ގައުމުތަކުގެ ޚާރިޖީ ވަޒީރުންނާއި މިނިސްޓަރ ޝާހިދު ބައްދަލު ކުރައްވައިފި
ޝާހިދު ވަނީ މޫސުމަށް އަންނަމުންދާ ބަދަލުތަކުގެ މައްސަލައާ ބެހޭގޮތުން ވާހަކަ ދައްކަވާފައި
ފިޖީގެ ބޮޑުވަޒީރު ފްރޭންކް ބައިނިމަރަމާ އާއި ޝާހިދު ބައްދަލުކުރައްވަނީ
އދގެ އިންސާނީ ހައްޤުތަކާއި ބެހޭ ކައުންސިލްގެ 40ވަނަ ބައްދަލުވުމުގެ ހައި-ލެވެލް ސެގްމަންޓްގައި ބައިވެރިވެވަޑައިގަތުމަށް ޚާރިޖީ ވަޒީރު އަބްދުﷲ ޝާހިދު ސްވިޓްޒަލެންޑްގެ ޖެނީވާއަށް ކުރައްވަމުން ގެންދަވާ ދަތުރުފުޅުގައި އެ ބައްދަލުވުމުގެ ހަވާސާގައި ފިޖީގެ ބޮޑުވަޒީރު ފްރޭންކް ބައިނިމަރަމާ އާއި ބައްދަލު ކުރައްވައިފިއެވެ.
ފޮރިން މިނިސްްޓްރީން ބުނީ ހޯމަ ދުވަހު އދގެ އިންސާނީ ހައްޤުތަކާއި ބެހޭ ކައުންސިލްގައި ވާހަކަ ދައްކަވަމުން ވެސް ޚާރިޖީ ވަޒީރު ޝާހިދު ވަނީ މޫސުމަށް އަންނަމުންދާ ބަދަލުތަކުގެ މައްސަލައާއި އެކަމުގެ ސަބަބުން ކުދި ޖަޒީރާ ޤައުމުތަކުގެ ރައްޔިތުންގެ ހައްޤުތައް ގެއްލިގެންދާކަން ފާހަގަ ކުރައްވާފައި ކަމަށެވެ.
ޝާހިދުގެ ބައްދަލުވުމުގެ ހަވާސާގައި އެހެން ބައެއް ޤައުމުތަކުގެ ޚާރިޖީ ވަޒީރުންނާއި ބައްދަލު ކުރައްވާފައިވާ ކަމަށާއި އެގޮތުން އޮސްޓްރޭލިއާގެ ޚާރިޖީ ވަޒީރު މެރީސް ޕޭންއާއި ބައްދަލުކުރައްވައި، ދެޤައުމުގެ ގުޅުމާއި ބެހޭ ގޮތުން މަޝްވަރާ ކުރައްވައި، ރާއްޖޭގައި ޑިމޮކްރަސީ ދެމެހެއްޓުމުގެ މުހިއްމު ކަމާއި ބެހޭ ގޮތުން މަޝްވަރާ ކުރެއްވި ކަމަށް ފޮރިން މިނިސްޓްރީން ބުނެއެވެ.
ފޮރިން މިނިސްޓްރީން ބުނީ ނޯވޭގެ ޚާރިޖީ ވަޒީރު އެރިކްސެން ސޮއައިޑާ އާއި ބައްދަލުކުރައްވައި، ކުދި އަދި ޖަޒީރާ ޤައުމުތަކަށް ބައިނަލްއަޤްވާމީ މުޖްތަމައުގައި އިތުރު ފުރުސަތުތައް ހޯދުމާއި ބެހޭ ގޮތުންނާއި ކަނޑުތަކުގެ ކަންތަކުގައި ދެޤައުމުން އެއްބާރުލުން ދިނުމާއި ބެހޭ ގޮތުންނާއި، ރާއްޖޭގެ ޑިމޮކްރަސީ ހަރުދަނާކުރުމަށް ނޯވޭއަށް އެހީތެރިވެވިދާނެ ދާއިރާތަކާއި ބެހޭ ގޮތުން މަޝްވަރާ ކުރެއްވި ކަމަށެވެ.
މީގެ އިތުރުން އިނގިރޭސިވިލާތުގެ ފޮރިން އޮފީހުގެ ސްޓޭޓް މިނިސްޓަރ ފޮރ ޔޫއެން އެންޑް ކޮމަންވެލްތު، ލޯޑް އަހްމަދް އޮފް ވިމްބެލްޑަން އާއި ބައްދަލުކުރައްވައި، ރާއްޖެ ކޮމަންވެލްތާއި ގުޅުމަށް ކުރަމުންދާ މަސައްކަތްތަކާއި ގުޅޭ ގޮތުން މަޝްވަރާ ކުރެއްވި ކަމަށް އެ މިނިސްޓްރީން ބުނެއެވެ.
