ޕޮލިސް ރިފޯރމް މަސައްކަތަށް ނުކުޅެދުންތެރިކަން ހުންނަ މީހުންގެ ހިޔާލު ހޯދައިފި

ފުލުހުންގެ މުއައްސަސާގެ ހިންގުން ހަރުދަނާ ކުރުމަށް ކުރިއަށްގެންދާ ސްޓްރެޓެޖިކް ޕްލޭން ޑިވެލޮޕްމެންޓަށް ނުކުޅެދުންތެރިކަން ހުންނަ ފަރާތްތަކުގެ ޚިޔާލު ހޯދުމަށް ފޯރަމެއް ބާއްވައިފިއެވެ.

ބުދަ ދުވަހު އިސްކަންދަރު ބިލްޑިންގައި ކުރިއަށް ގެންދިޔަ މިފޯރަމް ފައްޓަވައިދެއްވީ އެކްޓިންގ ކޮމިޝަނަރ އޮފް ޕޮލިސް މުޙައްމަދު ޙަމީދެވެ. އޭގެ އިތުރުން، މިފޯރަމްގައި ޑެޕިއުޓީ ކޮމިޝަނަރ އޮފް ޕޮލިސް ޢަބްދުލް މަންނާން ޔޫސުފާއި، ފުލުހުންގެ ޑިޕާޓްމަންޓްތަކުގެ އިސްވެރިންގެ އިތުރުން ނުކުޅެދުންތެރިކަން ހުންނަ ފަރާތްތަކުގެ ހައްޤުގައި މަސައްކަތްކުރާ ޖަމްއިއްޔާތަކުގެ މެންބަރުންނާއި ނުކުޅެދުންތެރިކަން ހުންނަ ފަރާތްތަކުން ބައިވެރިވެފައިވެއެވެ.

މި ފޯރަމްގައި ވަނީ ފުލުހުންގެ މަސައްކަތްތަކާއި މެދު ނުކުޅެދުންތެރިކަން ހުންނަ ފަރާތްތަކުގެ އުންމީދުތަކާއި ގުޅޭގޮތުން ޚިޔާލު ހޯދައި މަޝްވަރާ ކޮށްފައެވެ. އަދި ނުކުޅެދުންތެރިކަން ހުންނަ ފަރާތްތަކުގެ ކަންބޮޑުވުންތައް އަޑުއަހައި ފުލުހުންގެ ފަރާތުން ފޯރުކޮށްދެވޭނެ އެހީތެރިކަމާއި ގުޅޭގޮތުން ވެސް މި ފޯރަމްގައި ވަނީ މަޝްވަރާ ކޮށްފައެވެ.

ފުލުހުންގެ މުއައްސަސާ ހަރުދަނާކޮށް އިސްލާހު ކުރަންޖެހޭ ކަންކަން އިސްލާހު ކުރުމަށް ގިނަ މަސައްކަތްތަކެއް ކުރަމުންދާއިރު، މިދިޔަ ޑިސެމްބަރު މަހުގެ ތެރޭގައި ވަނީ ޕޮލިސް ރިފޯރމް ސިމްޕޯޒިއަމް ފަށާފައެވެ. އޭގެ އިތުރުން، ޕޮލިސް ރިފޯރމްގެ މަސައްކަތް އެގްޒެކްޓިވް ލެވެލްގައި އިތުރަށް ފުޅާކުރަމުންދާ ކަމަށާއި، ފުލުހުންގެ އިދާރާއަކީ ރައްޔިތުންނާއި ގާތުން މަސައްކަތްކުރާ ރައްޔިތުންނަށް އިތުބާރު ހިފޭ ތަނަކަށް ހެދުމަށް މަސައްކަތް ކުރައްވާނެ ކަމަށް އެކްޓިންގ ކޮމިޝަނަރ އޮފް ޕޮލިސް މުހައްމަދު ހަމީދު ވަނީ ވިދާޅުވެފައެވެ.