މިޞްރުގެ ފޮރިން މިނިސްޓަރަށް ޝާހިދު ތަހުނިޔާގެ މެސެޖެއް ފޮނުއްވައިފި
50 އަހަރު ތެރޭގައި ދެ ގައުމުގެ ގުޅުން ބަދަހިވެފައިވާ ކަމަށް ވިދާޅުވި
ރާއްޖެ އާއި މިސްރުގެ ގުޅުމަށް މިއަދު ވަނީ 50 އަހަރު ފުރިފައި
ދިވެހިރާއްޖެ އާއި މިޞްރާ އެކު އޮންނަ ޑިޕްލޮމެޓިކް ގުޅުމަށް 50 އަހަރު ފުރުމާ ގުޅިގެން މިނިސްޓަރ އޮފް ފޮރިން އެފެއާޒް ޢަބްދުﷲ ޝާހިދު، މިސްރުގެ މިނިސްޓަރ ފޯ ފޮރިން އެފެއާޒް، ސަމެޙް ޝޮކްރީއަށް ތަޙުނިޔާގެ މެސެޖެއް ފޮނުއްވައިފިއެވެ.
ފޮރިން މިނިސްޓަރ ފޮނުއްވި މެސެޖުގައި މިޞްރު ސަރުކާރާއި މިޞްރު ރައްޔިތުންނަށް ތަޙުނިޔާ އަރިސްކުރައްވައި، ފާއިތުވި 50 އަހަރު ތެރޭގައި ދިވެހިރާއްޖެއާ މިޞްރާއި ދެމެދު އޮންނަ ގާތް އަޚުވަންތަ ގުޅުން އިތުރަށް ޙަރުދަނާ ވެފައިވާކަން ފާހަގަކުރައްވާފައިވާ ކަމަށް ފޮރިން މިނިސްޓްރީން މައުލޫމާތުދެއެވެ.
ދިވެހިރާއްޖެ އާއި މިޞްރާ ޑިޕްލޮމެޓިކް ގުޅުން ގާއިމް ކުރެވުނީ 12 ފެބްރުއަރީ 1969 ގައެވެ.
މީގެ އިތުރުން ފޮރިން މިނިސްޓަރު ޝާހިދު ވަނީ ޖަރުމަނުގެ ހޮނަރަރީ ކައުންސިލްއަށް ރާއްޖޭގެ ފަރާތުން އައްޔަން ކުރެއްވި ސަންޖޭ އިބްރާހިމް މަނިކު އަށް މަރުހަބާ ދަންނަވާފައެވެ.
އެ ބައްދަލުވުމުގައި ޝާހިދު ވަނީ، ޖަރުމާނާ އެކު ޓޫރިޒަމްގެ އިތުރުން އިގްތިސާދީ ގޮތުން ކުރިއެރުވުމަށް މަސައްކަތް ކުރައްވަން ސަންޖޭގެ ފަރާތުން އެދިވަޑައިގެންފައެވެ.
ޖަރުމަންވިލާތަކީ ރާއްޖޭގެ ޓޫރިޒްމްގައި ބޮޑު ދައުރެއް އަދާކުރާ ގައުމެކެވެ. ނިމިގެން ދިޔަ 2018 ވަނަ އަހަރު ޖަރުމަނުގެ 8.9 ޕަސެންޓް ފަތުރުވެރިން ރާއްޖެއަށް ޒިޔާރަށް ކޮށްފައި ވެއެވެ.
