އާޒިމާގެ މައްސަލައިގައި އަންނަ ހަފުތާގައި ގޮތެއް ނިންމާނަން: ބިޝާމް
ރައީސް ޔާމީންގެ މައްޗަށް ދައުވާކުރަން މިއަދު ވަނީ ފޮނުވާފައި
ރިޔާސީ އިންތިިޚާބާ ގުޅޭ ގޮތުން ރައީސް ޔާމީން ހުށަހެޅި މައްސަލައިގައި އެ މަނިކުފާނުގެ ފަރާތުން ގާނޫނީ ވަކީލެއްގެ ގޮތުގައި އާޒިމާ ޝަކޫރު ސުޕްރީމް ކޯޓަށް ވަދެވަޑައިގަންނަވަނީ
ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރ އައިޝަތު އާޒިމާ ޝަކޫރުގެ މައްޗަށް ދައުވާކުރަން ފުލުހުން ފޮނުވާފައިވާ މައްސަލައާމެދު އަންނަ ހަފުތާގައި ގޮތެއް ނިންމަވާނެ ކަމަށް ޕްރޮސެކިއުޓަރ ޖެނެރަލަށް އައިޝަތު ބިޝާމް ވިދާޅުވެއްޖެ އެވެ.
ކުރީގެ ރައީސް އަބްދުﷲ ޔާމީންގެ މައްޗަށް ދައުވާ އުފުލައި، ޝަރީއަތް ހިންގުމަށް ކްރިމިނަލް ކޯޓަށް މައްސަލަ ބުދަ ދުވަހު ފޮނުވާފައި ވާއިރު، ޕްރޮސިކިއުޓަރ ޖެނެރަލް ބިޝާމް ވިދާޅުވީ އާޒިމާގެ މައްސަލަ ދިރާސާ ކުރަމުން ގެންދަވާ ކަމަށެވެ. ދެ މައްސަލައިގައި ވަކިން ދައުވާ އުފުލަން ނިންމީ މައްސަލަ ޝަރީއަތުގައި ހިންގާނީ ވެސް ވަކި ދެ މައްސަލައެއްގެ ގޮތުގައި ކަމަށް ވާތީ ކަމުގައި އޭނާ ވިދާޅުވި އެވެ.
ކުރީގެ ރައީސް ޔާމީންގެ މައްޗަށް ދައުވާކުރީ މަނީ ލޯންޑަރ ކުރުމާއި، ދައުލަތުގެ އިދާރާތަކަށް ދޮގު މައުލޫމާތު ދިނުމުގެ ކުށުގެ ދައުވާ އެވެ.
އާޒިމާގެ މައްޗަށް ތުހްމަތުކޮށްފައި ވަނީ މަނީ ލޯންޑަރ ކުރުމުގައި ޔާމީނާއި ބައިވެރިވެ އެހީތެރިކަން ދިނުމުގެ އިތުރުން ދައުލަތުގެ އިދާރާތަކަށް ދޮގު މައުލޫމާތު ދީ އޮޅުވާލާފައިވާ ކަމުގެ ތުހުމަތެވެ. މި މައްސަލަ ޕޮލިހުން، ޕީޖީ އޮފީހަށް ފޮނުވީ މި މަހުގެ 6 ގަ އެވެ.
