މީގެ އަހަރުތަކެއް ކުރިން އިޒްރޭލުގެ ކޯޓެއްގެ އަމުރަށް ބަންދުކުރި އަލް-އަގްސާ މިސްކިތުގެ އަލް-ރަހްމާ ސަރަހައްދުގައި، ހުކުރު ދުވަހު ފަލަސްތީނު މީހުން ނަމާދު ކޮށްފިއެވެ.
އަގްސާ މިސްކިތުގެ ބައެއް ކަމުގައިވާ އަލް-ރަހްމާ ގޭޓް ސަރަހައްދުގައި އެއްމެ ފުރަތަމަ ކުރީ ހުކުރު ނަމާދެވެ. އަގްސާ މިސްކިތުގެ އެ ސަރަހައްދު އަލުން ހުޅުއްވައި ދެއްވި މުސްލިމް އޮފިޝަލުންތަކެކެވެ. މިސްކިތުގެ އެ ސަރަހައްދު ހުޅުވުމުގެ ހުއްދަ ދިނީ، ގުދުސްގައި ހުންނަ މުސްލިމް އަދި ނަސާރާ ދީންގެ މުހިންމު ބިނާތަކާއި ބެހޭގޮތުން ގޮތް ކިޔުމުގެ ބާރު މަތިކުރެވިފައިވާ ރިލިޖަސް އެންޑައުމެންޓްސް އޮތޯރިޓީއިންނެވެ. އުރުދުންއިން ހިންގާ އެޖެންސީއިން މިސްކިތް ހުޅުވީ ސޯޅަ އަހަރުގެ ދިގު މުައްދަތެއް ވަންދެން ބަންދުކޮށްފައި ހުރުމަށް ފަހުގައެވެ.
އިޒްރޭލުން އެ ސަރަހައްދު އެއްމެ ފުރަތަމަ ބަންދުކުރީ 2003ވަނަ އަހަރުގައެވެ. އަދި 2017ވަނަ އަހަރު އިޒްރޭލުގެ ކޯޓަކުން ވަނީ އެ ސަރަހައްދު ބަންދުކުރަން 2003ވަނަ އަހަރު ކޯޓުން ކުރި ހުކުމް ދަމަހައްޓާފައެވެ.
މިސްކިތުގެ އެ ސަރަހައްދުގައި ހުކުރު ނަމާދު ކުރުމުގެ ކުރިން، ހަމަނުޖެހުން ހިންގަން އުޅުނުކަމަށް ބުނެ، އިޒްރޭލުގެ ފުލުހުން ވަނީ 50 މީހަކު ހައްޔަރު ކޮށްފައެވެ. އަދި އިޒްރޭލުގެ ފުލުހުން ވަނީ އެ ސަރަހައްދުގައި ފޯރިމެރުމަށް ގިނަ އަދަދެއްގެ ފުލުހުން ހުކުރު ނަމާދު ވަގުތުގެ ކުރިން އެ ސަރަހައްދަށް ފޮނުވާފައެވެ. އަލް-ރަހްމާ ގޭޓް ސަރަހައްދު ހުޅުވަން ނިންމުމާއި ގުޅިގެން އެ ސަރަހައްދުގައި އޮތީ ނުތަނަވަސްކަން އުފެދިފައެވެ. އެގޮތުން މިދިޔަ ހޯމަ ދުވަހު އެ ސަރަހައްދުގައި ނަމާދުކުރަން އުޅުނު ފަލަސްތީނުގެ މުސްލިމުންނަށް އިޒްރޭލުގެ ސަލާމަތީ ބާރުތަކުން ވަނީ ހުރަސްއަޅާފައެވެ.
މި ސަރަހައްދުގައި ހުރި ދީނީ ތަންތަނުގެ ބެލެނިވެރިކަން އުރުދުންއަށް ދީފައިވަނީ، އިޒްރޭލާއި އެކު ހެދިފައިވާ އެއްބަސްވުމެއްގެ ދަށުންނެވެ. އަދި އެ ސަރަހައްދަކީ 1967 ވަނަ އަހަރު އިޒްރޭލުން އުރުދުންއާއި އެކު ކުރި ހަނގުރާމައެއްގައި ހިފާފައިވާ ތަނެކެވެ.
