މަސައްކަތް ކުރަން ބޭނުންވަނީ ލޯބިވާ ބަޔަކާއެކު ކަމަށް މެންޗެސްޓާ ޔުނައިޓެޑުގެ ކުރީގެ ކޯޗު ހޯޒޭ މޮރީނިއޯ ބުނެފިއެވެ.

ދަ ޓެލެކްޓްރާފަށް ދިން އިންޓަވިއުއެއްގައި މޮރީނިއޯ ބުނީ، މަސައްކަތް ކުރަން ބޭނުންވަނީ މަސައްކަތްކުރާހިތްވާ ކަހަލަ ކްލަބަކާ އެކު ކަމަށާއި، މަސައްކަތް ކުރާ ބަޔަކީ ލޯބިވާ ބަޔަކަށްވާން ޖެހޭނެ ކަމަށެވެ. އަދި އޭނާ ބުނީ މަސައްކަތް ކުރާ ބަޔަކާ ހުރިހާ ހިޔާލުތައް ވެސް ހިއްސާކުރެވެންޖެހޭ ކަމަށެވެ.

އެގޮތުން މޮރީނިއޯ ބުނީ، އިންޓަ މިލާނަށް އޭނާ އިރުޝާދު ދިން އިރު، އެ ކްލަބަކީ އޭނާ ބޭނުންވި ފަދަ ކްލަބެއް ކަމަށާއި، އެ ކްލަބާ އެކު ކާމިޔާބީތައް ހޯދުނީ ވެސް އެ ސަބަބުތަކަށްޓަކާ ކަމަށެވެ.

މި ސީޒަނުގައި ޔުނައިޓެޑުގެ ކޯޗެއްގެ ގޮތުގައި ހުރި މޮރީނިއޯ އެ މަގާމުން ވަކިކުރުމުން، މިހާރު އެއްވެސް ވަޒީފާއެއް އަދާކުރަމުންނެއް ނުދެއެވެ. ނަމަވެސް އޭނާއަށް ހުށަހެޅުންތައް ލިބެމުންދާ ކަމަށް މޮރީނިއޯ ވަނީ ދާދި ފަހުން ބުނެފައެވެ.

މި ސީޒަނުގައި މޮރީނިއޯގެ ކޯޗުކަމުގައި ޔުނައިޓެޑަށް ލިބުނު 26 ޕޮއިންޓަކީ 91-1990 ސީޒަނުން ފެށިގެން އެ ޓީމު އެންމެ ދަށް ފެށުމެވެ. 2016 ވަނަ އަހަރު މެންޗެސްޓަރ ޔުނައިޓެޑްގެ ކޯޗުކަމާ ހަވާލުވެ، މޮރީނިއޯ ވަނީ އެ ސީޒަނުގައި ލީގު ކަޕާއި، ޔޫރޮޕާ ލީގު އެ ޓީމަށް ކާމިޔާބުކޮށްދީފައެވެ. އެ ސީޒަން މެންޗެސްޓަރ އިން ނިންމާލީ ލީގުގެ ހަ ވަނައިގައި އޮވެގެންނެވެ.

އެހެން ނަމަވެސް މިދިޔަ އަހަރު އެ ޓީމު ވަނީ ލީގުގެ ދެވަނަ ހޯދާފައެވެ. ލީގުގެ 1 ވަނަ ހޯދީ މެންޗެސްޓާ ސިޓީއެވެ.

މީގެ ކުރިން ރެއާލް މެޑްރިޑް އާއި ޗެލްސީ އަދި އިންޓަމިލާނަށް ވެސް ކޯޗުކަން ކޮށްދީފައިވާ މޮރީނިއޯ ވަނީ ގިނަ ކާމިޔާބީތަކެއް ހޯދާފައެވެ. އެގޮތުން އޭނާ ވަނީ 2010 ވަނަ އަހަރު ފީފާ އިން ހޮވާ އެންމެ މޮޅު ކޯޗުގެ މަގާމު ވެސް ހޯދާފައެވެ. އަދި އޭނާ ވަނީ ޔުއެފާ އިން ހޮވާ އެންމެ މޮޅު ކޯޗުގެ މަގާމު ދެފަހަރު ހޯދާފައެވެ.