ހެއްކާ ބެހޭ ބިލު މަޖިލީހަށް ހުށަހެޅިތާ ދެ އަހަރު، އަދިވެސް ކޮމެޓީގައި
27 ފެބުރުއަރީ 2019 | ބުދަ 23:58އެ ބިލު ދިރާސާ ކުރުމަށް އެއްވެސް ބައްދަލުވުމެއް ނުބައްވާ
އަނިޔާވެރިކޮށް މަރާލާފައި އޮއްވާ ފެނުނު ބްލޮގަރ ޔާމީން ރަޝީދުގެ ހަށިގަނޑު އައިޖީއެމްއެޗުގައި: ފޮރެންސިކް ހެކި ބަލައިގަތުމާ ގުޅޭ އުސޫލު ހެއްކާ ބެހޭ ގާނޫނުގައި ހިމަނާފައިވޭ
މަދަނީ މައްސަލަތަކާއި ޖިނާއީ މައްސަލަތަކުގައި ހެކިބަސް ނެގުމާއި ހެކި ހުށަހެޅުމާ ގުޅޭ އުސޫލުތައް ބަޔާންކުރާ ހެއްކާ ބެހޭ ބިލު މަޖިލީހަށް ހުށަހެޅިތާ ދެ އަހަރު ވީ އިރުވެސް، އެ ބިލު ދިރާސާ ކުރުމުގެ މަސައްކަތް ކޮމެޓީން ނުފަށާކަން ހާމަވެއްޖެއެވެ.
އެކަން ހާމަވީ ކޮމެޓީތަކުގައި ހުރި ބިލުތަކާ ގުޅޭ ގޮތުން މަޖިލީހުން އާންމު ކުރި ތާވަލުންނެވެ. އެ ތާވަލުން ދައްކާ ގޮތުން 2017 ވަނަ އަހަރުގެ ފެބްރުއަރީ މަހުގެ 13 ވަނަ ދުވަހު ގައުމީ ސަލާމަތުގެ ކޮމެޓީއަށް އެ މައްސަލަ ހުށަހެޅިތައް އޮތީ ހުއްޓިފައެވެ. އެ ބިލު 2017 ވަނަ އަހަރުގެ ފަހު ދައުރުގައި ފާސްކުރަން ސުންގަޑި ކަނޑައެޅިފަހުން، އެ ބިލާ ގުޅޭ ގޮތުން އެއްވެސް ބައްދަލުވުމެއް ކޮމެޓީގައި ނުބާއްވައެވެ.
ސަރުކާރުގެ ފަރާތުން ފުވައްމުލަކު އުތުރު ދާއިރާގެ މެމްބަރު އަލީ ޝާހު ހުށަހެޅުއްވި އެ ބިލަކީ ކޯޓުން ހެކި ވަޒަން ކުރުމުގައި ތަބާވާންޖެހޭ އުސޫލުތައް ބަޔާން ކުރާ ބިލެކެވެ. އިނގިލީގެ ނިޝާނާއި ޑީއެންއޭގެ މައުލުމާތާއި ބޮޑީ ސާމްޕަލްފަދަ ފޮރެންސިކް ހެކި ޝަރީއަތުން ބަލައިގަތުމާ ގުޅޭ ކަންކަން އެ ބިލުގައި ތަފްސީލުކޮށްދީފައިވެއެވެ.
ހެއްކޭ ބެހޭ ބިލު މަޖިލީހުގައި ހުއްޓިފައިވާއިރު، މިހާރު އަމަލު ކުރަމުންދާ ހެއްކާ ބެހޭ ގާނޫނަކީ 40 އަހަރު ވީ ގާނޫނެކެވެ. އެ ގާނޫނަކީ ރައީސް މައުމޫންގެ ވެރިކަމުގެ ފުރަތަމަ ދައުރުގައި 1979 ވަނަ އަހަރުގެ އޮކްޓޯބަރު މަހުގެ މަޖިލީހުން ފާސްކުރި ގާނޫނެކެވެ.
ހެއްކޭ ބެހޭ ބިލުގެ ދިރާސާނުކޮށް، މަސައްކަތް ހުއްޓިފައި އޮތް ކޮމެޓީއަކީ ސަރުކާރު ހިންގާ ޕާޓީތަކުގެ މެޖޯރިޓީ އޮތް ކޮމެޓީއެވެ. އެގާރަ މެމްބަރުންގެ ހިމެނޭ ގައުމީ ސަލާމަތުގެ ކޮމެޓީގައި ޖޭޕީގެ ތިން މެމްބަރުންނާއި އެމްޑީޕީގެ ތިން މެމްބަރުން ހިމެނިވަޑައިގަންނަވައެވެ.
