ޕާކިސްތާނަކަށް ކަޝްމީރު މައްސަލައިގައި އެކަށީގެންވާ ފިޔަވަޅެއް ނޭޅޭ: އިންޑިއާ

އިންޑިއާގެ ޕެރަމިލިޓަރީ ފުލުހުންގެ ގާފިލާއަކަށް ކަޝްމީރުގައި ދިން ހަމަލާއާއި ގުޅިގެން، ޕާކިސްތާނަކަށް އެކަށީގެންވާ ފިޔަވަޅެއް ނޭޅޭ ކަމަށް އިންޑިއާއިން ބުނެފިއެވެ.

ބޮމުގެ މައްސަލަ ތަހުގީގުކުރަން އެހީތެރިވުމަށް ޕާކިސްތާނުގެ ބޮޑުވަޒީރު އިމްރާން ޙާންގެ ހުށައެޅުމަށް ވެސް އިންޑިއާއިން ވަނީ ނޫނެކޭ ބުނެފައެވެ. އިންޑިއާއިން ބުނެފައިވަނީ ތަހުގީގުކުރަން ހުށައެޅީ، ޕާކިސްތާނަށް ކުރެވޭ ތުހުމަތުތަކުން ރެކި ގަންނަން ގެންގުޅޭ އުކުޅެއް ކަމަށެވެ.

އިންޑިޔާގެ ހާރިޖީ ވުޒާރާއިން ނެރުނު ބަޔާނެއްގައި ވަނީ ބައިނަލްއަގްވާމީ މުޖުތަމައަށް އޮޅުވާލަން ނޫޅެ، ޕާކިސްތާނުގައި ހަރަކާތްތެރިވާ ޓެރަރިސްޓު ޖަމާއަތްތަކާއި މެދު ފިޔަވަޅު އެޅުމަށް އެ ގައުމުގެ ސަރުކާރަށް ގޮވާލާފައެވެ. ކަޝްމީރުގައި ދިން ޖާނުން ފިދާވުމުގެ ބޮމުގެ ހަމަލާގެ ޒިންމާ ވަނީ ޕާކިސްތާނުގައި ހަރަކާތްތެރިވާ ޖައޭޝް-އީ-މުހައްމަދުން ނަގާފައެވެ.

އިންޑިއާއިން ތުހުމަތު ކުރަނީ ޖައޭޝް-އީ-މުހައްމަދު ޖަމާއަތަށް ޕާކިސްތާނުގެ ސަރުކާރުން ހިމާޔަތްދޭ ކަމުގެ ތުހުމަތުކޮށްފައެވެ. ނަމަވެސް ޕާކިސްތާނުން ވަނީ މި ތުހުމަތުތަށް ދޮގު ކޮށްފައެވެ، ޖައޭޝް-އީ-މުހައްމަދު ޖަމާއަތަކީ 2002ވަނަ އަހަރުން ފެށިގެން ޕާކިސްތާނުން މަނާކޮށްފައިވާ ޖަމާއަތެކެވެ.

އިންޑިއާގެ ކަޝްމީރުގެ ޕުލްވަމާ ޑިސްޓްރިކްޓްގައި ދިން ބޮމުގެ ހަމަލާގައި، އިންޑިއާ ޕެރަމިލިޓަރީ ފުލުހުންގެ 42 މީހަކު ވަނީ މަރާލާފައެވެ.

އިންޑިއާއިން ކަޝްމީރުގެ މައްސަލައިގައި ޕާކިސްތާނާއި އެކު ގުޅުން ގޯސްވެފައި އޮންނަތާ 60 އަހަރަށް ވުރެ ގިނަ ދުވަސް ވާން ކައިރިވެފައިވާ އިރު، މި ފަހުން ދެވުނު ބޮމުގެ ހަމަލާ މިއީ ފަހުގެ ތާރީހެއްގައި ވެސް ދިން އެއްމެ ނުރައްކާތެރި ހަމަލާއެވެ.