އިންޑިއާގެ އެކްސްޓާނަލް އެފެއާޒް މިނިސްޓަރު ސުޝްމާ ސްވަރާޖު އަންނަ އާދީއްތަ ދުވަހު ރާއްޖެއަށް ވަޑައިގެންނެވުމަށް ހަމަޖެހިއްޖެއެވެ.
އިތުބާރު ހުރި ގޮތަކަށް ރާއްޖެއެމްވީއަށް އެނގިފައިވާ ގޮތުގައި ސުޝްމާ ރާއްޖެވަޑައިގަންނަވަން އާދީއްތަ ދުވަހު ހަމަޖެހިފައިވާއިރު އެކަމަނާ އަށް ޚާއްސަ ރަސްމިއްޔާތެއް ބޭއްވުމަށް ވެސް ވަނީ ހަމަޖެހިފައެވެ.
ފޮރިން މިނިސްޓްރީގެ ތަރުޖަމާން ރާއްޖެއެމްވީ އަށް ވިދާޅުވީ އެފަދަ ދަތުރުރުފުޅެއް ކުރައްވާ ނަމަ ދެ ގައުމުން އެއްބަސްވާ ގޮތެއްގެ މަތިން ހާމަ ކުރާނެ ކަމަށެވެ. އެހެން ނަމަވެސް ސުޝްމާ ރާއްޖެވަޑައިންނަވާ ޚަބަރު ދޮގެއް ނުކުރެއެވެ.
"ދަތުރެއް ކުރައްވާ ނަމަ ދެ ގައުމުން އެއްބަސްވާ ގޮތެއްގެ މަތިން ދެ ގައުމުން އިއުލާނު ކުރާނެ،" އޭނާ ވިދާޅުވި އެވެ.
މައުލޫމާތު ލިބިފައިވާ ގޮތުގައި ސުޝްމާ ރާއްޖެއަށް ކުރައްވާ ދަތުރުފުޅުގައި ދެ ގައުމުގެ ދެމެދުގައި އެއްބަސްވުންތަކެއްގައި ސޮއިކުރައްވާނެއެވެ. އޭގެ ތެރޭގައި ފިޔާ، އަލުވި ފަދަ ތަކެތި ތިން އަހަރު ދުވަސް ވަންދެން އިންޑިއާ އިން ދަތިތަކެއް ނެތި ފޯރުކޮށްދިނުމަށް ކޯޓާ އިތުރު ކުރުމުގެ އެއްބަސްވުމެއް ހިމެނެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހް ވެރިކަމަށް ވަޑައިގެންނެވި ފަހުން އިންޑިއާ އާއި ރާއްޖެއާ ދެމެދުގެ ގުޅުން ދަނީ ބަދަހިވަމުންނެވެ. އެގޮތުން މިދިޔަ ޑިސެމްބަރު މަހު އިންޑިއާ އަށް އެމަނިކުފާނު ކުރެއްވި ފުރަމާނަ ދަތުރުފުޅުގެ ތެރޭގައި އެ ގައުމާ އެކު ސޮއިކުރެއްވި ވިސާގެ ލުއި ގޮތްތަކެއް ހިމެނޭ އެއްބަސްވުމާ އެއްގޮތަށް މިހާރު ވަނީ އަމަލު ކުރަން ފަށާފައެވެ. އިންޑިއާ އިން ވަނީ ރާއްޖެއަށް 1.2 ބިލިއަން ރުފިޔާ ބަޖެޓް ސަޕޯޓަށް ދިނުމަށް ނިންމާފައެވެ.
