ޑިފެންސް މިނިސްޓަރ ހޯމަ ދުވަހުގެ ޖަލްސާއަށް ހާޒިރުކުރަނީ

އިންޑިއާގެ ނޫހެއް ކަމަށްވާ ސްޓްރެޓެޖިކް ނިއުސް އިންޓަނޭޝަނަލް (އެސްއެންއައި) އަށް ދެއްވި އިންޓަވިއުއަކާ ގުޅިގެން ޑިފެންސް މިނިސްޓަރ މާރިޔާ އަހްމަދު ދީދީއާ ސުވާލުކުރުމަށް ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް ނޯޓިސް ފޮނުވައިފިއެވެ.

ޑިފެންސް މިނިސްޓަރ މާރިޔާ ހޯމަ ދުވަހުގެ ޖަލްސާއަށް ހާޒިކުރުވުމަށް ނޯޓިސް ފޮނުވާފައި ވަނީ، އިންޑިއާގެ ނޫހެއް ކަމަށްވާ ސްޓްރެޓެޖިކް ނިއުސް އިންޓަނޭޝަނަލް (އެސްއެންއައި) އަށް ދެއްވި އިންޓަރވިއުއެއްގައި އިންޑިއާގައި އޮތީ ވަރުގަދަ އަސްކަރިއްޔާއެއް ކަމަށާއި އެއީ ކޮންމެ ވަގުތެއްގައި ވެސް ރާއްޖެ ހިފޭ ވަރުގެ ގައުމެއް ކަމަށް ވިދާޅުވެފައިވާ ކަމަށް ބުނެއެވެ.

މިއީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުގެ ކެބިނެޓް ވަޒީރެއް ރައްޔިތުންގެ މަޖިލީހަށް ސުވާލުކުރުމަށް ހާޒިރުކުރެވޭ ފުރަތަމަ ފަހަރުއެވެ. މި މައްސަލަ މަޖިލިހަށް ހުށަހެޅުއްވީ މަހިބަދޫ ދާއިރާގެ ޕީޕީއެމްގެ މެމްބަރު އަހުމަދު ތޯރިގް (ޓޮމް) އެވެ.

ރައްޔިތުންގެ މަޖިލީހުގެ އިދާރާ އިން މިހާރު ވަނީ ހޯމަ ދުވަހުގެ ނުވައެއް ޖަހާއިރު މަޖިލީހަށް ހާޒިރުވުމަށް މާރިޔާ އަށް ނޯޓިސް ފޮނުވާފައެވެ.

ތޯރިގް ހުށަހެޅުއްވި މައްސަލައިގައި ބުނެފައި ވަނީ ގާނޫނުއަސާސީ އާއި ސިފައިންގެ ގާނޫނުން ވަޒީރާ މަތިކޮށްފައިވާ ގާނޫނީ އެންމެ ބޮޑެތި ޒިންމާތަކުގެ ތެރޭގައި ރާއްޖޭގެ މިނިވަންކަމާއި ސިޔާދަތު ދިފާއުކޮށް، ހިމާޔަތް ކުރުން ހިމެނޭ ކަމަށެވެ.

މީގެ އިތުރުން، ރާއްޖޭގެ އިއްޒަތާއި ކަރާމާތާއި ދައުލަތުގެ ޝާނާއި ޝައުކަތު ދައްކުވައިދީ ހިފެހެއްޓުމާއި ރާއްޖޭގެ ކަނޑާއި ހާއްސަ އިގްތިސާދީ ސަރަހައްދު ހިމާޔަތްކުރުމުގެ ސިޔާސަތު ކަނޑައެޅުމަކީ ގާނޫނުއަސާސީ އާއި ސިފައިންގެ ގާނޫނުން ވަޒީރާ ހަވާލުކޮށްފައިވާ ޒިންމާއެއް ކަމަށްވާއިރު، މާރިޔާ މިނިސްޓަރުގެ މަގާމުގައި ހުންނަވާ ފާޅުކުރައްވަމުން ގެންދަވާ ސިޔާސަތުތަކުން ނުވަތަ ވާހަކަތަކުން ޒިންމާތައް އަދާކުރެއްވޭތޯ، ތޯރިގް ހުށަހެޅުއްވި ސުވާލުގައި ވެއެވެ.

މިކަމާ ގުޅިގެން މާރިޔާގެ އިތުބާރުނެތް ކަމުގެ މައްސަލައެއް ވެސް އިދިކޮޅު ޕްރޮގްރެސިވް ކޯލިޝަނުން ވަނީ 26 ފެބްރުއަރީގައި މަޖިލީހަށް ހުށަހަޅާފައެވެ. ސަރުކާރު ކޯލިޝަނުން ބުނެފައި ވަނީ އެ މައްސަލަ މަޖިލީހުން ބޭރުކޮށްލާނެ ކަމަށެވެ.

މާރިޔާގެ އިތުބާރު ނެތް ކަމުގެ މައްސަލަ އިދިކޮޅު 14 މެމްބަރުންގެ ސޮއާ އެކު، ހުށަހަޅާފައި ވާތީ، އެ މައްސަލައިގެ ސައްހަކަމާ މެދު ބައެއް ބޭފުޅުން ގެންދަވަނީ ސުވާލު އުފައްދަވަމުންނެވެ.

މަޖިލީހުގެ އަމީންއާންމު ފާތިމަތު ނިއުޝާ "ރާއްޖެއެމްވީ"އަށް ވިދާޅުވީ މާރިޔާގެ އިތުބާރު ނެތް ކަމުގެ މައްސަލައިގެ ނޯޓިސް އަދި ފޮނުއްވާފައި ނުވާނެ ކަމަށާއި މަޖިލީހުން ބަލަމުންދަނީ އެ މައްސަލަ ގަވާއިދަށް ފެތޭތޯ ކަމަށެވެ. މައްސަލައެއް ހުށަހެޅުމުން އަބަދުވެސް އެ މައްސަލައެއް ގަވާއިދަށް ފެތޭތޯ މަޖިލީހުން ބަލާނެ ކަމަށް ނިއުޝާ ވިދާޅުވިއެވެ.