ޓޮޓެންހަމް ހޮޓްސްޕާ ދޫކޮށްލަން އެކްލަބަށް ކުޅެމުން އަންނަ އިނގިރޭސި ކެޕްޓަން ހެރީ ކޭން ވިސްނަން ފަށާފައިވާ ކަމަށް ރިޕޯޓްތައް ބުނެފިއެވެ.
ރިޕޯޓްތައް ބުނާ ގޮތުން ފަހަކަށް އައިސް ޓޮޓެންހަމް ހޯދަމުން އަންނަ ނަތީޖާތަކާ ގުޅިގެން ކޭން ހުރީ ވަރަށް ހިތްހަމަނުޖެހިފައެވެ. އެގޮތުން އޭނާ ބޭނުން ވަނީ ކާމިޔާބު ހޯދަން އެހެން ބޮޑު ކްލަބަކަށް ބަދަލުވާން ކަމަށް ވެސް ރިޕޯޓްތައް ބުނެއެވެ.
ނަމަވެސް ރިޕޯޓްތައް ބުނާ ގޮތުން ޓޮޓެންހަމް އިން ބޭނުން ވަނީ މި ސީޒަނުގައި އެ ކްލަބުގައި ކޭން ބެހެއްޓުމަށެވެ. އަދި އެ ކްލަބުން ދެކޭ ގޮތުގައި ކޭންއަކީ މުހިންމު ކުޅުންތެރިޔެކެވެ.
ޓޮޓެންހަމްއާ އެކު ކޭން ހަދާފައިވާ އެއްބަސްވުން މިދިޔަ އަހަރު ވަނީ އާކޮށްފައެވެ. އެގޮތުން އޭނާ އެ ކްލަބާ އެކު ހެދި އާ އެއްބަސްވުމުގެ ދަށުން 2024 ވަނަ އަހަރުގެ ނިޔަލަށް މަޑުކުރަން ޖެހޭނެއެވެ.
ދާދި ފަހުން ސްޕޯޓް ބިލްޑްއަށް ދިން އިންޓަވިއުއެއްގައި ކޭން ބުނީ ޓޮޓެންހަމްގައި ހުރިހާ ކަމެއް ވެސް ވަރަށް ފުރިހަމަ ކަމަށާއި، މުޅި ކެރިޔަރު އޭނާ ހޭދަކުރަން ބޭންވަނީ އެ ކްލަބާއެކުގައި ކަމަށެވެ.
ކޭން މިހެން ބުނެފައިވާއިރު، އޭނާ ހޯދުމަށް ރެއާލް މެޑްރިޑުން މަސައްކަތް ކުރަމުން އަންނަތާ ދެ އަހަރުވެއްޖެއެވެ. މި ޖެނުއަރީ ޓްރާންސްފާގައިވެސް ކޭން ހޯދުމަށް ރެއާލުން ވަނީ މަސައްކަތް ކޮށްފައެވެ.
ޓޮޓެންހަމް އިން ކެރިޔަރު ފެށި އުމުރުން 24 އަހަރުގެ ކޭން ވަނީ މިހާތަނަށް މި ސީޒަނުގައި ޓޮޓެންހަމް އަށް ކުޅުނު 32 މެޗުގައި 21 ލަނޑު ކާމިޔާބުކޮށްފައެވެ. އޭނާ ވަނީ ޓޮޓެންހަމްގައި ހޭދަކުރި 10 ސީޒަނުގައި ކުޅުނު ޖުމްލަ 245 މެޗުން 161 ލަނޑު ކާމިޔާބުކޮށްފައެވެ.
ޕްރިމިއާ ލީގުގެ އެންމެ ޒުވާން ކުޅުންތެރިޔާގެ މަގާމު ހޯދާފައިވާ ކޭން ވަނީ މިދިޔަ އަހަރު އިންގްލޭންޑްގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.
މީގެ އިތުރުން ކޭން ވަނީ އިނގިރޭސި ގައުމީ ޓީމަށް މިހާތަނަށް ކުޅުނު 35 މެޗުގައި 20 ލަނޑު ކާމިޔާބުކޮށްފައެވެ.
