ރާއްޖޭގައި ބޯޑަރ ކޮންޓްރޯލް ނިޒާމެއް ގާއިމްކުރުމަށް އޮސްޓްރޭލިއާގެ ކުންފުންޏެއް ކަމުގައިވާ ނެކްސްބިޒްއާ އެކު ވެވުނު އެއްބަސްވުން ބާތިލުކުރުމާ ގުޅިގެން، ބަދަލުގެ ގޮތުގައި ދޭން ޖެހޭ 18 މިލިއަން ޑޮލަރު ސަރުކާރުން ދައްކައިފިއެވެ.
ރައީސް ނަޝީދުގެ ސަރުކާރުން ބޯޑަރ ކޮންޓްރޯލް ނެކްސްބިޒާއާއެކު އެއްބަސްވުމެއް ގާއިމްކުރީ 17 އޮކްޓޫބަރު 2010 ގައެވެ. އެގްރީމަންޓް ބާތިލުކުރިކަމުގެ ނޯޓިސް ނެކްސްބިޒްއަށް ފޮނުވީ 5 އޮގަސްޓް 2013 ވަނަ އަހަރުގެ ތެރޭގައި ރައީސް ވަހީދުގެ ސަރުކާރުންނެވެ.
އެގްރީމަންޓް ބާތިލުކުރުމާ ގުޅިގެން ސިންގަޕޫރުގެ އިންޓަނޭޝަނަލް އަރބިޓްރޭޝަން ސެންޓަރަށް ނެކްސްބިޒުން މައްސަލަ ހުށައެޅީ ބަދަލުގެ ގޮތުގައި 272 މިލިއަން އެމެރިކާ ޑޮލަރަށް ވުރެ ގިނަ ފައިސާ ހޯދުމަށެވެ. ނަމަވެސް، މައްސަލަ ބެލުމަށް ފަހު ދިވެހި ސަރުކާރުން އެއްބަސްވުމާއި ހިލާފުވެފައިވާ ކަމަށް ނިންމައި، ބަދަލުގެ ގޮތުގައި ނެކްސްބިޒަށް 18 މިލިއަން ޑޮލަރު ދެއްކުމަށް ދިވެހި ދައުލަތުގެ މައްޗަށް ސިންގަޕޫރު އަރބިޓްރޭޝަނުން ހުކުމް ކުރީ 24 ނޮވެމްބަރު 2016 ގައި އެވެ.
މި މައްސަލައާ ގުޅިގެން ބުދަ ދުވަހު އޭޖީ އޮފީހުން ނެރުނު ބަޔާނެއްގައި ބުނެފައިވަނީ، އެވޯޑު ތަންފީޒުނުކުރުމަށާއި އެވޯޑުގައި ބަޔާންކޮށްފައިވާ ފަދައިން ފައިސާ ދެއްކުމުގެ ކަންކަން ކުރިޔަށް ނުގެންދިޔުމަށް އެންގީ ރައީސް ޔާމިންގެ ސަރުކާރުން ކަމަށެވެ. އަދި ތަކުރާރުކޮށް ސިޓީ ފޮނުވައިގެން ވެސް ފައިސާ ނުލިބުމާ ގުޅިގެން، ނެކްސްބިޒްގެ ފަރާތުން ސިންގަޕޫރުގެ ހައިކޯޓަށް މައްސަލަ ހުށައެޅުމުން އެ ކޯޓުން ވެސް ވަނީ، އެ ހުކުމް ތަންފީޒުކުރުމަށް ހުކުމް ކޮށްފައެވެ.
ނޫސްބަޔާން: ނެކްސްބިޒް ލިމިޓެޑްގެ ފަރާތުން ދިވެހި ސަރުކާރާ ދެކޮޅަށް ސިންގަޕޯރ އިންޓަރނޭޝަނަލް އާބިޓްރޭޝަން ސެންޓަރަށް ހުށަހެޅި އާބިޓްރޭޝަން މައްސަލައިގެ ފައިނަލް އެވޯޑު ތަންފީޛުކުރުމާގުޅޭ pic.twitter.com/75QmsKB9hF
— AG Office Maldives (@agofficemv) February 6, 2019
އޭޖީ އޮފީހުން ބުނީ ހުކުމުގައިވާ ގޮތަށް އެވޯޑް ތަންފީޒުކުރަން ނިންމީ ބޭރު އިންވެސްޓަރުންގެ އިތުބާރު ލިބޭ ފަދަ ތަނަކަށް ދިވެހިރާއްޖެ ހަދައި، ރާއްޖޭގައި ކުރާ އިންވެސްޓްމަންޓްތަކަށް ރައްކާތެރި މާހައުލެއް ގާއިމުކޮށްދިނުމުގެ ގޮތުން ކަމަށެވެ.
ބޯޑާ ކޮންޓްރޯލް ސިސްޓަމް ގާއިމްކޮށް ބެލެހެއްޓުމަށް 20 އަހަރުގެ މުއްދަތަކަށް ހެދި އެއްބަސްވުން އުވާލީ ދިވެހި ސަރުކާރަށް ގެއްލުންވާތީ ކަމަށް، އެއްބަސްވުން ބާތިލުކުރި އިރު ބަންޑާރަ ނައިބަކަށް ހުރި އާޒިމާ ޝަކޫރު ވިދާޅުވެފައި ވެއެވެ.
މީގެ ކުރިން ދިވެހި ދައުލަތާ ދެކޮޅަށް ނިމުނު ޖީއެމްއާރްގެ އަރބިޓްރޭޝަން މައްސަލައިގައި ދައްކަން ޖެހުނު 271 މިލިއަން ޑޮލަރަށްވާ ފައިސާ ޖީއެމްއާރަށް ދެއްކީ އެމްއެމްއޭގެ ރިޒާވުން 140 މިލިއަން ޑޮލަރު ނަގައިގެންނާއި އެއާޕޯޓް ކުންފުނިން ފައިސާ ނަގައިގެންނެވެ.
