ޔާމީންގެ އެކައުންޓް ފްރީޒްކުރި މައްސަލައިގެ ހުކުމް އިއްވުން މިއަދު ކެންސަލްވެއްޖެ

ކުރީގެ ރައީސް އަބްދުﷲ ޔާމިން އަބްދުލް ގައްޔޫމްގެ ބެންކް އެކައުންޓްތައް ފްރީޒްކުރަން ކްރިމިނަލް ކޯޓުން ނެރުނު ތިން އަމުރަކީ ބާތިލް އަމުރެއް ކަމަށް ކަނޑައަޅާދޭން އެދި ހައިކޯޓަށް ހުށައެޅި މައްސަލައިގެ ހުކުމް އިއްވުން މިއަދު ކެންސަލްވެއްޖެއެވެ.

ރައީސް ޔާމީންގެ ގާނޫނީ ޓީމުގައި ހިމެނިވަޑައިގަންނަވާ ގާނޫނީ ވަކީލު އަބްދުﷲ ޝިޔާޒު ކުރެއްވި ޓުވީޓެއްގައި ބުނެފައިވަނީ ބޭންކް އެކައުންޓްތައް ފްރީޒްކުރުމަށް ކްރިމިނަލް ކޯޓުން ނެރުއްވާފައިވާ އަމުރު އިސްތިއުނާފު ކުރުމަށް ރައީސް އަބްދުﷲ ޔާމީން އަބްދުލްގައްޔޫމްގެ ފަރާތުން ދިވެހިރާއްޖޭގެ ހައިކޯޓަށް ހުށަހެޅި މައްސަލައިގެ މިއަދުގެ އަޑުއެހުން ކޯޓުގެ އިދާރީ ސަބަބަކާއި ގުޅިގެން ކެންސަލްވެފައިވާ ކަމަށެވެ.

ފެބްރުއަރީ މަހުގެ 14 ވަނަ ދުވަހުގެ ހައިކޯޓުގައި ބޭއްވި އިސްތިއުނާފުގެ ފުރަތަމަ އަޑުއެހުން ކުރިއަށް ގެންދިޔައީ އާންމުކޮން ހުޅުވާލައިގެނެއް ނޫނެވެ. މިކަމާއި ގުޅިގެން ހައި ކޯޓުން މައުލޫމާތު ދީފައިވާ ގޮތުގައި އެ މައްސަލައިގެ ފުރަތަމަ އަޑުއެހުމަށް ފަހު ވަނީ އަޑުއެހުންތައް އެއްކޮށް ނިންމާލާފައެވެ. އެހެން ކަމުން ދެން އޮންނާނީ މައްސަލައިގެ ހުކުމެވެ.

ރައީސް ޔާމިންގެ އެކައުންޓްތައް ފްރީޒްކޮށްފައިވާ މައްސަލައިގައި ފުލުހުން ބުނެފައި ވަނީ އެމަނިކުފާނުގެ ނަމުގައި ހުޅުވާފައިވާ ބޭންކް އެކައުންޓްތަކަށް ވޭތުވެދިޔަ ފަސް އަހަރު ބޮޑެތި އަދަދުތަކުން ފައިސާ ޖަމާކޮށް، މުއާމަލާތް ހިންގިކަން ފާހަގަ ކުރެވިފައިވާ ކަމަށެވެ.

ނަމަވެސް ރައީސް ޔާމީންގެ ގާނޫނީ ވަކީލުން މީގެކުރިން ވިދާޅުވެފައިވަނީ އެމަނިކުފާނުގެ އެކައުންޓުތައް ފްރީޒް ކުރަން ނެރުނު ކޯޓު އަމުރުތަކަކީ ޖިނާއި އިޖުރާއަތުގެ ގާނޫނާ ޙިލާފަށް، އަދި އަސާސީ ހައްގުތައް ނިގުޅައިގަނެވޭ ގޮތަށް ނެރިފައިވާ އަމުރުތަކެއް ކަމަށެވެ. އަދި އެކަމަކީ ކުރިއަށް އޮތް މަޖިލިސް އިންތިހާބަށް ނުފޫޒު ފޯރުވުމުގެ ގޮތުން ކޮށްފައިވާ ކަމެއް ކަމަށްވެސް ތުހުމަތުކުރެއެވެ.

ފުލުހުން ކުރިން ބުނެފައިވާ ގޮތުގައި ފްރީޒްކުރި އެކައުންޓްގައި 100 މިލިއަނަށް ވުރެ ގިނަ ރުފިޔާ ހުއްޓެވެ. އެކަމަކު ޔާމީންގެ ވަކީލުންގެ ޓީމުން ކުރިން ބުނެފައިވަނީ އެކައުންޓް ފްރީޒްކުރީ ސިޔާސީ ބޭނުމެއްގައި ކަމަށާއި އެކަމުގައި ގާނޫނީ މައްސަލަތަކެއް އެބަ ހުރި ކަމަށެވެ.