މަސްތުވާތަކެއްޗާ އެކު ހަތަރު މީހުން ހައްޔަރުކޮށްފި
މަސްތުވާތަކެތި އަތުލައިގަތީ ތެޔޮބޯޓަކުން
ތެޔޮ ބޯޓަކުން އަތުލައިގަތް މަސްތުވާތަކެތި
ކޯޓު އަމުރެއްގެ ދަށުން ތެޔޮ ބޯޓެއް ބަލައިފާސްކޮށް މަސްތުވާތަކެއްޗާ އެކު ހަތަރު މީހަކު ހައްޔަރުކޮށްފިއެވެ.
މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން ލ. ގަން ޕޮލިސް ސްޓޭޝަނުން ކުރިއަށް ގެންދިޔަ އޮޕަރޭޝަނެއްގައި، ކޯޓު އަމުރެއްގެ ދަށުން ތެޔޮ ބޯޓެއް ބަލައިފާސްކޮށް މަސްތުވާތަކެއްޗާ އެކު ހަތަރު މީހަކު ހައްޔަރުކޮށްފިއެވެ.
ފުލުހުން ބުނީ ، ލ. ކަލައިދުއަށް ދަތުރުކުރަމުންދާ ތެޔޮބޯޓަކުން މަސްތުވާތަކެތި ގެންނަ ކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން ހިންގި މި އޮޕަރޭޝަންގައި ހައްޔަރުކޮށްފައި ވަނީ 20 އަހަރުގެ މީހަކާއި 22 އަހަރުގެ މީހެއްގެ އިތުރުން 26 އަހަރުގެ މީހަކާ 34 އަހަރުގެ މީހެކެއް ކަމަށެވެ. މި އެންމެންނަކީ ދިވެހިންނެވެ.
ފުލުހުން ބުނީ، އިންޓެލިޖެންސާއި ގަން ޕޮލިސް ސްޓޭޝަން ގުޅިގެން މާޗް 12 ވަނަ ދުވަހުގެރޭ 19:49 ހާއިރު ހިންގި މި އޮޕަރޭޝަންގައި، ކަލައިދޫ ބަނދަރަށް ބޯޓު ގާތްކުރި ވަގުތު ފުލުހުން އެބޯޓަށް އަރައި އެ މީހުން ހައްޔަރުކޮށް އެބޯޓް ބަލައިފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ފިލްމު ހުސްކުރި ދަޅަކާއި މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ޖޫސްޕެޓީ ކޮތަޅެއް އެބޯޓުން ފެނިފައިވާ ކަމަށެވެ.
މީގެ އިތުރުން ރޭ ފަތިހު 4:22 ހާއިރު ހިންގި ނ. ހޮޅުދޫ ޕޮލިސްޓޭޝަން އިން ހިންގި އޮޕަރޭޝަނުގައި މަސްތުވާތަކެއްޗާ އެކު 21 އަހަރުގެ ފިރިހެނަކު ހައްޔަރު ވަނީ ހައްޔަރު ކޮށްފައެވެ.
ހޮޅުދޫ މަގުމަތިން މި މީހާ ހައްޔަރުކޮށް ބަލައިފާސްކުރިއިރު، މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 13 ރަބަރު ޕެކެޓު ފެނިފައިވާ ކަމަށް ފުލުހުން ބުންޏެވެ.
