ސިފައިންގެ ވަޒީފާ އަށް ވަނުމުގެ ފުރުސަތު ހުޅުވައިިލައިފި
10 ދާއިރާއަކުން ފުރުސަތު ވަނީ ހުޅުވާލާފައި
ސިފައިންގެ އޮފިސަރުންތަކެއް
ސިފައިންގެ ވަޒީފާއަށް ވަނުމުގެ ފުރުޞަތު މިނިސްޓްރީ އޮފް ޑިފެންސް އިން އާއްމުކޮށް ހުޅުވާލައިފިއެވެ.
ވަޒީފާ އަށް ވަނުމުގެ ފުރުސަތު ހުޅުވާލާފައި ވަނީ 10 ދާއިރާ އަަކަށެވެ. އެއީ މެރިންކޯރ، ސްޕެޝަލް ފޯސަސް، ފަޔަރ އެންޑް ރެސްކިޔު ސަރވިސް، ސްޕެޝަލް ޕްރޮޓެކްޝަން ގްރޫޕް، މިލިޓަރީ ޕޮލިސް، މެޑިކަލް ސަރވިސް، މިލިޓަރީ އިންޖިނިއަރސް، އިލެކްޓްރިކަލް އެންޑް މެކޭނިކަލް އިންޖިނިއަރސްގެ އިތުރުން ސަރވިސް ކޯ އަދި ކޯސްޓްގާޑުގެ ދާއިރާއަށް ކަމަށް ޑިފެންސް މިނިސްޓްރީން ކުރި އިއުލާނުގައި ވެއެވެ.
އެ އިއުލާނުގައިވާ ގޮތުން ވަޒީފާއަށް ކުރިމަތިލާ ފަރާތްތަކުގެ ހުންނަން ޖެހޭ ޝަރުތުތަކުގެ ތެރޭގައި، ދިވެހި ރައްޔިތެއް ކަމުގައިވުމާއި، ދަށްވެގެން ޖީސީއީ އޯ ލެވެލް ފެންވަރު ހުރުން ނުވަތަ އެ ފެންވަރުގެ ވޮކޭޝަނަލް ސެޓްފިކެޓެއް އޮތުމެވެ. އަދި އުމުރުން 18 އަހަރު ފުރި 25 އަހަރު ނުފުރޭ މީހަކު ކަމުގައިވުމާއި، ސިފައިންގެ ވަޒީފާ އަދާކުރެވޭ ފަދަ ޞިއްޙަތެއްގައި ހުރި މީހަކު ކަމުގައި ވާންޖެހޭއެވެ.
ސިފައިންގެ ވަޒީފާއަށް ކުރިމަތިލާ މީހުންގެ ތެރޭގައި ވޭތުވެދިޔަ 5 އަހަރު ދުވަހުގެ ތެރޭގައި ކުށުގެ ރެކޯޑެއް އޮތް މީހަކު ކަމުގައި ނުވުމާއި، އިސްކޮޅު (ފިރިހެން: 5 ފޫޓް 5 އިންޗި، އަންހެން: 5 ފޫޓް 3 އިންޗި) ފުރިހަމަވުމާއި އަދި އެއްވެސް ސިޔާސީ ޕާޓީއެއްގެ މެމްބަރެއްކަމުގައި ނުވުން ހިމެނޭއެވެ.
ވަޒީފާއަށް އެދޭ ފޯމު ހުށައެޅުމުގެ ސުންގަޑި އަކީ 2019 ފެބްރުވަރީ 14 ވަނަ ދުވަހުން ފެށިގެން 2019 ފެބްރުވަރީ 24 ވާ އާދީއްތަ ދުވަހުގެ 14:00 ގެ ކުރިން ކަމަށް އެމްއެންޑީއެފްގެ އިއުލާނުގައި ވެއެވެ.
