ޔުއެފާ ޗެމްޕިއަންސް ލީގުގައި އެންމެ ފަހުގެ ޗެމްޕިއަން ރެއާލް މެޑްރިޑް ލަދުގަންނުވާލުމަށް ފަހު، ނެދަލޭންޑްސްގެ އަޔަކްސް ކުއާޓާ ފައިނަލަށް ދަތުރުކޮށްފިއެވެ.

އަންގާރަ ދުވަހުގެ ރޭ ކުޅުނު ގަދަ 16 ގެ ދެވަނަ ލެގުގެ މެޗުން އަޔަކްސް އަތުން ރެއާލް ބަލިވީ 1-4 ގެ ތަފާތުބޮޑު ނަތީޖާއަކުންނެވެ. މި ދެޓީމު ބައްދަލުކުރި ފުރަތަމަ ލެގުގެ މެޗު އަޔަކްސްއާ ވާދަކޮށް ރެއާލް މޮޅުވީ 1-2 ގެ ނަތީޖާއަކުންނެވެ. އަޔަކްސް ކުއާޓާއަށް ދަތުރުކުރީ ޖުމްލަ 3-5 ގެ އެގްރިގޭޓް ނަތީޖާއަކުންނެވެ.

ރެއާލް ދަނޑުގައި ކުޅުނު މި މެޗު ފެށިގެން ހަތްވަނަ މިނެޓުގައި އަޔަކްސް އިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޓަޑިކްގެ އެހީތެރިކަމާ އެކު ޒިޔެކްއެވެ.

މި ލަނޑާ އެކު ރެއާލުން ކުޅުން ރަނގަޅުކުރި ނަމަވެސް 18 ވަނަ މިނެޓުގައި އަޔަކްސްއިން ވަނީ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ޓަޑިކްގެ އެހީތެރިކަމާ އެކު ޑޭވިޑް ނެރެސްއެވެ.

ރެއާލްއަށް މެޗުގައި އިތުރު ހުރަސްތަކާ ކުރިމަތިވާން ފެށީ އެޓީމުގެ ކުރިޔަށް ކުޅެމުންދިޔަ ވިނީސިއަސް ޖޫނިއާ އާއި ލޫކަސް ވަޒްކުއޭޒްއަށް އަނިޔާވެ، ބަދަލުކުރަން ޖެހުމުންނެވެ. އެގޮތުން އެ ދެ ކުޅުންތެރިންގެ ބަދަލުގައި ގެރެތު ބޭލް އާއި މާކޯ އެސެންސިއޯ ވަނީ ފުރަތަމަ ހާފް ނިމުމުގެ ކުރިން ކުޅެން އަރާފައެވެ.

ފުރަތަމަ ހާފް ނިމުމުގެ ކުރިން ރެއާލްއަށް ލަނޑު ޖެހުމަށް ހުސް ގިނަ ފުރުސަތުތައް ލިބުނެވެ. ނަމަވެސް އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތުގައި ހިފިފައެއް ނުވެއެވެ.

ދެވަނަ ހާފް ފެށިގެން އަޔަކްސްއިން ވަނީ އެޓީމުގެ ތިންވަނަ ލަނޑު ކާމިޔާބުކޮށްފައެވެ. މި ލަނޑު ކާމިޔާބުކުރީ ވެންޑެބީކްގެ އެހީތެރިކަމާއެކު ޓަޑިކްއެވެ. މިއާއެކު ރެއާލުން އެޓޭކްތައް ވަރުގަދަކޮށް، 70 ވަނަ މިނެޓުގައި އެސެންސިއޯ ކާމިޔާބުކުރި ލަނޑުން ނަތީޖާގެ ފަރަގު ކުޑަކުރިއެވެ.

ނަމަވެސް އޭގެ ދެ މިނެޓު ފަހުން އަޔަކްސްގެ ހަތަރުވަނަ ލަނޑު ޝޯނޭ ވަނީ ކާމިޔާބުކޮށްފައެވެ. މެޗުގެ ފަހު ވަގުތުކޮޅު ތެރޭގައި ފުލުފުލުގައި ރެއާލްއަށް ލަނޑު ޖެހުމަށް ފުރުސަތު ލިބިފައިވާއިރު، އޭގެ ބޭނުމެއް އެޓީމަށް ނުހިފެއެވެ.  

މެޗުގެ އިތުރު ވަގުތުގައި ރެއާލްގެ ޑިފެންޑަރ ނެޗޯއަށް ރެފްރީ ވަނީ ދެވަނަ ރީނދޫ ކާޑާއެކު ރަތް ކާޑު ދައްކާ ދަނޑުން ފޮނުވާލާފައެވެ.

އަޔަކްސް އަތުން މިވީ ބައްޔަކީ ޔޫރަޕްގެ މުބާރާތަކުން ރެއާލް އަމިއްލަ ދަނޑުގައި އެންމެ ބޮޑު ތަފާތަކުން ބަލިވި ފުރަތަމަ ފަހަރެވެ. އަދި ރެއާލް އެންމެ ފަހުން ކުޅުނު ތިން މެޗުވެސް އަމިއްލަ ދަނޑުގައި ކުޅެފައިވާއިރު، އެ ތިން މެޗުންވެސް ވަނީ ބަލިވެފައެވެ.

މުބާރާތުގެ ކުއާޓާއިން އަޔަކްސް ޖާގަ ހޯދާފައިވާއިރު، މިއީ މުބާރާތުގެ ކުއާޓާއިން ފާއިތުވެދިޔަ 16 އަހަރަށްފަހު އެޓީމަށް ފުރުސަތު ލިބުނު ފުރަތަމަ ފަހަރެވެ.