ޔޫއެންޑީޕީގެ ގްލޯބަލް އެންވެއަރަމެންޓް ފެސިލީޓީ (ޖެފް) ގެ ސްމާލް ގްރާންޓްސް ޕްރޮގްރާމުން މިހާތަނަށް 37 މިލިއަނާ ގާތްކުރާ އަދަދެއްގެ ފައިސާގެ ހިލޭ އެހީ ރާއްޖޭގެ އެކި ކަންކޮޅުތަކުގައި އުފެދިފައިވާ ޖަމިއްޔާ ޖަމާއަތްތަކަށް ފޯރުކޮށްދީފައި ވާކަމަށް މި ޕްރޮގްރާމްގެ ނޭޝަނަލް ކޯޑިނޭޓަރ ފާތުމަތު ސައީދު ވިދާޅުވެއްޖެއެވެ.

މި ޕްރޮގްރަމްގެ މައިގަނޑު މަގުސަދާ ބެހޭ ގޮތުން ރާއްޖެޓީވީއަށް މައުލޫމަތު ދެއްވަމުން ފާތުމަތު ސައީދު ވިދާޅުވީ ޖެފް އިން ފޯރުކޮށްދޭ އެހީތެރިކަމަކީ ދެމެހެއްޓެނިވި ތިމާވެއްޓެއް ރާއްޖޭގައި އޮތުމުގެ ފުރުސަތެއް ހޯދައި ދިނުމުގެ ގޮތުން ފޯރުކޮށްދޭ އެހީތެރިއެއް ކަމަށެވެ.

ރާއްޖޭގައި އުފެދިފައިވާ ޖަމިއްޔާ ޖަމާއަތްތައް މެދުވެރިކޮށް މުޖުތަމައުގެ އެކި ކަހަލަ ޕްރޮޖެކްޓްތައް ކުރިއަށް ގެންދިއުމަށްޓަކައި 37 މިލިއަނާ ގާތްކުރާ އަދަދެއްގެ ފައިސާގެ ހިލޭ އެހީ ފޯރުކޮށްދެވިފައި ވާކަމަށެވެ. އަދި މިހާރު ވެސް 50 ޕްރޮޖެކްޓެއް އަތޮޅުތެރޭގެ އެކި ސަރަހައްދުތަކުގައި ކުރިއަށް ދާކަމަށް އޭނާ ވިދާޅުވިއެވެ.

ސްމާލް ގްރާންޓްސް ޕްރޮގްރާމްގެ އެހީގެ ދަށުން ފަސް ދާއިރާއަކުން އެހީތެރިކަން ފޯރުކޮށް ދޭކަން ފާހަގަ ކުރައްވާ ފަތުމަތު ވިދާޅުވީ ރައްކާތެރި ގޮތުގައި ކުނި މެނޭޖް ކުރުމާއި، ބިން ހިމާޔަތް ކުރުމާއި، ކަނޑާއި މޫދު ހިމާޔަތްކުރުމުގެ އިތުރުން އެތަންތަނުގެ ދިރުންތައް އާލާކޮށް ހިމާޔަތް ކުރުން ފަދަ މަޝްރޫއުތައް ހިމެނޭ ކަމަށެވެ.

މީގެ އިތުރުން ވެސް އަންހެނުންނާއި ނުކުޅެދުންތެރިކަން ހުންނަ ފަރާތްތަކާ އަދި ޒުވާނުން ބާރުވެރި ކުރުވުން ވެސް ހިމެނޭ ކަމަށް އޭނާ ވިދާޅުވިއެވެ. އަދި ތިމާވެއްޓާ ގުޅުން ހުރި ދާއިރަތަކަކުން ޖަމިއްޔާ ޖަމާއަތްތަކާ އެކު ގިނަ މަސައްކަތްތަކެއް ކުރެވިފައި ވާކަން ފާތުމަތު ވަނީ ފާހަގަ ކުރައްވާފައެވެ.

ޔޫއެންޑީޕީގެ "ޖެފް"ގެ ސްމާލް ގްރާންޓްސް ޕްރޮގްރާމަކީ 2010 ވަނަ އަހަރުން ފެށިގެން ރާއްޖޭގައި ހިންގަމުން އަންނަ ޕްރޮގްރާމެކެވެ.