ނިއުޕޯޓް ވިއު ހުސްކުރަން ސަރުކާރުން އެންގުމުން އެތަނުގެ ބަދަލު ހޯދުމަށް ސްޓާރޑާ ޕްރައިވެޓް ލިމިޓެޑުން އެ މައްސަލަ ސިވިލް ކޯޓަށް ހުށަހަޅަން ނިންމައިފިއެވެ.

އިތުބާރު ހުރި މަސްދަރަކުން ރާއްޖެ އެމްވީ އަށް މައުލޫމާތު ދެމުން ބުނެފައިވަނީ ނިއުޕޯޓުން އެ މައްސަލައިގައި ކޯޓަށް ދާން ނިންމާފައިވާ ކަމަށާއި، ކޯޓުން ނިންމާ ގޮތަކަށް އަމަލުކުރަން ނިންމާފައިވާ ކަމަށެވެ. އެގޮތުން ބަދަލުދިނުމަށް ފަހު، ތަން ހުސްކުރަން ކޯޓުން  އަންގައިފިނަމަ އެގޮތަށް އަމަލުކުރަން ނިއުޕޯޓުން ނިންމާފައިވާ ކަމަށް ވެސް އެފަރާތުން މައުލޫމާތު ދިނެވެ. 

ބްރިޖް ވިއު ޕްލެޓްފޯރމް ސަރަހައްދުގައި ހުޅުވާފައިވާ ނިއުޕޯރޓް ވިއު ހުސްކުރަން އެތަނުގެ ވެރިފަރާތަށް ސަރުކާރުން ވަނީ އަންގާފައެވެ.ރާއްޖެއެމްވީއަށް އެނގިފައިވާ ގޮތުގައި ވެރިފަރާތަށް އަންގާފައި ވަނީ 30 ދުވަހުގެ ތެރޭގައި އެތަން ހުސްކުރުމަށެވެ. އެތަނުގެ އެގްރިމެންޓް ހަދާފައިވާ ގޮތުން އެއް މަހުގެ ކުލި ސަރުކާރަށް ނުދެއްކިއްޖެ ހާލަތެއްގައި ތަން ހުސްކުރަން އެންގިދާނެއެވެ. 

މިދިޔަ ފެބްރުއަރީ މަހުގެ 6 ގައި ހުޅުވާފައިވާ 500 މީހުންގެ ޖާގައިގެ ނިއުޕޯރޓް ރެސްޓޯރަންޓްސްގެ މެނޭޖިންގ ޑިރެކްޓަރަކީ ޕީޕީއެމްގެ ކުރީގެ ކައުންސިލު މެމްބަރު ޒާހިދު ރަމީޒުގެ އަނބިކަނބަލުން މަލަކާ އަބްދުލް ހަކީމެވެ. ކުރިން އެކުންފުނީގެ މެނޭޖިން ޑިރެކްޓަރަކަށް ހުންނެވި ޒާހިދު ރަމީޒުވަނީ ފަހުން އެ ކުންފުނި ދޫކޮށް މަލަކާގެ ނަމަށް ބަދަލު ކޮށްފައެވެ.

ރާއްޖެއެމްވީއަށް އެނގިފައިވާ ގޮތުގައި ވެރިފަރާތަށް އަންގާފައި ވަނީ 30 ދުވަހުގެ ތެރޭގައި އެތަން ހުސް ކުރުމަށެވެ. 

ތަނުގެ ކުލީގެ ގޮތުގައި ތިންލައްކައަށް ވުރެ ގިނަ ރުފިޔާ ދައްކަމުން އައި ނިއުޕޯޓް ވިއު ކުއްޔަށް ދީފައި ވަނީ 8 އަހަރަށެވެ.

ނިއުޕޯޓް ހިންގާ ސްޓާރާޑާ ޕްރައިވެޓް ލިމިޓެޑަށް ޕްލެޓްފޯމް ސަރަހައްދު ދޫކުރީ ކުރީގެ ރައީސް އަބްދުﷲ ޔާމީނުގެ ވެރިކަމުގައެވެ. ގާތްގަނޑަކަށް 10،000 އަކަފޫޓުގެ ބިމެއް ސްޓާރާޑާ ޕްރައިވެޓް ލިމިޓެޑަށް ކުއްޔަށް ދިނީ ޕްލެޓްފޯމާއި ރެސްޓޯރަންޓާއި ކުޑަކުދިން ކުޅޭނެ ސަރަހަދެއްގެ އިތުރުން ޕާކިން ޒޯން ހަދާގޮތަށެވެ.

މައުލޫމާތު ލިބިފައިވާ ގޮތުގައި ނިއުޕޯޓްވިއު ހުސްކުރުމަށް ފަހު ސަރުކާރުން ބޭނުންވަނީ އެތަނުގައި އާންމުންނަށް ތިބެވޭނެ ގޮތަށް ޕާކެއް ހެދުމަށެވެ.