ތައިލެންޑުން ހައްޔަރުކުރި ފުޓުބޯޅަ ކުޅުންތެރިޔާ އެނބުރި އޮސްޓްރޭލިޔާއަށް ގޮސްފި

ތައިލެންޑުން ހައްޔަރުކޮށް ޖަލަށްލި ރެފިއުޖީ ފުޓްބޯޅަ ކުޅުންތެރިޔާ، ހަކީމް އަލް އަރައިބީ ދޫކޮށްލުމުން އޭނާ ދިރިއުޅޭ ގައުމު ކަމަށްވާ އޮސްޓްރޭލިއާ އަށް އެނބުރި ގޮސްފިއެވެ.

ބަހްރެއިންގެ ރައްޔިތެއް ކަމަށްވާ އަރައިބީ ބެންގކޮކުން ހައްޔަރުކޮށްފައި ވަނީ ބަހްރެއިނުން އިންޓަރޕޯލް މެދުވެރިކޮށް ނޯޓިސް ނެރެގެންނެވެ.

ބެންގކޮކްގެ ޖަލުގައި ދެ މަސްދުވަހު ބެހެއްޓުމަށް ފަހު ހޯމަ ދުވަހު އޭނާ ދޫކޮށްލާފައި ވަނީ އިންސާނީ ހައްގުތަކަށް މަސައްކަތްކުރާ ބައިނަލްއަޤްވާމީ ޖަމާއަތްތަކުން ގޮވާލަމުންދިޔަ ގޮވާލުމާ އެކު ބަހްރެއިނުން އޭނާގެ އެކްސްޓްރެޑިޝަން އަށް ކުރަމުންދިޔަ ޑިމާންޑް ހުއްޓާލުމުންނެވެ.

އުމުރުން 25 އަހަރުގެ ކުޅުންތެރިޔާ މެލްބަންގެ އެއަރޕޯޓަށް ދިއުމާ އެކު އޭނާއަށް ތާއީދުކުރާ އެތައް ސަތޭކަ ސަޕޯޓަރުންނެެއް ވަނީ އުފާފާޅުކޮށްފައެވެ.

އެއަރޕޯޓްގެ ބޭރުގައި އެއްވެފައި ތިބި މީހުންނާ ވާހަކަ ދައްކަމުން އޭނާ ވަނީ އޮސްޓްރޭލިއާށް ޝުކުރު އަދާކުރާ ކަމަށް ބުނެފަައެވެ. އަދި އެތަނަށް އެހާ ބައިވަރު މީހުން އައުމުން ހައިރާންވެއްޖެ ކަމަށް ބުނެފައެވެ.

ހަކީމް އަލް އަރައިބީއަކީ ބަހްރެއިންގެ ވެރިކަމާ ދެކޮޅަށް ފާޅުގައި ފާޑުކިޔަމުންދާ މީހަކަށްވާއިރު އޭނާ ފިލައިގެންގޮސް އޮސްޓްރޭލިއާ އިން ސިޔާސީ ހިމާޔަތްހޯދާފައި ވަނީ 2014 ވަނަ އަހަރުއެވެ.

އޮސްޓްރޭލިއާގައި އޭނާ އުޅެމުން ދަނިކޮށް ބަހްރެއިނުން ވަނީ ފުލުހުންގެ މަރުކަޒަކަށް ގެއްލުންދިން ކަމުގެ ދައުވާކޮށް 10 އަހަރުގެ ހުކުމެއް ކޮށްފައެވެ. އެ ދައުވާއަށް އޭނާ އިންކާރުކުރެއެވެ.

ބަހްރެއިނަށް އޭނާ އަނބުރާ ފޮނުވާލައިފި ނަމަ އޭނާއަށް އަނިޔާއާ ކުރިމަތިލާން ޖެހިދާނެކަމުގެ ބިރު އޮތް ކަމަށް އިންސާނީ ހައްގުތަކަށް މަސައްކަތްކުރާ ފަރާތްތަކުން ވަނީ ބުނެފައެވެ.