ކުރިޔަށް އޮތް 19 ވަނަ ރައްޔިތުންގެ މަޖިލީހުގެ އިންތިހާބުގައި ވާދަކުރުމަށް ޓިކެޓު ދީފައިވާ ދާއިރާތަކަށް ޕާޓީގެ މެމްބަރަކު އަމިއްލަ ގޮތުން ވާދަކުރަން ހުށަހަޅާނަމަ، އެމީހަކާއި މެދު ފިޔަވަޅު އަޅާނެ ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

ކޯލިޝަން ހަދާފައިވާ ޕީޕީއެމް އާއި ޕީއެންސީން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ އިންތިޚާބަށް ތައްޔާރުވަމުން އަންނައިރު، ކޯލިޝަނުގައި ހިމެނޭ ތިން ޕާޓީ ކަމަށްވާ ޕީޕީއެމް އާއި ޕީއެންސީ އަދި ޑީއާރްޕީން ގުޅިގެން ވަކި ގޮތްތަކެއް ނިންމާފައިވާ ކަމަށެވެ.

އެގޮތުން މަޖިލިސް އިންތިޚާބުގައި ވާދަކުރާނެ ރަސްމީ ކެންޑިޑޭޓެއް ކަނޑައަޅާފައިވާ ދާއިރާއަކަށް، ކޯލިޝަނުގެ އެހެން މެމްބަރަކު އަމިއްލަ ގޮތަށް ހުށަހަޅައިފިނަމަ ފިޔަވަޅު އަޅާނެ ކަމަށް އަބްދުއްރަހީމް ވިދާޅުވިއެވެ.

އަބްދުއްރަހީމް މިހެން ވިދާޅުވެފައިވާއިރު، ކުރީގެ ހޯމް މިނިސްޓަރު އަޒްލީން އަހްމަދު ހުޅުމާލެ ދާއިރާއަށް އަމިއްލަ ގޮތުން ވާދަކުރައްވަން ނިންމެވުމުން، އޭނާ ވަނީ ޕާޓީގެ ވައިބަރ ގްރޫޕްތަކުން ބޭރުކޮށްފައެވެ. އެއީ ހުޅުމާލެ ދާއިރާއަށް އަބްދުއްރަހީމްގެ ދަރިފުޅު އިބްރާހިމް ފައިސަލް ވާދަކުރައްވާތީއެވެ.

މަޖިލީސް އިންތިހާބަށް ކުރިމަތިލުމުގެ މުއްދަތު ބުރާސްފަތި ދުވަހު ހަމަވިއިރު، ޕީޕީއެމް އާއި ޕީއެންސީ ނިސްބަތްވާ 46 ކެނޑިޑޭޓުންނާއި ޑީއާރްޕީގެ 5 ކެންޑިޑޭޓުން ވަނީ އިންތިޚާބުގައި ވާދަކުރުމަށް ފޯމް ހުށަހަޅާފައެވެ.