ރައީސް ޔާމީނާ އާޒިމާ ސަލާން ކުރައްވަނީ
އެމްއެމްޕީއާރްސީ މެދުވެރިކޮށް ކުއްޔަށް ދޫކުރި ރަށްތަކާއި ފަޅުތަކާ ގުޅިގެން ދައުލަތަށް ލިބުނު ފައިސާއަށް ހިޔާނަތްތެރިވި ފަރާތްތަކުން އޭގެ ތެރެއިން ގިނަ އަދަދެއްގެ ފައިސާ ރައީސް ޔާމީނުގެ ނަމުގައި މޯލްޑިވްސް އިސްލާމިކް ބޭންކުގައި ހުރި އެކައުންޓަކަށް ޖަމާކޮށްފައިވާ ކަމަށާއި، އެފައިސާ ލޯންޑަރކޮށް އަދި އެކަމާ ގުޅޭ ގޮތުން ދައުލަތުގެ ކަމާބެހޭ ފަރާތްތަކުން ހިންގި ތަހުޤީޤާ ގުޅިގެން ހިންގާފައިވާ މުއާމަލާތްތަކުގައި ދައުލަތުގެ ރަސްމީ އިދާރާތަކަށް ދޮގު މައުލޫމާތު ދީފައިވާ ކަމުގެ ތުހުމަތު ރައީސް ޔާމީނުގެ މައްޗަށް ކުރެވޭ ކަމަށް ވެސް ފުލުހުން ވަނީ ބުނެފަ އެވެ.
އެ ފައިސާއަކީ ދައުލަތަށް ލިބެންޖެހޭ ފައިސާ ކަމަށާއި، އެފައިސާ އަނބުރާ ދައުލަތަށް ހަވާލުކުރަން އެންގެވުމުން އެކަން ނުކުރައްވައި އެ ފައިސާ އެމަނިކުފާނުގެ ނަމުގައި ބޭންކުގައި ހުޅުވާފައިވާ އެކައުންޓުތަކުގައި ދައުރުކޮށް އެއިން މާލީ މަންފާ ލިބޭ ގޮތަށް ބޭނުން ކޮށްފައިވާ ކަމަށްވެސް ބަޔާނުގައި ބުނެފައިވެއެވެ.
އެމްއެމްޕީއާރުސީގެ ފައިސާ ވެއްދި އެސްއޯއެފް ކުންފުނިން ރައީސް ޔާމީންގެ އެކައުންޓަށް 2015 ވަނަ އަހަރު ދެ ބުރަކަށް ޖަމާކުރި އެއް މިލިއަން ޑޮލަރު އަނބުރާ ދިނުމުގެ ބަދަލުގައި، ބޭންކް އޮފް މޯލްޑިވްސްގައި ހުޅުވި އެކްސްކްރޯ އެކައުންޓަކަށް ޖަމާކުރީ އިސްލާމިކް ބޭންކުގެ އެކައުންޓްގައި ހުރި ފައިސާ ނޫން ކަން ވަނީ އެނގިފަ އެވެ. ނަމަވެސް އެ މަނިކުފާނުގެ އެކައުންޓްގައި ހުރީ ގާނޫނާ ހިލާފަށް ހޯދި ފައިސާއެއް ނޫން ކަމަށް ރައީސް ޔާމީން ވަނީ ވިދާޅުވެ އެވެ.
އިސްލާމިކް ބޭންކާއި ބީއެމްއެލްގައި ހުޅުވާފައިވާ ކުރީގެ ރައީސް ޔާމީންގެ ދެ އެކައުންޓްގައި ހުރި 100 މިލިއަނަށް ވުރެ ގިނަ ރުފިޔާ ވަނީ ފްރީޒްކޮށްފަ އެވެ. އެއީ ވެސް ސައްހަ ފައިސާ ކަމަށް އެ މަނިކުފާނު ވަނީ ވިދާޅުވެފަ އެވެ.
އެމްއެމްޕީއާރުސީގެ ބޮޑު ހިޔާނާތް ހިންގީ، އެ ކުންފުނިން ރައްތައް ވިއްކޭ ގޮތަށް މެންޑޭޑް ބަދަލު ކޮށްފައިވަނިކޮށެވެ. ރަށްތަކާއި ފަޅުތައް ވިއްކައިންގެ ދައުލަތަށް ލިބެންޖެހޭ އެއް ބިލިއަނަށް ވުރެ ގިނަ ރުފިޔާ އަމިއްލަ ކުންފުނިތަކެއްގެ އެކައުންޓަށް ޖަމާކޮށްފައިވާކަން ފަޅާއެރީ އޮޑިޓަ ޖެނެރަލް ނެރުނު ރިޕޯޓުންނެވެ.
