މީޑިއާ އޮފިޝަލް ވިދާޅުވީ އަންހެން މީހާ އޮޔާދާ ކަމުގެ މައުލޫމާތު ދިނީ އެ ވަގުތު މޫދަށް އެރި އުޅުނު ބަޔަކު ކަމަށެވެ.
ރާއްޖޭގައި މި ފަހަކަށް އައިސް ވަނީ މޫދުގައި ހިނގާ އެކިއެކި ހާދިސާތަކުގައި މަރުވާ މީހުންގެ އަދަދު ގިނަވެފައެވެ. މީގެ ތެރޭގައި ގިނައީ ރާއްޖެއަށް ޒިޔާރަތްކުރާ ފަތުރުވެރިންނެވެ. އަދި މި ފަހުން ވެސް ކަނޑުމަތިން ހިނގި ހާދިސާއެއްގައި ދިވެހި ޒުވާން އަންހެން ކުއްޖަކު ވަނީ ވީނުވީއެއް ނޭނގި ގެއްލިފައެވެ.
