ސައުދީ ވަލީއަހުދު މުހައްމަދު ބިން ސަލްމާން ޗައިނާއަށް ކުރައްވަމުން ގެންދަވާ ރަސްމީ ދަތުރުފުޅުގައި، ސައުދީ ސަރުކާރުގެ ތެޔޮ ކުންފުނި އަރަމްކޯއިން ޗައިނާގައި ރިފައިނަރީއާއި ޕެޓްރޯކެމިކަލްގެ 10 ބިލިއަން ޑޮލަރުގެ ޕްރޮޖެކްޓެއްގައި ސޮއިކޮށްފިއެވެ.

ދެ ދުވަހުގެ މުއްދަތަށް ޗައިނާއަށް ކުރެއްވި ދަތުރުފުޅުގައި ވަލީއަހުދު މުހައްމަދު ވަނީ ޗައިނާގެ ރައީސް ޝީ ޖިންޕިންއާއި ވެސް ބައްދަލުކުރައްވާފައެވެ. އަދި ސައުދީ ވަލީއަހުދު ވަނީ ޗައިނާގެ ބޮޑު ފާރު ބައްލަވާލެއްވުމަށް ވެސް ވަޑައިގަންފައެވެ.

ސައުދީން ސޮއިކުރި ރިފައިނަރީ ޕްރޮޖެކްޓްގެ މަސައްކަތް ކުރުމަށް ހަމަޖެހިފައި ވަނީ ލައޮނިންގް ޕްރޮވިންސްގައި ހުންނަ ޕަންޖިންގައިއެވެ. އެ ސަރަހައްދަކީ ޗައިނާ ސަރުކާރުން އިންވެސްޓަރުން ހޯދުމަށް މަސައްކަތް ކުރަމުން އަންނަ އެއް ސަރަހައްދެވެ. ޗައިނާގެ އެެހެން ސަރަހައްދުތަކާއި ޙިލާފަށް، އެ ސަރަހައްދުގެ ތަރައްގީގެ ދުވެލި ހުރީ ވަރަށް ދަށުގައެެވެ.

ރައީސް ޝީގެ އިތުރުން، ވަލީއަހުދު ވަނީ ވައިސް ޕްރިމިއަރ ހާން ޒެންއާއި ވެސް ބައްދަލުކުރައްވާފައެވެ. އެ ބައްދަލުކުރެއްވުމުގައި ސައުދީއިން ވަނީ ޗައިނާގެ ބެލްޓް އެންޑް ރޯޑް އިނީޝިއޭޓިވްއަށް އެއްބާރުލުން ދޭނެ ކަމަށް އެއްބަސްވެފައެވެ. އަދި ޗައިނާއިން ވެސް ވަނީ ސައުދީގެ ވިޝަން 2030އަށް އެ ގައުމުުގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އަރުވާފައެވެ. 

ޗައިނާއަކީ ސައުދީގެ އެއްމެ ބޮޑު ވިޔަފާރީގެ ބައިވެރިޔާއެވެ. އެގޮތުން އެ ދެ ގައުމުން މިދިޔަ އަހަރުގެ ތެރޭގައި ވެސް ވަނީ 63.3 ބިލިއަން ރުފިޔާގެ އަގު ހުރި ވިޔަފާރިކޮށްފައެވެ.

ސައުދީ ވަލީއަހުދު އޭޝިޔާގެ ގައުމުތަކަށް ކުރައްވަމުން އަންނަ ދަތުރުފުޅުގައި، ޕާކިސްތާނާއި އިންޑިޔާއާއި އެކު ވެސް ވަނީ އަގުހުރި ވިޔަފާރީގެ އެއްބަސްވުންތަކުގައި ސޮއިކޮށްފައެވެ. މިއީ، ނޫސްވެރިޔާ ޖަމާލް ޙަޝޯގީގެ މަރާލުމާއި ގުޅިގެން، ވަލީއަހުދު ކުރިން ގާތް ގުޅުމެއް ބޭއްވި ހުޅަނގުގެ ގައުމުތަކުން ސައުދީއާއި އެކު ގުޅުން ގޯސްވެފައި އޮތުމުން، ސައުދީ ސަރުކާރުން އެ ގައުމުގެ މަސްލަހަތު ރައްކާތެރި ކުރުމުގެ ގޮތުން ކުރަމުން އަންނަ ދަތުރުތަކެއް ކަމަށް މަސްރަހު ދިރާސާކުރާ ފަރާތްތަކުން ވަނީ ބުނެފައެވެ.