21 ވަނަ އިންޓަރ ސްކޫލް ބާސްކެޓްބޯޅަ މުބާރާތުގައި ބައިވެރިވުމުގެ ފުރުސަތު ހުޅުވާލައިފިެވެ. 

ބާސްކެޓްބޯލް އެސޯސިއޭޝަން އޮފް މޯލްޑިވްސް އިން ހޯމަ ދުވަހު ނެރުނު އިއުލާނުގައި ބުނެފައި ވަނީ އަށެއް އޭޕްރިލް 2019 ގައި ފެށުމަށް ހަމަޖެހިފައިވާ އިންޓަސްކޫލް ބާސްކެޓްބޯޅަ މުބާރާތުގައި ބައިވެރިވުމުގެ ފުރުސަތު މިހާރު ހުޅުވާލެވިފައިވާ ކަމަށެވެ. 

މުބާރާތުގައި ބައިވެރިވާން ބޭނުން ސްކޫލްތަކުން 17 މާރޗް ވާ އާދީއްތަ ދުވަހުގެ މެންދުރު 13:30 ގެ ކުރިން ބައިވެރިވަން އެދޭ އުމުރުފުރާ އާއި، މުބާރާތާ ގުޅިގެން މުއާމަލާތު ކުރުމަށް ގުޅޭނެ ފަރާތެއްގެ ނަމާއި ނަމްބަރު އަދި އީމެއިލް އެޑްރެސް އެނގޭނެ ލިއުމެއް އެ އެސޯސިއޭޝަނަށް ހުށައަޅަން ވާނެ ކަމަށް އިއުލާނުގައި ވެއެވެ. 

ޖުމްލަ ހަތަރު އުމުރުފުރާއަކަށް ބަހާލެވިގެން ކުރިއަށް ގެންދިއުމަށް ހަަމަޖެހިފައިވާ މި މުބާރާތުގައި 12 އަހަރުން ދަށުގެ އަންހެން އަދި ފިރިހެން، 14 އަހަރުން ދަށުގެ އަންހެން އަދި ފިރިހެން، 16 އަހަރުން ދަށުގެ އަންހެން އަދި ފިރިހެން މީގެ އިތުރުން 18 އަހަރުން ދަށުގެ އަންހެން އަދި ފިރިހެން ހިމެނެއެވެ. 

ބާސްކެޓްބޯލް އެސޯސިއޭޝަނުން ނެރެފައިވާ އިއުލާނުގައި އެ އެސޯސިއޭޝަނުން ބުނެފައިވަނީ ބައިވެރިވަން އެދޭ ސްކޫލްތަކުން މާރޗް މަހުގެ 24 ވަނަ ދުވަހުގެ ކުރިން ޓީމްލިސްްޓް ހުށައަޅަން ވާނެ ކަމަށެވެ. 

އިއުލާނުގައި އިތުރަށް ބުނެފައިވަނީ، މުބާރާތުގެ ގަވާއިދާއި، ޓީމް ލިސްޓް ހުށައަޅާ ފޯރމްގެ އިތުރުން މުބާރާތާއިބެހޭ މަޢުލުންމާތު ބާސްކެޓްބޯލް އެސޯސިއޭޝަން އޮފް މޯލްޑިވްސްއިން ލިބެން ހުންނާނެ ކަމަށެވެ.